Gurano Kakusog an Saimong Pagtubod sa mga Panuga ni Jehova?

Pinatunayan ni Josue asin Solomon na mayo ni sarong tataramon ni Jehova an dai nagkatotoo. (Jos 23:14; 1Ha 8:56) An patotoo kan duwang masasarigan na saksing ini nakakadagdag sa matibay na pundasyon kun sain nakabasar an satong pagtubod.—2Co 13:1; Tit 1:2.

Paano inutob ni Jehova an saiyang mga panuga kan panahon ni Josue? Kaiba an saimong pamilya, hilingon an video drama na ‘Mayo Ni Sarong Tataramon an Dai Nagkatotoo.’ Dangan pag-ulayan an minasunod na mga hapot: (1) Paano mo maaarog an pagtubod na ipinahiling ni Rahab? (Heb 11:31; San 2:24-26) (2) Paano pinapatunayan kan halimbawa ni Acan na an tuyong pagsuway minaresulta sa kapahamakan? (3) Dawa ngani mga parapakilaban an mga lalaki kan Gibeon, taano ta dinaya ninda si Josue asin nakipagkatuninungan sa Israel? (4) Paano nagkatotoo an sinabi ni Jehova kan an limang hading Amorita naghuma na sasalakayon an Israel? (Jos 10:5-14) (5) Paano ka tinabangan ni Jehova mantang iniinot mo sa saimong buhay an Kahadian nin Diyos asin an saiyang katanusan?—Mat 6:33.

Mantang hinuhurop-hurop ta an gabos na bagay na ginibo, ginigibo, asin gigibuhon pa ni Jehova, mas makusog an satong pagtubod sa saiyang mga panuga.—Ro 8:31, 32.