An Librong “Bearing Thorough Witness” About God’s Kingdom
1. Ano an pag-aadalan sa Pag-adal sa Biblia kan Kongregasyon poon sa semana nin Marso 14?
1 Durante kan semana nin Marso 14, 2011, poponan na pag-adalan nin mga kongregasyon na Cebuano, Hiligaynon, Iloko, asin Tagalog an “Bearing Thorough Witness” About God’s Kingdom sa Pag-adal sa Biblia kan Kongregasyon. (Mangnohon: Pag-aadalan kan mga kongregasyon na Bicol, Pangasinan, asin Waray-Waray an librong Rumani ki Jehova siring kan ipinaisi sa An Satong Ministeryo sa Kahadean na Nobyembre.) Ipinapaliwanag kan publikasyon na ini an libro nin Gibo sa paaging mamamatean kan nagbabasa an kaogmahan sa marikas na dalagan kan mga pangyayaring nakarekord dian. Imbes na bersikulo-por-bersikulong komentaryo, an librong Bearing Witness nagtatampok nin mga leksion hale sa mga pagkasaysay sa Gibo asin nakakatabang na masabotan kun paano iyan personal na ikakaaplikar.—Roma 15:4.
2. Ipaliwanag an nagkapira sa mga kabtang kan librong Bearing Witness.
2 Mga Kabtang kan Libro: An introduksion sa pahina 2 sarong maogmang surat hale sa Namamahalang Grupo na nagpapahayag kun gurano an pagmawot ninda na makinabang kita sa publikasyon na ini. Poon sa kapitulo 2, sinasambit an pinakatema kan kada kapitulo, asin igwa iyan nin teksto na nagsasabi kun arin na kabtang kan Gibo an totokaron. Dakol sa mga kapitulo an may nakakapagtokdong mga kahon na nagtatao nin impormasyon manongod sa mga tawo, lugar, o pangyayari. May mahiwas na espasyo sa gilid kan pahina na puedeng suratan nin mga nota. An bilog na libro pano nin detalyadong mga ilustrasyon kan mga eksena sa Biblia tanganing tabangan kita na ikaladawan sa isip an mahahalagang pangyayari, asin sa huring pahina igwa nin nakakatabang na indise nin mga ilustrasyon na nagpapaliwanag kun ano an ilinaladawan sa manlaenlaen na retrato. Sa likod kan mag-ibong na tutob, igwa nin mga mapa tanganing tabangan kitang masubaybayan an mga lugar na dinumanan kan satong mga kapwa parasamba kan enot na siglo mantang pinoponan nindang palakopon an maogmang bareta “sagkod sa kaporoporohi kan daga.”—Gibo 1:8.
3. Anong mahahalagang hapot an sisimbagon kan pag-adal sa libro nin Gibo?
3 Mga Simbag sa Mahahalagang Hapot: An pag-adal sa libro nin Gibo nakakatabang na mabatid nin malinaw an simbag sa mahahalagang hapot manongod sa Kristianong ministeryo. Halimbawa, sa anong gibohon asin mensahe midbid an tunay na mga parasunod ni Jesu-Cristo? Siisay an nagdidirehir sa pambilog na kinaban na paghuhulit na ini, asin paano? An persekusyon asin pagkontra nagtatao sa mga ministro nin anong mga oportunidad? Ano an papel kan banal na espiritu sa satong ministeryo?
4. Paano kita lubos na makikinabang sa pag-adal niato kan publikasyon?
4 Tanganing lubos na makinabang, pag-andaman an pag-aadalan asin magkomento sa pag-adal kan kongregasyon. Atenderan an kada pagtiripon, asin horophoropon kun paano nindo ikakaaplikar an mga leksion na manonodan sa pag-adal niato.