“Magdanay Kamo sa Pagkamoot nin Dios”

1. Sa anong katuyohan ipinublikar an “Magdanay Kamo sa Pagkamoot nin Dios”?

¹ Inaantisipar na nanggad niatong marhay na pag-adalan an bagong libro na “Magdanay Kamo sa Pagkamoot nin Dios” sa Pag-adal sa Biblia kan Kongregasyon na mapoon sa semana nin Pebrero 23! An surat kan Namamahalang Grupo para sa lambang namomoot ki Jehova nagtatapos paagi sa mga tataramon na ini: “Odok niamong linalaoman na an librong ini makakatabang sa saimo na padagos na iaplikar sa saimong buhay an katotoohan asin sa siring magdanay ka ‘sa pagkamoot nin Dios . . . na nasa isip an buhay na daing katapusan.’​—Judas 21.”

2. Sa anong mga aspekto nin buhay makakatabang sa sato an bagong libro na ini?

² Kun Ano an Aantisiparon: Paano aplikado an mga prinsipyo sa Biblia sa mga aspekto nin buhay na arog nin pakikiasosyar, pag-aling-aling, paggalang sa autoridad, personal na mga ugale, pag-agom, pagtaram, asin mga kostumbre? An satong konsensia mamomolde segun sa halangkaw na mga pamantayan nin katanosan na ihinayag sa Tataramon nin Dios. (Sal. 19:7, 8) Mantang nadadagdagan an satong pakasabot dapit sa kaisipan ni Jehova, an pagigin makinuyog niato sa gabos na aspekto nin buhay mamomotibar nin pagmawot na mapaogma sia.​—Tal. 27:11; 1 Juan 5:3.

3. Taano ta maninigo niatong gibohon an satong pinakamakakaya na makikabtang sa leksion kada semana?

³ Magin Determinado na Makikabtang: Mantang nag-aandam kamo, magin pasohan nindo na omawon an Dios sa tahaw kan saiyang tiripon na banwaan. (Heb. 13:15) Iribang pag-aadalan kan bilog na kongregasyon an bagong publikasyon na ini. Huling mas halipot an pag-aadalan, makakapag-andam kita nin lubos, na nagtatao sa sato nin kompiansa na sabihon an nanodan niato. An satong inandam na marhay asin deretso sa punto na mga komento makakadagka sa iba sa pagkamoot saka sa marahay na mga gibo asin makakatabang na magin buhay saka makahulogan an pag-adal sa libro. (Heb. 10:24) Siring man, magigin lubos an satong kagayagayahan mantang ipinapahayag niato bilang mga indibiduwal an satong pagtubod.

4. Taano ta kaipuhan niatong otobon an mga togon ni Jehova?

⁴ Kan huring banggi nia digdi sa daga bilang tawo, an pag-otob sa mga togon ni Jehova ikinonektar ni Jesus sa pagdadanay sa pagkamoot nin Dios. (Juan 15:10) Sa tabang kan librong “Pagkamoot nin Dios,” magigin mas desidido kita kisa kasuarin man na iaplikar an mga prinsipyo sa Biblia sa pangaroaldaw na buhay asin ‘magdanay sa pagkamoot nin Dios.’​—Jud. 21.