Rangahon an mga Nagmomondo
1. Taano ta nangangaipo nin karangahan an mga nagmomondo?
1 Sarong makologon na eksperyensia an magadanan nin namomotan, nangorogna para sa mga mayo nin paglaom sa Kahadean. (1 Tes. 4:13) Dakol an parateng nag-iisip-isip: ‘Taano ta nagagadan an mga tawo? Saen sinda minaduman? Maheheling ko pa daw giraray an sakong namomotan?’ An minasunod mga suhestion na makakatao nin karangahan sa mga nanonompongan niato sa paglilingkod sa langtad na nagmomondo huli sa pagkagadan nin sarong paryente o katood.—Isa. 61:2.
2. Kun sabihon sa sato nin kagharong na sia nagmomondo, maninigo daw na pirme niatong pagmaigotan na magpatotoo nin halawig?
2 Sa Harong-Harong: Tibaad sabihon sa sato nin kagharong na nagadanan pa sana sia nin sarong kapamilya. Sia daw napupurisaw nin grabe? An harong daw pano nin nagmomondong mga paryente? Sa siring na mga kamugtakan, tibaad pinakamarahay na dai magpatotoo nin halawig. (Ecl. 3:1, 7) Tibaad puede niatong ipahayag an satong pakikidamay, tawan sia nin angay na pulyeto, magasin, o brosyur, asin magalang na humale. Dangan puede kitang magbalik sa mas angay na panahon tanganing magpaabot nin dugang pang karangahan hale sa Biblia.
3. Kun itinotogot kan kamugtakan, anong mga teksto an puede niatong ipaheling sa sarong nagmomondong kagharong?
3 Sa ibang mga kamugtakan, tibaad marisa niato na mas dakol an puedeng sabihon niato sa enot na pagdalaw. Minsan ngani bako ini an panahon na pahimutikan an salang mga opinyon, tibaad puede niatong basahon kaiba ninda an mga panuga na nasa Biblia mapadapit sa pagkabuhay liwat. (Juan 5:28, 29) O puede niatong ipaheling sa sainda an sinasabi kan Biblia manongod sa kamugtakan kan mga gadan. (Ecl. 9:5, 10) An pagkasaysay sa Biblia manongod sa pagkabuhay liwat puede man na makatao nin karangahan. (Juan 11:39-44) An saro pang opsion iyo an pag-estudyar sa mga tataramon nin paglaom ki Jehova na sinabi kan maimbod na si Job. (Job 14:14, 15) Bago maghale, puede niatong ialok an Ano an Nangyayari sa Sato kun Kita Magadan?, Kun Magadan an Sarong Namomotan, o iba pang angay na brosyur o pulyeto. O puede kitang magwalat nin librong Itinotokdo kan Biblia, darahon an atension sa impormasyon sa kapitulo 6, asin iareglo na pag-olayan pa an temang iyan pagbalik niato.
4. Sa ano pang ibang kamugtakan kaipuhan kitang magtao nin karangahan?
4 Sa Ibang mga Kamugtakan: Kun ginigibo sa Kingdom Hall an pahayag sa lobong, may mga maatender daw na bakong Saksi ni Jehova? Puedeng mag-andam para sa sainda nin mga babasahon na makakatao nin karangahan. Inapresyar nin nagkapirang punerarya an pagkaigwa nin nagkapirang angay na babasahon para sa nagmomondong mga pamilya. Kun beses, an mga paisi manongod sa lobong na yaon sa diaryo nagbukas kan dalan tanganing makapadara nin halipot asin nakakarangang surat sa nagadanan na mga kapamilya. Sa sarong situwasyon, pakatapos na maresibi nin sarong lalaking balo asin kan saiyang aking babae an sarong surat na may kaibang nagkapirang pulyeto, nagpasiring sinda sa harong kan parahayag asin naghapot: “Kamo an nagpadara sa sako kan surat na ini? Bueno, gusto kong makaaram nin orog pa manongod sa Biblia!” An lalaki asin an saiyang aki nag-oyon na makipag-adal sa Biblia saka nagpoon na mag-atender sa mga pagtiripon kan kongregasyon.
5. Taano ta maninigo kitang magin listo sa mga oportunidad na rangahon an mga nagmomondo?
5 An Eclesiastes 7:2 nagsasabi: “Mas marahay na magduman sa harong nin pagmondo kisa magduman sa harong nin bangkete.” Sa parate, an nagmomondo mas andam na maghinanyog sa Tataramon nin Dios kisa sa mga tawong interesado sana sa pagpasiramsiram. Gabos kita maninigong magin listo na mangnohon an angay na mga oportunidad na rangahon an mga nagmomondo huli sa pagkagadan nin namomotan.