Tabang Para sa mga Pamilya
1. Paano nakinabang an mga pamilyang Israelita sa semanal na Sabbath?
1 An pag-otob kan Sabbath sarong mamomoton na probisyon ni Jehova na nagtaong pakinabang sa mga pamilya. An mga Israelita nagpapahingalo sa saindang regular na trabaho asin may panahon na horophoropon an karahayan ni Jehova saka an relasyon ninda sa saiya. Puedeng aprobetsaran kan mga magurang an oportunidad na ini tanganing ikatadom an Ley sa puso kan saindang mga aki. (Deut. 6:6, 7) An Sabbath nagtatao sa banwaan ni Jehova nin panahon kada semana na makapagkonsentrar sa espirituwalidad ninda.
2. Ano an itinotokdo sa sato kan Sabbath manongod ki Jehova?
2 Siempre, dai na hinahagad ni Jehova sa mga pamilya na otobon an Sabbath. Minsan siring, an ley na iyan may itinotokdo sa sato manongod sa satong Dios. Kaidto pa, sia pirmeng interesadong marhay sa espirituwal na kapakanan kan saiyang banwaan. (Isa. 48:17, 18) Ngonyan, an sarong paagi na ipinapahayag ni Jehova an mamomoton na interes na ini iyo an banggi nin Pampamilyang Pagsamba.
3. Ano an katuyohan kan banggi nin Pampamilyang Pagsamba?
3 Ano an Katuyohan kan Banggi nin Pampamilyang Pagsamba? Kan Enero 2009, an Pag-adal sa Libro kan Kongregasyon pinonan na gibohon sa iyo man sanang banggi na ginigibo an Teokratikong Paadalan sa Pagmiministro asin Pagtiripon sa Paglilingkod. An sarong katuyohan kan pagliliwat na ini iyo na tawan an mga pamilya nin oportunidad na pasarigon an saindang espirituwalidad paagi sa pag-iskedyul nin espesipikong banggi serosemana para sa pampamilyang pagsamba. Dinagka an kada pamilya na ibalyo an saindang pampamilyang pag-adal sa banggi na dating para sa pag-adal sa libro, kun praktikal, asin gamiton an panahon na ini para sa dai naghihidaling pag-orolay saka pag-adal sa Biblia na ibinabagay sa pangangaipo kan pamilya.
4. Dapat daw na limitaran kan pamilya sa sarong oras an Pampamilyang Pagsamba ninda? Ipaliwanag.
4 Tanganing makaatender sa Pag-adal sa Libro kan Kongregasyon, kaipuhan niato kaidto nin panahon na magsangli, magbiahe, asin iba pa. Para sa dakol sa sato, dakulang kabtang kan banggi an nagagamit niato kaidto para sa sarong oras na pagtiripon na ini. Huli sa pagliwat kan satong iskedyul nin pagtiripon, magagamit na niato an bangging ini tanganing sambahon si Jehova bilang sarong pamilya. Kun siring, dai niato kaipuhan na limitaran sa saro sanang oras an satong banggi nin Pampamilyang Pagsamba. Imbes, maninigo niatong pag-isipan an pangangaipo saka limitasyon kan satong pamilya asin determinaran an panahon na kaipuhan.
5. An Pampamilyang Pagsamba daw dapat na panggrupong pag-orolay gabos? Ipaliwanag.
5 Iyan daw Dapat na Panggrupong Pag-orolay Gabos? Kun an mga mag-agom asin mga pamilyang may mga aki iribang nag-oorolay dapit sa mga topikong sono sa Kasuratan, napaparigon ninda an boot kan lambang saro. (Roma 1:12) Nagigin mas dayupot an pamilya. Kun siring, an pag-orolay na nakabasar sa Kasuratan iyo an maninigong magin pinakamahalaga sa banggi nin Pampamilyang Pagsamba. Minsan siring, puede man na personal na mag-adal an kada miembro kan pamilya. Halimbawa, pagkatapos kan panggrupong pag-orolay, puedeng magdanay na iribanan an pamilya mantang an kada saro padagos pang nag-aadal nin kanya-kanya, na tibaad tinatapos an pag-andam para sa pagtiripon o binabasa an mga magasin. Nagdesisyon an nagkapirang pamilya na dai bukasan an telebisyon sa bilog na banggi.
