PAMUMUHAY BILANG KRISTIYANO
Ikaugma an Paghuhulit kan Maugmang Bareta
May beses daw na nadidipisilan kang maghulit? Dakul sa sato an masimbag nin iyo. Taano? Tibaad parati tang naeeksperyensiyahan an kawaran nin interes o pagkontra kan mga tawo sa satong teritoryo o kaya natatakot kitang makipag-ulay sa mga dai ta bisto. Iyo, huli sa mga ini puwedeng mabawasan an satong kaugmahan. Pero, an Diyos na satong sinasamba sarong maugmang Diyos asin gusto niyang magin maugma kita sa paglilingkod sa saiya. (Sal 100:2; 1Ti 1:11) Ano an tulong marahay na dahilan para ikaugma an paghuhulit?
Inot, sarong mensahe nin paglaom an ihinuhulit niyato. Baga man dakul sa ngunyan an nawawaran na nin paglaom, puwede tang ibugtak sa puso nin mga tawo an “maugmang bareta dapit sa bagay na urog karahay.” (Isa 52:7, NW ) Asin kita mismo nagkakaigwa man nin kaugmahan huli sa maugmang bareta kan Kahadian nin Diyos. Bago maghulit, hurop-hurupon an mga bendisyon na papangyarihon kan Kahadian nin Diyos sa daga.
Ikaduwa, an maugmang bareta na ihinuhulit ta nakakatabang sa mga tawo na magbago sa pisikal asin sa espirituwal. Binayaan ninda an nakakaraot na mga gibo asin nagkaigwa sinda nin paglaom na mabuhay nin daing katapusan. (Isa 48:17, 18; Ro 1:16) Garo kita mga rescuer sa sarong search-and-rescue operation. Dawa ngani may mga habong magpatabang, padagos niyatong hinahanap an mga tawong gustong makaligtas.—Mat 10:11-14.
An ikatulo asin pinakamahalaga, nagtataong onra ki Jehova an satong paghuhulit. Pinapahalagahan niyang marhay an satong gibuhon. (Isa 43:10; Heb 6:10) Dugang pa, bukas-palad niyang itinatao an saiyang banal na espiritu para mautob an gibuhon na ini. Kaya, mamibi ki Jehova para sa kaugmahan, na saro sa mga aspekto kan bunga kan banal na espiritu. (Ga 5:22) Sa tabang ni Jehova, mapapangganahan ta an mga kahaditan asin makakapaghulit kita nin may kusog nin buot. (Gi 4:31) Sa siring, ano man an magin reaksiyon kan mga tawo sa satong teritoryo, ikakaugma ta nanggad an satong asignasyon na maghulit.—Eze 3:3.
Arin digdi an gusto mong magin atitud pag nasa ministeryo? Paano mo ipapahiling an kaugmahan sa ministeryo?
HILINGON AN VIDEO NA IBALIK AN KAUGMAHAN PAAGI SA PAG-ADAL ASIN PAGHUROP-HUROP, DANGAN SIMBAGON AN MINASUNOD NA MGA HAPOT:
Taano ta dapat na magin priyoridad niyato an satong rutina nin pag-adal, dawa dakul na oras kitang naghuhulit kada bulan?
Sa anong paagi puwede tang maarog si Mary?
Ano an iskedyul mo sa paghurop-hurop kan Tataramon nin Diyos?
Ano an ikinakaugma mo sa paghuhulit kan maugmang bareta?