An Satong Ministeryo—Pagpabanaag kan Pagkamoot Niato sa Dios
1. Napahiro si Jesus kan pagkamoot sa Dios na gibohon an ano?
1 An pagkamoot nagpahiro ki Jesus na gibohon an saiyang ministeryo. An lambang aspekto kan ministeryo ni Jesus dai manenegaran na patotoo kan pagkamoot nia ki Jehova. Si Jesus nagsabi: “Tangani na maaraman kan kinaban na namomotan ko an Ama, kun ano an itinaong togon sako kan Ama, iyan an ginigibo ko.” (Juan 14:31) Bilang mga parasunod sa lakad ni Jesus, may pribilehio man kita na ipabanaag an hararom na pagkamoot niato sa Dios paagi sa satong ministeryo.—Mat. 22:37; Efe. 5:1, 2.
2. Ano an epekto sa satong ministeryo kan pagkamoot ki Jehova?
2 “Pakangbanalon Logod an Saimong Ngaran”: Kun maigot niatong inaaprobetsaran an lambang oportunidad na makipag-olay sa iba manongod ki Jehova asin sa areglo kan saiyang Kahadean, ipinapaheling niato an satong pagkamoot sa Dios asin, sa katunayan, nagkokontribwir kita sa pagpakangbanal kan ngaran nia. (Sal. 83:18; Ezeq. 36:23; Mat. 6:9) Arog kan ministeryo ni Jesus, an satong ministeryo padagos na pagpabanaag kan satong sinserong pagmawot na pakangbanalon an ngaran ni Jehova asin gibohon an kabotan nia.—Mat. 26:39.
3. Sa anong paagi na an pagkamoot niato ki Jehova nakakatabang sa sato na kayanon an mga olang?
3 An Pagkamoot Nagpapahiro sa Sato na Kayanon an mga Olang: An pagkamoot ki Jehova nakakatabang na mapangganahan an gabos na olang. (1 Cor. 13:4, 7) Napaatubang si Jesus sa dakol na kamugtakan sa buhay na puede kutanang nakapadesganar sa saiya sa paggibo kan saiyang ministeryo. Minsan siring, kan mapaatubang sia sa mga olang, an saiyang hararom na pagkamoot asin an pagmawot nia na gibohon an kabotan ni Jehova nakatabang sa saiya na kayanon iyan. (Mar. 3:21; 1 Ped. 2:18-23) Kita napapaatubang man sa dakol na kadepisilan, asin an satong pagkamoot sa Dios makakatabang sa sato na kayanon iyan. Paagi sa maingat na pagsunod sa itinaong arogan ni Cristo, tibaad mamatean niato na kita kompiado asin dai nadedesganar na otobon an satong ministeryo. Minsan ngani tibaad makaapektar sa sato an pagtumang nin pamilya, pagluya nin salud, paggurang, o lakop na pagkadaing interes nin mga tawo, dai iyan nakakapugol sa sato na ipaheling an pagkamoot niato ki Jehova paagi sa paggibo kan satong ministeryo sa pinakaepektibong paagi na mapupuede.
4. Anong pribilehio an itinatao sa sato kan pagkamoot ki Jehova?
4 An pagkamoot mapuersa, asin biniyayaan kita nin kakayahan na ipabanaag an satong bilog na kalag na pagkamoot sa Dios paagi sa satong ministeryo. (1 Cor. 13:13) Mantang kita marikas na paparani sa panahon na mapapakangbanal na sa katapustapusi an ngaran ni Jehova, logod na ‘an satong pagkamoot paorog nang paorog na umabunda.’—Fil. 1:9; Mat. 22:36-38.