Nagkamit Ako nin Dakul na Bendisyon Dahil sa Pag-arog sa Marahay na mga Halimbawa

Ipinangaki ako sa Quebec City, Canada, sa probinsiya nin Quebec na French an lengguwahe. Padangaton ako kan mga magurang kong si Louis saka Zélia. Bakong paragirong si Tatay saka mahilig siyang magbasa. Gustong-gusto ko an pagsurat asin pangarap kong magin journalist.

Kan mga dose anyos na ako, nagdalaw sa harong an dating katrabaho ni Tatay na si Rodolphe Soucy kaiba an amigo kaini. Mga Saksi ni Jehova sinda. Dikit lang an aram ko sa mga Saksi saka dai ako interesado partikular na sa relihiyon ninda. Pero, naghanga ako sa lohikal na pagsimbag ninda sa mga hapot mi gamit an Bibliya. Naghanga man an mga magurang ko, kaya inako mi an alok nindang pag-adal sa Bibliya.

Kan panahon na iyan, nag-eeskuwela ako sa sarong Catholic school. Paminsan-minsan nakikipag-ulay ako sa mga kaklase ko manungod sa mga nanunudan ko sa pag-Bible study. Pag-abot nin panahon naaraman iyan kan mga maestro na mga padi man. Imbes na gamiton an Kasuratan tanganing patunayan na sala an sinasabi ko, an saro sainda sinahutan ako sa atubangan kan bilog na klase na rebolusyonaryo daa ako! Dawa nakaka-stress, nagin bendisyon an komprontasyon na iyan huling nakatabang iyan sako na marealisar na an mga katukduan sa relihiyon kan eskuwelahan na iyan bakong kauyon kan sinasabi kan Bibliya. Narealisar ko na dai na ako dapat magklase duman. Kaya tinugutan ako kan mga magurang ko na maglipat sa ibang eskuwelahan.

NANUDAN KONG KAMUTAN AN MINISTERYO

Nagpadagos ako sa pag-adal kan Bibliya, pero maluway an pag-uswag ko sa espirituwal huling natatakot akong magharong-harong. Maimpluwensiyang marhay an Iglesya Katolika saka kontrang marhay iyan sa satong gibuhon na paghuhulit. Si Maurice Duplessis, an premier kan Quebec, dayupot na kaalyadong pulitiko kan simbahan. Sa suporta niya, may mga grupo na riniribok asin inaatake pa ngani an mga Saksi. Talagang kaipuhan na makusugon an buot mo para makapaghulit kaidto.

An nagtabang sako na madaog an takot ko iyo si Brother John Rae, na naggradwar sa ikasiyam na klase kan Gilead School. Eksperyensiyadong marhay si John, pero mabuot siya, mapakumbaba, saka madaling dulukon. Bihira niya lang akong tawan nin direktang konseho, pero nakanuod akong marhay sa marahay na halimbawa niya. Nasasakitan si John na mag-French, kaya parati ko siyang iniibanan sa ministeryo asin tinatabangan sa lengguwahe. An pag-iba ko ki John nakatabang sako na manindugan na man giraray nin may pagkapusuan para sa katotoohan. Pakalihis nin sampulong taon puon kan inot akong makaulay kan mga Saksi, nagpabawtismo ako kan Mayo 26, 1951.

Mga payunir an kadaklan sa mga tugang sa sadit ming kongregasyon sa Quebec City. An marahay na impluwensiya ninda nakamotibar sa sako na magpayunir. Kaidto, Bibliya sana an gamit mi sa pagharong-harong. Mayong literatura kaya kaipuhan ming gamiton an Kasuratan sa mas epektibong paagi. Dahil kaiyan, pinagmaigutan kong magin pamilyar sa mga teksto para maidepensa an katotoohan. Dawa arog kaiyan, dakul an nagsayumang magbasa maski nin Bibliya kun mayo iyan kan imprimatur, o opisyal na pag-aprubar, kan Iglesya Katolika.

Kan 1952, nagpakasal kami ni Simone Patry, na sarong maimbod na sister sa kongregasyon mi. Naglipat kami sa Montreal, asin sa laog nin sarong taon, binendisyunan kami nin sarong aking babayi, si Lise. Nagpundo ako sa pagpayunir dai nahaloy bago kami ikasal, pero hininguwa mi ni Simone na pagdanayon na simple an samong pamumuhay tanganing lubos kaming makikabtang sa mga aktibidad sa kongregasyon bilang pamilya.

Pakalihis nin sampulong taon, pinag-isipan ko giraray na marhay an manungod sa pagpahiwas kan sakong ministeryo. Kan 1962, mantang nagkaklase sa sarong bulan na Pang-Kahadian na Paadalan sa Pagmiministro para sa mga elder na ginibo sa Bethel sa Canada, nagin roommate ko si Brother Camille Ouellette. Naghanga talaga ako sa kaigutan ni Camille sa ministeryo—lalo na ta pamilyado siya. Kan panahon na idto sa Quebec, bihiraon an magurang na nagpapayunir mantang nagpapadakula nin aki; pero, iyan an pasuhan ni Camille. Kan panahon na magkaibanan kami, dinagka niya ako na pag-isipan an sitwasyon ko. Pakalihis sana nin pirang bulan, narealisar ko na kaya kong maglingkod giraray bilang regular payunir. May mga nagkuwestiyon sa desisyon ko, pero nagpadagos ako, huling nagtitiwala ako ki Jehova na bebendisyunan niya an mga paghihinguwa ko na urog na makikabtang sa ministeryo.