6. Paano puedeng gibohon an pag-orolay?
6 Paano Puedeng Gibohon an Pag-orolay? Dai man kaipuhan na hapot-simbagan na sana pirme. Tanganing magin buhay asin interesante an banggi nin Pampamilyang Pagsamba, dakol na pamilya an may programang arog kan midweek meeting niato. Binabaranga ninda iyan sa nagkapirang kabtang asin ginigibo iyan sa manlaenlaen na paagi. Halimbawa, puede sindang iribang magbasa sa Biblia, mag-andam para sa sarong kabtang kan mga pagtiripon, asin mag-ensayo para sa ministeryo. May nagkapirang suhestion sa pahina 6.
7. Anong kamugtakan an maninigong pagmaigotan kan mga magurang?
7 Anong Kamugtakan an Maninigong Pagmaigotan kan mga Magurang? Lubos na makakanood an saindong pamilya sa may pagkamoot asin relaks na kamugtakan. Kun beses, puede kamong mag-adal sa luwas kun marahay an panahon. Dai mag-alangan na mag-break nguna kun kaipuhan. An nagkapirang pamilya nagmimirindal pagkatapos kan programa. Minsan ngani lilikayan kan mga magurang na gamiton an Pampamilyang Pagsamba tanganing mang-anggot o magtao nin disiplina, tibaad kaipuhan nindang gamiton an ibang oras kaiyan tanganing tawan nin atension an sarong espesipikong tendensia o problema na narisa ninda. Minsan siring, an sensitibong personal na mga isyu tibaad pinakamarahay na pribadong ipakipag-olay sa aki sa ibang panahon durante kan semana tanganing dai sia mapasupog sa mga tugang nia. An Pampamilyang Pagsamba dai dapat magin mabublay asin sobra kaseryoso kundi dapat mabanaag dian an maogmang Dios na sinasamba ta.—1 Tim. 1:11.
8, 9. Anong pag-andam an kaipuhan na gibohon kan mga payo nin pamilya?
8 Paano Puedeng Mag-andam an Payo kan Pamilya? An pamilya lubos na makikinabang kun an payo kan pamilya nag-aandam nin patienot para sa kada banggi nin Pampamilyang Pagsamba paagi sa pagpili kun ano an maninigong pag-olayan asin kun paano iyan pag-oolayan sa pinakamarahay na paagi. (Tal. 21:5) Marahay na konsultahon kan lalaki an saiyang agom mapadapit digdi. (Tal. 15:22) Kamong mga payo nin pamilya, taano ta dai maghagad nin suhestion kun minsan sa mga aki nindo? Kun gigibohon nindo iyan, maaaraman nanggad nindo an saindang mga pinagkakainteresan asin ikinakahadit.
9 Sa kadaklan na semana, an payo nin pamilya dai kaipuhan na mag-andam nin haloy. Posibleng marhay na maoogma an pamilya sa pagkaigwa nin nagkapirang regular na tampok serosemana, asin dai kaipuhan na pirmeng bagohon kan payo nin pamilya an bilog na programa. Tibaad maheling nia na may bentaha kun mag-aandam sia pagkatapos kan kada pag-adal mantang presko pa sa isip nia an espirituwal na pangangaipo kan saiyang pamilya. An nagkapirang payo nin pamilya naggigibo nin halipot na lista nin mga pag-oolayan dangan ibinubugtak iyan sa lugar na madaling maheheling kan gabos, arog kan repridyeretor. Huli kaiyan, gaganahan an pamilya saka aantisiparon ninda an Pampamilyang Pagsamba asin makakapag-andam man sinda kun kaipuhan.
