Taano ta Bakong Gabos na Pamibi Sinisimbag nin Diyos?
An Diyos na Jehova, na satong Ama sa langit, andam asin nauugma na dangugon an satong sinserong mga pamibi. Pero may mga bagay na puwedeng magin dahilan para dai niya simbagon an satong mga pamibi. Ano an mga bagay na ini, asin ano an dapat tang isaisip pag kita namimibi? Uni an nagkapirang giya hali sa Bibliya.
“Pag namimibi, dai nindo pagparauruutruhon an iyo man sanang mga tataramon.”—Mateo 6:7.
Habo ni Jehova na pagparauruutruhon ta an tinuom na mga pangadyi o basahon an mga iyan sa libro nin mga pangadyion. Imbes, an gusto niya magtaram kita hali sa puso. Pag-isipan kun ano an mamamatian mo kun an saro mong amigo aroaldaw na sanang pigpaparauruutro saimo an iyo man sanang mga tataramon. An marahay na mag-amigo sinsero asin nasasabi sa kada saro an namamatian ninda. Pag namimibi kita sa sadiri tang mga tataramon, nasasabi ta an personal na mga bagay sa satong Ama sa langit.
“Pag minahagad man kamo, mayo kamong naaako dahil sala an katuyuhan nindo sa paghagad.”—Santiago 4:3.
Dai nanggad kita mag-asa na sisimbagon nin Diyos an satong mga pamibi kun aram niyato na an mga bagay na hinahagad niyato habo niyang gibuhon ta o magkaigwa kita. Halimbawa, itatao daw ni Jehova an hinahagad nin sarong parasugal na suwertihon ini mantang malinaw na nagpatanid Siya dapit sa kahanaban asin sa superstisyosong paniniwala sa suwerte? (Isaias 65:11; Lucas 12:15) Dai nanggad niyato aasahan na sisimbagon ni Jehova an siring na mga pamibi! Para simbagon nin Diyos an satong mga pamibi, dapat tang siguraduhon na an satong mga hinahagad kauyon kan sinasabi niya sa sato sa Bibliya.
“An saro na habong maghimati sa katugunan—maski an saiyang pamibi makababaldi.”—Talinhaga 28:9.
Kan mga panahon kan Bibliya, dai sinimbag nin Diyos idtong mga dai nagsunod sa saiyang matanos na mga pagbuot. (Isaias 1:15, 16) Dai siya nagbabago. (Malakias 3:6) Kun gusto tang simbagon nin Diyos an satong mga pamibi, dapat tang gibuhon an makakaya ta na sunudon an saiyang mga pagbuot. Pero, paano kun may mga nagibo kita kaidto na sala? Buot sabihon daw kaiyan dai na kita dadangugon ni Jehova? Siyempre, dai man! Mamumuton kitang papatawadon nin Diyos kun pagbabasulan ta an mga salang nagibo ta asin gigibuhon an satong pinakamakakaya para mapaugma siya.—Gibo 3:19.