Tokdoan an Iba na Kamotan si Jehova
1. Taano ta an nagkapira naparani ki Jehova?
1 Nagigirumdoman daw nindo an kaenot-enoteng pakadangog nindo manongod ki Jehova? Taano ta naparani kamo sa saiya? Dakol na tawong may sadiosan na puso an masabi sa saindo na naparani sinda sa satong Kaglalang kan manodan ninda an manongod sa saiyang daing kaagid na mga kualidad, nangorogna an saiyang pagmalasakit asin pagkamoot.—1 Juan 4:8.
2, 3. Paano niato magagamit an librong Itinotokdo kan Biblia tanganing tabangan an mga inaadalan sa Biblia na tumalubo sa saindang pagkamoot ki Jehova?
2 “Ini an Satong Dios”: Idinodoon kan librong Itinotokdo kan Biblia an pagkamoot ni Jehova asin an pangangaipo na magkaigwa nin personal na relasyon sa saiya. Paano niato magagamit an publikasyon na ini tanganing tokdoan an iba na tumalubo sa saindang pagkamoot sa Dios? Kun idinodoon an sarong bagong punto, puede kitang magbangon nin mga hapot na nagsisiyasat sa puso, siring kan: “Ano an ihinahayag kan katotoohan na ini manongod ki Jehova?” o “Sa anong paagi pinapatunayan kan puntong ini na si Jehova an pinakamarahay na Ama na gugustohon nin siisay man?” An pagtotokdo sa paaging ini makakatabang sa inaadalan sa Biblia na ponan an bilog na buhay na relasyon ki Jehova.
3 Kun tinatabangan niato an mga inaadalan sa Biblia na masabotan kun gurano kapambihirang pribilehio an pagkua nin kaaraman dapit sa solamenteng tunay asin buhay na Dios, masasabi ninda, siring kan mga tataramon ni Isaias, na “ini an satong Dios.” (Isa. 25:9) Kun ipinapaliwanag an Tataramon nin Dios, kaipuhan niatong idoon kun paano bebendisyonan an katawohan sa pagkaotob kan mga katuyohan ni Jehova paagi sa saiyang makahadeng gobyerno sa pamamahala ni Cristo Jesus.—Isa. 9:6, 7.
4, 5. Ano an kahulogan kan pagkamoot ki Jehova?
4 Ebidensia nin Pagkamoot ki Jehova: Aram niato na bako sanang basta pagkaigwa nin makosog na pagmate para sa Dios an kalabot sa pagkamoot ki Jehova nin bilog na puso, kalag, asin isip. Dapat na akoon asin sunodon niato an saiyang kaisipan. (Sal. 97:10) Ipinapaheling an pagkamoot sa Dios paagi sa estriktong pagkuyog sa saiyang mga togon asin padagos na pakikabtang sa “banal na mga gawe asin gibo nin diosnon na debosyon,” dawa kun napapaatubang sa mga pagbalo asin pagtumang.—2 Ped. 3:11; 2 Juan 6.
5 An paggibo kan kabotan nin Dios huli sa pagkamoot sa saiya sarong kaogmahan. (Sal. 40:8) Dapat na masabotan kan inaadalan sa Biblia na an gabos na togon nin Dios ginibo para sa daing katapusan na ikakarahay kan mga lingkod Nia. (Deut. 10:12, 13) Paagi sa pamumuhay kaoyon kan paggiya ni Jehova, ipinapaheling nin saro an hararom na pagpahalaga sa gabos na makangangalas na gibo Nia. Tabangan an inaadalan sa Biblia na masabotan na an paglakaw sa matanos na mga dalan ni Jehova matabang sa saro na makalikay sa grabeng kolog asin kamondoan.
6. Anong mga bendisyon an puedeng akoon nin saro huli sa pagkamoot ki Jehova?
6 Mga Bendisyon Para sa mga Namomoot sa Dios: Si Jehova may hararom na pagmakolog sa mga mapakumbaba na namomoot sa saiya, asin ihinahayag nia sa sainda “an hararom na mga bagay nin Dios.” (1 Cor. 2:9, 10) Huling igwa kan siring na kaaraman dapit sa mga katuyohan ni Jehova, malinaw an saindang pagmansay sa ngapit asin igwa sinda nin seguradong paglaom. (Jer. 29:11) An mga namomoot ki Jehova nag-aako kan saiyang ekstraordinaryong kabootan. (Ex. 20:6) Pinapahalagahan nindang marhay an paglaom na buhay na daing katapusan, na kapahayagan kan dakulang pagkamoot nin Dios sa sainda.—Juan 3:16.
7. Ano an saboot nindo manongod sa pagtokdo sa iba na kamotan si Jehova?
7 Mientras na orog kitang nakakanood manongod sa satong langitnon na Ama, orog man niatong kaipuhan na sabihon iyan sa iba. (Mat. 13:52) Mahalagang marhay nanggad na pribilehio na tokdoan an iba, asin nangorogna an satong mga aki, na kamotan si Jehova! (Deut. 6:5-7) Kita logod, kaiba an satong mga inaadalan sa Biblia, padagos na magsulwak sa pag-omaw mantang naeeksperyensiahan niato an ‘abundansia kan karahayan ni Jehova.’—Sal. 145:7.