NAGBALIK SA QUEBEC CITY BILANG MGA ESPESYAL PAYUNIR

Kan 1964, inasignaran kami ni Simone na maglingkod bilang mga espesyal payunir sa Quebec City, an ginikanan ming banwaan, asin naglingkod kami diyan sa laog nin nagkapirang taon. Kan panahon na iyan, nagrahay na an sitwasyon sa paghuhulit, pero napaatubang pa man giraray kami sa pagkontra.

Sarong Sabadong hapon, inaresto ako sa Sainte-Marie, sarong sadit na banwa harani sa Quebec City. Dinara ako nin sarong pulis sa saindang istasyon dangan iprineso ako huli ta nagharong-harong ako na mayong permit. Dai nahaloy, dinara ako sa sarong huwes na an pangaran Baillargeon, na nakakatakot an presensiya. Hinapot niya ako kun siisay an magigin abogado ko. Kan sabihon kong si Glen How,a sarong midbid na Saksing abogado, natakot siya asin makusog na sinabi: “Pambihira! Ano ta siya?” Bistado kaya kaidto si Glen How bilang sarong matibay na abogado na nagtatabang sa legal na pagdepensa sa mga Saksi. Dai nahaloy, sinabi kan korte na ibinasura na an mga akusasyon sako.

An pagkontra sa samong gibuhon sa Quebec nakapadipisil man samo na makahanap nin maaarkilahan para sa mga pagtiripon. An samong sadit na kongregasyon nagtitiripon sana sa sarong lumang garahe na mayong heater. Para magkaigwa maski paano nin init pag tiglipot, naggagamit nin oil heater an mga tugang. Sa parati nag-iiristoryahan kami sa palibot kaiyan mga pirang oras bago an mga pagtiripon para magpakinurusog-kusugan paagi sa samong mga eksperyensiya.

Talagang nakakaugmang mahiling an marahay na mga resulta kan gibuhon na paghuhulit sa paglihis nin mga taon. Kan dekada nin 1960, igwa sana nin pirang saradit na kongregasyon sa bilog na Quebec City, Côte-Nord, asin Gaspé Peninsula. Ngunyan, igwa na nin dakulang bilang nin mga tugang sa mga lugar na iyan, asin an mga tugang nagtitiripon sa magagayon na Kingdom Hall.

IMBITASYON PARA MAGLINGKOD BILANG NAGBIBIYAHENG PARAATAMAN

Kan 1970, inimbitaran kami ni Simone na maglingkod sa pansirkitong gibuhon. Dangan kan 1973, iinasignar kami sa pandistritong gibuhon. Sa mga taon na iyan, nakanuod akong marhay sa may kakayahan na mga brother arog ni Laurier Saumurb asin David Splane,c na parehong naglingkod bilang nagbibiyaheng paraataman. Pagkatapos kan kada asembleya, ako saka si David nagtatao nin suhestiyon sa lambang saro kun paano mi mapapauswag an samong pagtutukdo. Nagirumduman ko sarong beses kan sabihon sako ni David: “Nagustuhan ko su huri mong pahayag Léonce. Magayon, pero mga tulong pahayag na an magigibo ko sa arog kaidto kadakul na materyal!” Parati kayang kadakul na impormasyon an iniiba ko kaidto sa mga pahayag ko. Kinaipuhan kong manudan na magpahayag na mas diretso sa punto.

An mga paraataman nin distrito tinawan kan responsabilidad na pakusugon an mga paraataman nin sirkito. Minsan siring, dakul na parahayag sa Quebec an midbid akong marhay. Sa parati, gusto nindang makaibanan ako sa pag-service pag nagdadalaw ako sa mga sirkito. Nakakaugma na makaibanan sa ministeryo an mga tugang, alagad kulang an naitatao kong panahon sa paraataman nin sirkito. Sa sarong pagkakataon, mamumuton sakong ipinagirumdom nin sarong paraataman nin sirkito: “Ayos man po na tinatawan mo nin panahon an mga tugang, pero dai mo lugod malingawan na ako an dinadalaw mo digdi. Kaipuhan ko man nin pampakusog!” An mabuot na konsehong ini nakatabang sako na magin mas balanse.

