“Sunodon Nindo nin Estrikto an Saiyang mga Lakad”
1. Paano kita magigin epektibong mga ministro?
1 Si Jesus dai nag-adal sa rabinikong mga paadalan, alagad sia an pinakadakulang Ministro sa kasaysayan. Marahay na sana, sarong nasusurat na rekord kan ministeryo ni Jesus an iningatan para sa satong kapakinabangan. Tanganing kita magin epektibong mga ministro, dapat niatong “sunodon nin estrikto an saiyang mga lakad.”—1 Ped. 2:21.
2. Ano an makakatabang sa sato na pataluboon an arog-Cristong pagkamoot sa mga tawo?
2 Magpaheling nin Pagkamoot sa mga Tawo: An mamomoton na pagmakolog sa mga tawo an nagmotibar ki Jesus. (Mar. 6:30-34) Dakol na tawo sa satong teritoryo an “nakokolgan” asin nangangaipong marhay kan katotoohan. (Roma 8:22) An satong paghorophorop sa makamomondo nindang kamugtakan asin sa mamomoton na interes ni Jehova sa sainda mamotibar sa sato na magpadagos sa paghuhulit. (2 Ped. 3:9) Dugang pa, mas andam na maghihimate an mga tawo sa satong mensahe kun naririsa ninda na tunay na nagmamakolog kita sa sainda.
3. Sa anong mga kamugtakan naghulit si Jesus sa iba?
3 Magpatotoo sa Lambang Oportunidad: Inaprobetsaran ni Jesus an lambang oportunidad na sabihon sa iba an maogmang bareta. (Mat. 4:23; 9:9; Juan 4:7-10) Kaagid kaiyan, gusto niatong magin andam na ipakipag-olay an katotoohan mantang ginigibo niato an satong rutina sa aroaldaw. An nagkapira pirmeng nagdadara nin Biblia asin literatura tanganing makapagpatotoo sinda sa trabaho, sa eskuelahan, sa pagbiahe saka pamamakal, asin sa iba pa.
4. Paano niato magigibo na tema kan satong paghuhulit an Kahadean?
4 Isentro an Atension sa Kahadean: An maogmang bareta kan Kahadean an nagin tema kan paghuhulit ni Jesus. (Luc. 4:43) Minsan ngani sa satong pakikipag-olay tibaad dai niato tolos o direktamenteng sinasambit an Kahadean, isinasaisip niato na tabangan an kagharong na masabotan nia na kaipuhan iyan. Dawa kun sinasambit niato an dapit sa maraot na mga kamugtakan kan kinaban na nagpaparisang nabubuhay na kita sa huring mga aldaw, kita sa pangenot “nagpapahayag kan maogmang bareta dapit sa marahay na mga bagay.”—Roma 10:15.
5. Tanganing magin epektibo an satong ministeryo, ano an dapat na magin papel kan Biblia?
5 Magsarig sa Tataramon nin Dios: Sa bilog na ministeryo ni Jesus nagsarig sia sa Kasuratan. Dai lamang sia nagtokdo nin hale sana sa saiya. (Juan 7:16, 18) Binabasa nia an Tataramon nin Dios asin ginamit nia iyan kan inaatake sia ni Satanas. (Mat. 4:1-4) Tanganing epektibo niatong matokdoan an iba, dapat niatong basahon an Biblia aroaldaw asin personal na iaplikar iyan. (Roma 2:21) Kun nagsisimbag nin mga hapot sa ministeryo, maninigo kitang magsambit nin sono sa Kasuratan na patotoo sa satong mga sinasabi asin direktang magbasa sa Biblia basta posible. Gusto niatong maheling kan kagharong na dai kita nagpapahayag nin personal na mga opinyon kundi ibinabasar niato sa mga kaisipan nin Dios an satong sinasabi.
6. Ano an ginibo ni Jesus tanganing maabot an puso kan mga naghihinanyog sa saiya?
6 Aboton an Puso sa Saindong Pagtotokdo: “Mayo pa nin ibang tawo na nagtaram nin arog kaini.” (Juan 7:46) Iyan an sinabi kan mga opisyal manongod ki Jesus kan maghapot an poon na mga saserdote asin mga Fariseo kun taano ta dai sia naarestar kan mga opisyal. Imbes na magtao sana nin impormasyon, nagtokdo si Jesus sa paagi na nakaabot sa puso kan mga tinokdoan nia. (Luc. 24:32) Naggamit sia nin mga ilustrasyon hale sa aroaldaw na pangyayari sa buhay tanganing mas masabotan an saiyang mensahe. (Mat. 13:34) Dai tinawan ni Jesus nin kadakol-dakol na impormasyon an mga naghihinanyog sa saiya. (Juan 16:12) Dinara nia an atension ki Jehova imbes na sa sadiri nia. Arog ni Jesus, magigin marahay sana kitang mga paratokdo kun ‘pirme niatong tatawan nin atension an satong pagtotokdo.’—1 Tim. 4:16.
7. Taano ta nagpadagos si Jesus sa ministeryo?
7 Magpadagos sa Ibong kan Pagkaindiperente Asin Pagtumang: Minsan ngani naggibo si Jesus nin makapangyarihan na mga gibo, dakol an dai naghinanyog sa saiya. (Luc. 10:13) Dawa an mga kapamilya mismo ni Jesus naghona na “naraot na an isip nia.” (Mar. 3:21) Minsan siring, nagpadagos si Jesus. Pinagdanay nia an positibong saboot huling biyo siang kombensido na yaon sa saiya an katotoohan na makakapatalingkas sa mga tawo. (Juan 8:32) Sa tabang ni Jehova, determinado man kitang dai umontok.—2 Cor. 4:1.
8, 9. Paano niato maaarog si Jesus sa pagsasakripisyo para sa maogmang bareta?
8 Maggibo nin Kinakaipuhan na mga Sakripisyo Tanganing Lubos na Makapakikabtang: Isinakripisyo ni Jesus an materyal na kaginhawahan huli sa ministeryo. (Mat. 8:20) Daing kapagalan siang naghulit, kun beses sagkod sa banggi. (Mar. 6:35, 36) Aram ni Jesus na limitado an saiyang panahon tanganing otobon an gibohon. Huling “nainaan na an panahon na natatada,” kita kaipuhan man na personal na magsakripisyo kan satong panahon, kosog, asin kuarta bilang pag-arog ki Jesus.—1 Cor. 7:29-31.
9 An mga Kristiano kan enot na siglo nagin epektibong mga ministro huling nakanood sinda ki Jesus. (Gibo 4:13) Lubos man niatong maootob an satong ministeryo kun satong aarogon an pinakadakulang Ministro sa kasaysayan.—2 Tim. 4:5.