10. Paano puedeng gamiton kan mga nagsosolo an saindang banggi nin Pampamilyang Pagsamba?
10 Paano Kun Solo Sana Ako? An mga nagsosolo puedeng gamiton an banggi nin Pampamilyang Pagsamba sa personal na pag-adal. An sarong marahay na pundamental na programa nin personal na pag-adal maninigong igwa nin pagbasa sa Biblia, pag-andam para sa mga pagtiripon, asin pagbasa kan An Torrengbantayan asin Awake! An nagkapirang parahayag dinadagdagan ini nin proyekto sa personal na pag-adal. Kun beses, tibaad gusto nindang imbitaran an saro pang parahayag o pamilya tanganing ibanan sinda sa nakakapakosog na orolay dapit sa Kasuratan.
11, 12. Ano an nagkapira sa mga pakinabang kan pagkaigwa nin regular na banggi nin Pampamilyang Pagsamba?
11 Ano an mga Pakinabang kan Pagkaigwa nin Regular na Banggi nin Pampamilyang Pagsamba? An mga bilog na pusong nakikikabtang sa tunay na pagsamba orog na napaparani ki Jehova. Saro pa, mas nagigin dayupot an pamilya na iribang nagsasamba. An sarong mag-agom nagsurat mapadapit sa mga bendisyon na nakamtan ninda: “Bilang mag-agom na payunir na mayong aki, talagang inaantisipar mi an samong banggi nin Pampamilyang Pagsamba. Namamate mi na orog kaming napaparani sa kada saro asin sa satong langitnon na Ama. Ngonyan, pagmata mi sa aldaw na iiniskedyul ming mag-adal na ibanan, sinasabi mi sa kada saro: ‘Aram mo kun anong gigibohon ta atyan na banggi? Pampamilyang Pagsamba!’”
12 An areglo na magkaigwa nin banggi para sa pampamilyang pagsamba nakakatabang man sa sibot na mga pamilya. An sarong nagsosolong ina na regular payunir asin may pinapadakulang duwang aking lalaki nagsurat: “Kaidto, napabayaan mi an samong pampamilyang pag-adal. Iyan bakong regular asin pabarobago huling pagal ako. Dai ko talaga aram kun paano iyan tatawan nin lugar. Kaya nagsurat po ako sa saindo tanganing magpasalamat nanggad na marhay huli sa banggi nin Pampamilyang Pagsamba. Mapanggana ming nagigibo nin regular an pampamilyang pag-adal asin nakakamtan mi an mga pakinabang.”
13. Sa ano nakadepende an pakinabang kan pamilya nindo sa areglong ini?
13 Arog kan Sabbath, an banggi nin Pampamilyang Pagsamba sarong balaog hale sa satong langitnon na Ama na makakatabang sa mga pamilya. (Sant. 1:17) An espirituwal na pakinabang nin mga pamilyang Israelita nakadepende sa paagi nin paggamit ninda kan Sabbath. Siring man, an pakinabang kan satong pamilya nakadepende sa kun paano niato ginagamit an areglo na banggi para sa pampamilyang pagsamba. (2 Cor. 9:6; Gal. 6:7, 8; Col. 3:23, 24) Paagi sa pag-aprobetsar sa areglong ini, an saindong pamilya makakapagsabi arog kan salmista: “Alagad kun para sa sako, an pagrani sa Dios marahay para sa sako. An Soberanong Kagurangnan na Jehova an ginibo kong pailihan ko.”—Sal. 73:28.
