An Paghuhulit Nagpapadanay sa Sato na Makusog sa Espirituwal
1. Anong pakinabang an itinatao sa sato kan paghuhulit?
1 An aktibong pakikikabtang sa paghuhulit makakapakusog sa sato sa espirituwal asin makakadagdag sa satong kaugmahan. Siyempre, nakikikabtang kita sa ministeryo inot sa gabos para mapaugma si Jehova. Minsan siring, sa pagsunod sa pagbuot na ‘ihulit an tataramon,’ nag-aako kita nin mga bendisyon ni Jehova asin nakikinabang man kita sa iba pang mga paagi. (2 Tim. 4:2; Isa. 48:17, 18) Paano man nanggad nakakapakusog asin nakakapaugma sa sato an paghuhulit?
2. Sa anong mga paagi kita napapakusog kan ministeryo?
2 Napapakusog Kita Asin Nagkakamit nin mga Bendisyon: An paghuhulit nakakatabang sa sato na magkonsentrar sa mga bendisyon kan Kahadian imbes na sa mga problema ngunyan. (2 Cor. 4:18) An pagpaliwanag kan mga katukduan sa Bibliya nagpapakusog kan satong pagtubod sa mga panuga ni Jehova asin nagpapatalubo kan satong pagpapahalaga sa katotoohan. (Isa. 65:13, 14) Mantang tinatabangan ta an iba na magtalubo sa espirituwal tanganing magin bakong kabtang kan kinaban, napapakusog ta an sato mismong paninindugan na magin siblag sa kinaban.—Juan 17:14, 16; Roma 12:2.
3. Paano an satong ministeryo nakakatabang sa sato na mapatalubo an Kristiyanong mga kuwalidad?
3 An pakikikabtang sa ministeryo nakakatabang sa sato na mapatalubo an Kristiyanong mga kuwalidad. Halimbawa, urog kitang nagigin mapakumbaba kun hinihinguwa niyato na ‘magin gabos na bagay sa gabos na tawo.’ (1 Cor. 9:19-23) Mantang nakikipag-ulay kita sa mga tawong garo naanitan asin nagkaralagalag ‘siring sa mga karnero na dai nin pastor,’ napapahiro kitang magpahiling nin simpatiya asin empatiya. (Mat. 9:36) Nakakanuod kitang magtagal pag dai kita minasuko sa ibong nin kawaran nin interes o pagkontra. Nadadagdagan an satong kagayagayahan pag ginagamit ta an satong buhay sa pagtabang sa iba.—Gui. 20:35.
4. Paano mo minamansay an saimong ministeryo?
4 Sarong bendisyon nanggad na makikabtang sa ministeryo na nagtataong kaumawan sa Saro na iyo sanang maninigo tang sambahon! An ministeryo nagpapakusog sato. Nagtatao iyan nin abundang bendisyon sa mga aktibo nanggad na nakikikabtang sa ‘lubos na pagpatotoo dapit sa maugmang bareta.’—Gibo 20:24, NW.