Gibuhon na Arugan an mga Propeta—Si Joel
1. Paano ta maaarog an kapakumbabaan ni Joel kun naghuhulit kita?
1 Siisay si propeta Joel? An sinabi niya sana iyo na siya an ‘aking lalaki ni Petuel.’ (Joel 1:1) An itinampok kan mapakumbabang propetang ini iyo an mensahe ni Jehova, bakong an saiyang papel bilang mensahero. Kaagid kaiyan, imbes na magmawot nin personal na kaumawan o pagmidbid, an itinatampok ta sa ministeryo iyo si Jehova asin an Bibliya. (1 Cor. 9:16; 2 Cor. 3:5) Napapakusog man kita kan mensaheng ipinapahayag ta. Anong mga aspekto kan hula ni Joel an magtatao sa sato nin kaigutan asin paglaom ngunyan?
2. An pagigin haranihon na kan aldaw ni Jehova dapat magmotibar sa sato na gibuhon an ano?
2 ‘Harani Na an Aldaw ni Jehova.’ (Joel 1:15): Minsan ngani rinibong taon na an nakaagi kan isurat an mga tataramon na ini, nabubuhay na kita sa panahon kan pangultimong kautuban kan mga ini. An naggagrabeng kamugtakan sa kinaban asin kawaran nin interes saka pagtuya na naeeksperyensiyahan ta sa teritoryo malinaw na katunayan na nagdatong na an huring mga aldaw kan maraot na sistemang ini nin mga bagay. (2 Tim. 3:1-5; 2 Ped. 3:3, 4) Pag hinuhurop-hurop ta na haranihon na an katapusan, igwa kita kan gabos na dahilan na inuton sa satong buhay an ministeryo.—2 Ped. 3:11, 12.
3. Taano ta nangurugnang mahalaga an ministeryo mantang nagdadangadang an dakulang kahurasaan?
3 “Si Jehova Magigin Pailihan Para sa Saiyang Banwaan.” (Joel 3:16, NW): An pagkunog-kunog sa tekstong ini puwedeng umaplikar sana sa paghukom ni Jehova sa dakulang kahurasaan. Nararanga kita sa pakaaram na sa panahon na iyan ililigtas niya an maimbod niyang mga lingkod. (Kap. 7:9, 14) Mantang kita naghuhulit asin naeeksperyensiyahan ta kun paano niya kita sinususteniran saka pinapakusog, nagkakaigwa kita nin pagtubod asin pakatagal na makakatabang sa sato sa maabot na dakulang kahurasaan.
4. Taano ta makakapaggaya-gaya kita asin maaatubang nin may kumpiyansa an mangyayari sa ngapit?
4 Dawa ngani para sa iba nakakatakot an mensahe ni Joel, nagtatao iyan nin mamuraway na paglaom nin kaligtasan sa banwaan nin Diyos. (Joel 2:32) Kaya, may kumpiyansa tang atubangon an mangyayari sa ngapit asin maigot na ibalangibog an maugmang bareta kan Kahadian mantang hinihimati ta an sabi sa Joel 2:23: ‘Mag-ugma asin maggaya-gaya kamo ki Jehova na saindong Diyos.’