An Pinakaimportanteng Kualidad nin Marahay na Paratokdo
1. Ano an pinakaimportanteng kualidad nin marahay na paratokdo?
1 Ano an nagpapangyari sa saro na magin marahay na paratokdo sa Biblia? Sekular na edukasyon? Eksperyensia? Natural na abilidad? An totoo, iyan an kualidad na iyo an kaotoban kan Ley, na nagpapamidbid sa mga disipulo ni Jesus, asin na iyo an pinakanangingibabaw asin pinakanakakaakit sa pangenot na mga kualidad ni Jehova. (Juan 13:35; Gal. 5:14; 1 Juan 4:8) Iyan iyo an pagkamoot. An marahay na mga paratokdo nagpapaheling nin pagkamoot.
2. Taano ta mahalagang marhay na mamotan niato an mga tawo?
2 Mamotan an mga Tawo: An Dakulang Paratokdo, si Jesus, nagpaheling nin pagkamoot sa mga tawo, asin ini an nagmotibar sa sainda na maghinanyog sa saiya. (Luc. 5:12, 13; Juan 13:1; 15:13) Kun kita nagmamakolog sa mga tawo, magpapatotoo kita sa gabos na oportunidad. An mga kaolangan na arog baga nin persekusyon asin pagkaindiperente dai makakadesganar sa sato. Mapaheling kita nin sinserong personal na interes sa mga hinuhulitan niato, asin ibabagay niato an satong pamamaagi oyon sa pinagkakainteresan ninda. Magigin andam kitang magtao nin panahon bako sana kun kaiba niato an lambang inaadalan sa Biblia kundi pati kun nag-aandam bago kan kada pag-adal.
3. Paano an pagkamoot sa mga katotoohan sa Biblia makakatabang sa sato sa ministeryo?
3 Mamotan an mga Katotoohan sa Biblia: Namotan man ni Jesus an mga katotoohan sa Biblia asin minansay nia iyan bilang mga kayamanan. (Mat. 13:52) Kun namomotan niato an katotoohan, mataram kita na may entusiasmo kaya maeengganyar an mga naghihinanyog sa sato. An siring na pagkamoot makakatabang sa sato na magkonsentrar sa mahalagang marhay na impormasyon na ipinapaabot niato imbes na sa personal na mga limitasyon niato, kaya puedeng dai kita gayong nerbioson sa ministeryo.
4. Paano kita makakapatalubo nin pagkamoot?
4 Pataluboon an Pagkamoot: Paano niato mapapatalubo an pagkamoot sa mga tawo? Paagi sa paghorophorop sa pagkamoot na ipinaheling ni Jehova asin kan saiyang Aki saka sa makamomondong kamugtakan sa espirituwal kan mga tawo sa teritoryo niato. (Mar. 6:34; 1 Juan 4:10, 11) Mas mararom an pagkamoot niato sa mga katotoohan sa Biblia paagi sa regular na personal na pag-adal asin paghorophorop. An pagkamoot sarong aspekto kan bunga kan espiritu. (Gal. 5:22) Kaya puede kitang makimaherak ki Jehova na logod tawan kita nin banal na espiritu asin tabangan kita na tumalubo sa pagkamoot. (Luc. 11:13; 1 Juan 5:14) Ano man an satong sekular na edukasyon, eksperyensia sa katotoohan, o natural na mga abilidad, puede kitang magin epektibong paratokdo sa Biblia paagi sa pagpaheling nin pagkamoot.