Gibuhon na Arugan an mga Propeta—Si Habacuc

1. Taano ta nasasabutan ta an namamatian ni propeta Habacuc?

¹ Mantang nagdadakul an karatan sa kinaban na kinabubuhayan ta, tibaad magin arog man kita ni Habacuc, na naghapot ki Jehova: “Taano ta ipinapahiling mo sa sako an maraot na mga gibo? Asin taano ta tinutugutan mo an pang-aapi?” (Hab. 1:3, NW; 2 Tim. 3:1, 13) An paghurop-hurop sa mensahe asin kaimbudan ni Habacuc matabang sa sato na makatagal mantang hinahalat an aldaw nin paghukom ni Jehova.—2 Ped. 3:7.

2. Paano ta maipapahiling na nabubuhay kita ngunyan huli sa pagtubod?

² Mabuhay Huli sa Pagtubod: Imbes na madisganar, nagdanay na alisto asin aktibo sa espirituwal si Habacuc. (Hab. 2:1) Siniyerto ni Jehova sa propeta na an Saiyang tataramon mauutob sa tamang panahon asin na ‘an [matanos] sa saiyang pagtubod mabubuhay.’ (Hab. 2:2-4) Ano an kahulugan kaiyan para sa mga Kristiyano na nabubuhay sa panahon na ini kan katapusan? Bakong mahalaga na maaraman ta kun nuarin maabot an katapusan, an mas mahalaga kumbinsido kita na maabot iyan. An pagtubod mapahiro sa sato na magin mapagbantay asin magin priyoridad an ministeryo.—Heb. 10:38, 39.

3. Taano ta dapat niyatong papagdanayon an satong kaugmahan sa paglilingkod ki Jehova?

³ Mag-ugma ki Jehova: Pag sinalakay na kan Gog nin Magog an banwaan ni Jehova, mababalo an satong pagtubod. (Ezeq. 38:2, 10-12) An giyera nagdadara nin kasakitan, maski duman sa mga nanggagana. Puwedeng magkulang an kakanon, mawara an pagsasadiri, asin magin masakit an pagbuhay. Kun mangyari iyan, ano an gigibuhon ta? Aram ni Habacuc na maagi siya nin mga kasakitan, pero determinado siyang papagdanayon an saiyang kaugmahan sa paglilingkod ki Jehova. (Hab. 3:16-19) ‘An kaugmahan [na itinatao] ni Jehova’ matabang man sa sato na tagalan an maabot na mga kasakitan.—Neh. 8:10; Heb. 12:2.

4. Anong kaugmahan an makakamtan ta ngunyan asin sa maabot na panahon?

⁴ An mga ililigtas ni Jehova sagkod sa aldaw nin paghukom niya padagos na makakanuod sa mga katukduan nin Diyos. (Hab. 2:14) Tutukduan man dapit ki Jehova an mga bubuhayon liwat. Kaya ngunyan pa lang, lugod na gamiton ta an gabos na oportunidad na ipakipag-ulay sa iba an manungod ki Jehova asin an saiyang makangangalas na mga gibo!—Sal. 34:1; 71:17.