Mapagngayongayong Paghorophorop—Kaipuhan kan Maigot na mga Ministro
1. Ano an nakatabang ki Jesus na dai ikarayo an saiyang atension sa pangenot na gibohon nia?
1 Ginamit ni Jesus an banggi sa pagpaomay sa mga tawo asin pagpaluwas nin mga demonyo. Kan sia manompongan kan saiyang mga disipulo kan sunod na aldaw, sinda nagsabi: “An gabos naghaharanap sa saimo,” na dinadagka sia na ipadagos an paggibo nia nin mga ngangalasan. Minsan siring, an atension ni Jesus dai ikakarayo sa saiyang pangenot na gibohon na paghuhulit kan maogmang bareta. Nagsimbag sia: “Magduman pa kita sa ibang lugar, sa saradit na banwaan sa harani, tanganing makapaghulit man ako duman, huli ta sa katuyohan na ini na ako napadigdi.” Ano an nakatabang ki Jesus na mapagdanay an saiyang pokus? Buminangon sia nin amay tanganing mamibi asin maghorophorop. (Mar. 1:32-39) Paano an mapagngayongayong paghorophorop makakatabang man sa sato na magin maigot na parahulit?
2. Ano an puede tang horophoropon tanganing makapagdanay kitang maigot sa ministeryo?
2 Ano an Hohorophoropon? Naheling ni Jesus na an mga tawo “naanitan asin nagkaralagalag siring sa mga karnero na mayong pastor.” (Mat. 9:36) Siring man, puede niatong isip-isipon kun gurano kaimportanteng madangog kan mga tawo an maogmang bareta. Puede niatong horophoropon an pagkaapurado kan panahon. (1 Cor. 7:29) Puede tang isip-isipon an mga gibo asin kualidad ni Jehova, an satong pribilehio na magin mga Saksi ni Jehova, asin an mahalagang marhay na espirituwal na kayamanan na nanodan niato sa Tataramon nin Dios na dai pa man giraray aram kan mga tawo sa satong teritoryo.—Sal. 77:11-13; Isa. 43:10-12; Mat. 13:52.
3. Noarin kita puedeng maghorophorop?
3 Noarin Mahorophorop? Arog ni Jesus, an nagkapira minabangon nin amay kun noarin toninong. Para sa iba, pinakamarahay na maghorophorop sa banggi bago magtorog. (Gen. 24:63) Dawa sibot, makakahanap kita nin panahon para sa paghorophorop. Ginigibo iyan nin nagkapira mantang nakasakay sa pampublikong mga lunadan. An iba ginagamit an pahingalo sa udto para sa toninong na paghorophorop. Naeeksperyensiahan nin dakol na an paghorophorop bago makikabtang sa ministeryo, dawa pira sanang minuto, nakakatabang sa sainda na maghulit nin mas maigot asin pusoan.
4. Taano ta maninigo kitang maghorophorop?
4 An mapagngayongayong paghorophorop magpapararom kan satong kamawotan na maglingkod ki Jehova, magpapaoswag kan satong espirituwal na pokus, asin magpapakosog kan satong determinasyon na padagos na maghulit. Si Jesus, an Pangenot na Ministro nin Dios, nakinabang sa paghorophorop, asin kita makikinabang man.