[Blurb sa pahina 5]
An Pampamilyang Pagsamba dai dapat magin mabublay asin sobra kaseryoso kundi dapat mabanaag dian an maogmang Dios na sinasamba ta
[Kahon sa pahina 6]
INGATAN
Nagkapirang Ideya Para sa Banggi nin Pampamilyang Pagsamba
Biblia:
• Iribang magbasa nin sarong kabtang kan semanal na babasahon sa Biblia. Kun an babasahon may mga pag-oolay, puedeng ipabasa sa saro an salaysay, dangan babasahon kan iba pa an sinabi nin manlaenlaen na karakter.
• Iakto an sarong kabtang kan babasahon sa Biblia.
• Patienot na ipabasa sa kada miembro kan pamilya an designadong mga kapitulo kan Biblia asin ipasurat an saro o duwang hapot nia dapit sa binasa. Dangan iribang siyasaton an mga hapot kan gabos.
• Kada semana, mag-andam nin flash card na may teksto sa Biblia asin hingoahon na tuomon iyan saka ipaliwanag. Tiponon an mga card, asin repasohon iyan serosemana tanganing maaraman kun pirang teksto an nagigirumdoman nindo.
• Magdangog nin rekording sa audio kan pagbasa sa Biblia mantang sinusubaybayan iyan sa Biblia.
Mga Pagtiripon:
• Iribang mag-andam para sa sarong kabtang kan mga pagtiripon.
• Ensayohon an mga awit na pang-Kahadean na iiniskedyul para sa maabot na semana.
• Kun an saro may kabtang sa Teokratikong Paadalan sa Pagmiministro o demonstrasyon sa Pagtiripon sa Paglilingkod, pag-olayan an mga ideya dapit sa pagpresentar kaiyan o ensayohon iyan sa atubangan kan pamilya.
Pangangaipo kan Pamilya:
• Pumili nin mapag-oolayan sa librong Young People Ask o Makanood sa Dakulang Paratokdo.
• Mag-ensayo kun paano aatubangon an sarong situwasyon na posibleng marhay na mangyari sa eskuelahan.
• Mag-ensayo na iinaakto nin mga aki an papel nin mga magurang. An mga aki masiyasat nin sarong tema dangan mangangatanosan sa mga magurang.
Ministeryo:
• Magkaigwa nin mga pag-ensayo bilang pag-andam nin mga presentasyon para sa katapusan kan semana.
• Pag-olayan an realistikong mga pasohan na puede sa pamilya tanganing pahiwason an pakikikabtang ninda sa ministeryo durante kan panahon nin Memorial o bakasyon.
• Tawan nin pirang minuto an kada miembro kan pamilya na magsiyasat kun paano sisimbagon an manlaenlaen na hapot na tibaad ihapot sa sainda sa ministeryo, dangan magkaigwa nin mga pag-ensayo.
Dagdag na mga Suhestion:
• Iribang basahon an sarong artikulo hale sa bagong mga magasin.
• Ipabasa nin patienot sa kada miembro kan pamilya an sarong artikulo sa bagong mga magasin na nakapukaw kan interes nia, dangan ipareport iyan sa saiya.
• Imbitaran kun beses an sarong parahayag o mag-agom na ibanan kamo sa saindong banggi nin Pampamilyang Pagsamba, asin puede nindo sindang interbiohon.
• Dalanon asin pag-olayan an saro sa satong mga video.
• Iribang pag-olayan an “Young People Ask” o “For Family Review” na yaon sa Awake!
• Iribang pag-olayan an “Tokdoan an Saindong mga Aki” o “Para sa mga Hoben” na yaon sa An Torrengbantayan.
• Basahon asin pag-olayan an sarong kabtang kan bagong Yearbook o sarong bagong publikasyon na ilinuwas kan nakaaging pandistritong kombension.
• Pakaatender nin kombension o asamblea, repasohon an mga tampok kaiyan.
• Obserbaran mismo an mga linalang ni Jehova, asin pag-olayan kun ano an itinotokdo kaiyan sa sato manongod ki Jehova.
• Iribang gibohon an sarong proyekto, arog nin sadit na representasyon, mapa, o tsart.