Kan 1976, may nag-abot na dai inaasahan asin makamumundong marhay na pangyayari. An namumutan kong agom na si Simone, nagkahilang nin grabe dangan nagadan. Nagin marahayon siyang agom huli sa saiyang mapagsakripisyong espiritu asin pagkamuot ki Jehova. An pagdanay na sibot sa ministeryo nakatabang talaga sa sako na makayanan an pagkawara niya, asin nagpapasalamat ako ki Jehova sa mamumuton niyang pag-alalay sa masakit na panahon na iyan. Pag-abot nin panahon, nagpakasal kami ni Carolyn Elliott, sarong maigot na payunir na nagtataram nin Ingles na nagpa-Quebec para maglingkod kun sain dakula an pangangaipo. Madaling dulukon si Carolyn saka tunay an interes sa iba, lalo na sa mga masusupgon o sa mga nakakamating nagsosolo sinda. Nagi siyang dakulang bendisyon kan magin kaiba-iba ko siya sa paglilingkod bilang nagbibiyaheng paraataman.

SARONG MAHALAGANG MARHAY NA TAON

Kan Enero 1978, inasignaran ako na magin instruktor sa kainot-inuting Paadalan sa Paglilingkod Bilang Payunir sa Quebec. Grabe an nerbiyos ko lalo na ta dai pa man ako nakapag-adal diyan o nakahiling kan librong ginagamit sa paadalan. Marahay na sana ta dakul na eksperyensiyadong payunir an kaiba sa primerong klase na tinukduan ko. Ako an instruktor, pero dakulon akong nanudan sa mga estudyante!

Paghaloy-haloy kan 1978, ginibo sa Montreal Olympic Stadium an “Victorious Faith” na Internasyonal na Kumbensiyon. Iyan an pinakadakulang kumbensiyon na ginibo mi sa Quebec, na inatenderan nin labing 80,000. Inasignaran akong magtrabaho sa News Service Department kan kumbensiyon. Nakipag-ulay ako sa dakul na journalist asin naugma akong marhay sa gabos na positibong bareta kan media manungod sato. Labing 20 oras na interbiyu sa TV asin sa radyo an pigbrodkast, asin ginatos na artikulo an ipinublikar. Dakulaon nanggad na patotoo iyan!

PAGBALYO SA IBANG TERITORYO

Nagkaigwa nin dakulang pagbabago sa buhay ko kan 1996. Naglingkod ako sa Quebec na French an lengguwahe puon kan mabawtismuhan ako, dangan iinasignar ako sa sarong teritoryo sa Toronto na Ingles an lengguwahe. Inisip ko na dai ako kuwalipikado, saka natatakot akong marhay na magpahayag ta dai ako gayong tatao mag-Ingles. Kinaipuhan kong mamibi nin dakul na beses asin lubos na manarig ki Jehova.

Pag ginigirumdom ko iyan ngunyan, masasabi ko na nag-enjoy ako sa duwang taon na nakakaugmang paglilingkod mi sa Toronto. Mapasensiya akong tinabangan ni Carolyn na kumusog an buot sa pagtaram nin Ingles, asin grabe man an suporta saka pampakusog kan mga tugang. Nagkaigwa tulos kami nin dakul na bagong amigo.

Apuwera sa iba pang mga aktibidad asin preparasyon para sa pansirkitong asembleya sa puro kan semana, sa parati nakikikabtang ako sa pagharong-harong nin mga sarong oras pag Biyernes na banggi. Tibaad inisip kan iba, ‘Kinaagahan sibot-sibot na sa asembleya kaya ano ta ma-service pa?’ Pero para sako, nakakarelaks an pakikipag-ulay sa mga interesado pag nagmiministeryo. Dawa ngunyan, an pakikikabtang sa ministeryo pirmi sakong nagtatao nin kaugmahan.

Kan 1998, na-reassign kami ni Carolyn sa Montreal bilang espesyal payunir. Sa laog nin nagkapirang taon, kaiba sa asignasyon ko an pag-organisar nin espesyal na pagpapatotoo sa publiko asin pakikikoordinar sa news media tanganing itama an salang mga pakasabot kan mga tawo manungod sa mga Saksi ni Jehova. Ngunyan, maugma kami ni Carolyn na naghuhulit sa mga taga ibang nasyon na dai pa sana nahahaloy na magbalyo sa Canada asin na sa parati gustong-gustong urog pang makanuod manungod sa Bibliya.

Pag hinuhurop-hurop ko an nakaaging 68 taon ko bilang bawtisadong lingkod ni Jehova, namamatian ko talagang binendisyunan ako. Ikinakaugma kong marhay na nanudan kong ikaugma an paghuhulit asin na natabangan ko an dakul na maaraman an katotoohan. An aki kong babayi na si Lise saka an saiyang agom nagpuon na magregular payunir kan darakula na an mga aki ninda. Nakakapaugma sako na mahiling an saiyang dagos-dagos na kaigutan sa ministeryo. Nagpapasalamat ako lalo na sa mga kapwa ko Kristiyano na nagserbing marahay na halimbawa sako asin sa madunong nindang mga konseho na nakatabang sako na magin maygurang sa espirituwal saka maasikaso an manlain-lain kong teokratikong asignasyon. Nanudan ko na magigibo sana niyato an mga asignasyon na itinatao sa sato kun nananarig kita sa makapangyarihan na banal na espiritu ni Jehova. (Sal. 51:11) Padagos kong pinapasalamatan si Jehova huling tinawan niya ako kan mahalagang marhay na pribilehiyo na umawon an saiyang pangaran!—Sal. 54:6.