Kun Paano Ka Matatabangan kan mga Pamibi

Huli sa malalang hilang ni Pamela, nagpabulong siya sa mga doktor. Apuwera kaiyan, namibi man siya sa Diyos para tawan nin kusog na matagalan an dipisil niyang sitwasyon. Nakatabang daw sa saiya an pamibi?

“Kan nagpapabulong ako kan kanser ko, parati akong nakakamati nin grabeng takot,” an paliwanag ni Pamela. “Pero pag namimibi ako sa Diyos na Jehova, nakakalma an pagmati ko asin nakakaya ko an sitwasyon ko. Pirmi pa man giraray akong nakakamati nin grabeng kulog, alagad natatabangan ako kan pamibi na magdanay na positibo. Pag kinukumusta ako, sinasabi ko, ‘Bakong marahay an pagmati ko, pero maugma ako!’”

Siyempre, dai ta na paghalaton pa na magkaigwa kita nin hilang na puwede tang ikagadan bago kita mamibi. Gabos kita nag-aagi nin mga kadipisilan, dakula man iyan o sadit, asin sa parati nakakamati kita na kaipuhan ta nin tabang para makayanan an mga iyan. Makakatabang daw an pamibi?

An Bibliya nagsasabi: “Ipasa mo ki Jehova an saimong pasan, asin aalalayan ka niya. Dai niya nuarin man tutugutan na matumba an saro na matanos.” (Salmo 55:22) Nakakaranga nanggad iyan! Kaya paano ka matatabangan kan pamibi? Pag namimibi ka sa Diyos sa tamang paagi, itatao niya saimo an kaipuhan mo para makayanan an saimong mga kadipisilan.—Hilingon an kahon na “Kun Ano an Maitatao Saimo kan mga Pamibi.”

Kun Ano an Maitatao Saimo kan mga Pamibi

Katuninungan nin isip

“Ipaaram nindo sa Diyos an saindong mga kahagadan; asin an katuninungan nin Diyos na nakakalabi sa gabos na pakasabot iyo an magbabantay sa saindong puso asin kaisipan paagi ki Cristo Jesus.” (Filipos 4:6, 7) Pag sinasabi mo sa Diyos an saimong mga ikinakahadit, tatabangan ka niya na magdanay na kalmado asin humiro nin may kadunungan pag nakakamati ka nin stress.

Kadunungan hali sa Diyos

“Kun an siisay man sa saindo kulang sa kadunungan, padagos siyang maghagad sa Diyos, huling siya bukas-palad na nagtatao sa gabos asin dai nanunuyaw, asin itatao iyan sa saiya.” (Santiago 1:5) Pag nasa masakit kitang sitwasyon, kun minsan nakakagibo kita nin salang mga desisyon. Kun mamimibi ka na tawan ka nin kadunungan, puwedeng ipagirumdom sa saimo nin Diyos an dakul na makakatabang na prinsipyo sa saiyang nasusurat na Tataramon, an Bibliya.

Kusog asin karangahan

“Igwa akong kusog na atubangon an gabos na bagay paagi sa saiya na nagtatao sa sako nin puwersa.” (Filipos 4:13) Bilang an Diyos na makakamhan sa gabos, puwede kang tawan ni Jehova nin kusog na kaipuhan mo para makayanan an saimong mga kadipisilan o aalalayan ka niya na makatagal sa saimong mga kasakitan. (Isaias 40:29) Inaapod man kan Bibliya si Jehova na “an Diyos nin gabos na karangahan.” Puwede niya kitang rangahon “sa gabos tang inaagihan na pagbalo.”—2 Corinto 1:3, 4.

MAKIKINABANG KA DAW?

Siyempre, dai man kita pinipirit ni Jehova na mamibi sa saiya. Kundi, mamumuton niya kitang dinadagka na gibuhon iyan. (Jeremias 29:11, 12) Pero, paano kun pagmati mo kaidto dai sinisimbag an mga pamibi mo? Dai madisganar o dai magpundo. Puwedeng dai matabangan kan mamumuton na mga magurang an saindang mga aki sa mismong paagi na gusto kan mga ini o sa mismong panahon na inaasahan iyan kan mga aki. Tibaad aram kan mga magurang an mas marahay na solusyon. Pero, sarong bagay an sigurado: Tinatabangan kan mamumuton na mga magurang an saindang mga aki.

An Diyos na Jehova—an pinakamamumuton na magurang—gusto ka man na tabangan. Kun sisiyasaton mong marhay an mga giya na tinukar sa artikulong ini asin gigibuhon mo an makakaya mo para maisabuhay an mga iyan, sisimbagon nin Diyos an saimong mga pamibi sa pinakamarahay na paagi!—Salmo 34:15; Mateo 7:7-11.