Hapot Hali sa mga Parabasa

Kun an sarong Kristiyano idiniborsiyo an saiyang agom na mayo nin suno sa Kasuratan na basehan tapos nag-agom nin iba, paano mamansayon kan kongregasyon an inot niyang pag-agom saka an pag-agom niya giraray?

Sa arog kaiyan na sitwasyon, kun an sarong Kristiyano nag-agom giraray, mamansayon kan kongregasyon na tapos na su inot niyang pag-agom asin na balido an pag-agom niya giraray. Para masabutan an mga rason sa kongklusyon na iyan, estudyaran ta an sinabi ni Jesus manungod sa diborsiyo asin pag-agom giraray.

Arog kan mababasa sa Mateo 19:9, sinambit ni Jesus an solamenteng suno sa Kasuratan na basehan para tapuson an pag-aguman. Sinabi niya: “An siisay man na dumiborsiyo sa saiyang agom na babayi, apuwera sana kun dahil sa nagibo kaini na seksuwal na imoralidad, asin mag-agom nin iba nakakagibo nin pagsambay.” Base sa sinabi ni Jesus, naaraman ta (1) na an seksuwal na imoralidad an solamenteng suno sa Kasuratan na basehan para tapuson an pag-aguman paagi sa diborsiyo asin (2) na nakakagibo nin pagsambay an sarong lalaki na idiniborsiyo an saiyang agom dawa mayo siya nin suno sa Kasuratan na basehan na iyan asin nag-agom nin iba.a

An buot sabihon daw ni Jesus libre nang mag-agom giraray suno sa Kasuratan an sarong lalaki na nakagibo nin seksuwal na imoralidad asin idiniborsiyo an saiyang agom? Dai man. Pag an agom nakagibo nin pagsambay, an pinagkasalaan na agom puwedeng magdesisyon kun baga papatawadon niya o dai niya na aakuon an saiyang agom. Kun dai niya inako an saiyang agom asin legal siyang nakipagdiborsiyo, pareho na sinda puwedeng mag-agom giraray pag pinal na o tapos na an proseso kan diborsiyo.

Sa ibong na lado, an pinagkasalaan na agom tibaad igwa nin sinserong pagmawot na mapagdanay an pag-aguman ninda, asin huli kaiyan sinabi niya sa saiyang agom na handa niya ining patawadon. Alagad, paano kun habong akuon kan nagsambay na agom an pagpapatawad dangan nagkua ini nin unilateral legal divorce (o pakikipagdiborsiyo kan saro sanang lado)? Huling an pinagkasalaan na agom andam na magpatawad asin gustong mapagdanay an pag-aguman ninda, an agom na lalaki mayo nin suno sa Kasuratan na basehan para mag-agom giraray. Kun an agom na lalaki magpadagos sa paggibo nin kontra sa Kasuratan asin nag-agom giraray mantang mayo man siya nin suno sa Kasuratan na basehan para gibuhon iyan, nakagibo giraray siya nin pagsambay, na magigin basehan para magbilog giraray nin hudisyal na komite an mga elder.—1 Cor. 5:1, 2; 6:9, 10.

Pag an sarong lalaki nag-agom giraray na mayo nin suno sa Kasuratan na basehan para gibuhon iyan, paano mamansayon kan kongregasyon an inot niyang pag-agom asin an pag-agom niya giraray? Balido pa daw suno sa Kasuratan an inot niyang pag-agom? An pinagkasalaan daw na agom puwede pang magdesisyon na patawadon o dai na akuon an dati niyang agom? Sa paghiling kan kongregasyon, maibibilang daw na pagsambay an pag-agom niya giraray?

Kaidto, ibinibilang kan kongregasyon na pagsambay an pag-agom giraray sagkod na an pinagkasalaan na agom buhay pa, dai pa nag-aagom, asin dai nagkasala nin seksuwal na imoralidad. Minsan siring, dai sinambit ni Jesus an pinagkasalaan na agom kan ipinaliwanag niya an manungod sa diborsiyo asin pag-agom giraray. Imbes, ipinaliwanag niya na nakakagibo nin pagsambay an sarong lalaki na idiniborsiyo an saiyang agom dawa mayo siya nin suno sa Kasuratan na basehan para gibuhon iyan dangan nag-agom giraray. Sa arog kaiyan na sitwasyon, an inot na pag-agom tinatapos kan diborsiyo asin pag-agom giraray, na sabi ni Jesus kapareho man sana nin pagsambay.

Kun an pag-inaguman natapos huli sa diborsiyo asin pag-agom giraray, dai na magigibo kan pinagkasalaan na agom an pagpapatawad o an dai na pag-ako sa dati niyang agom. Kaya, mayo na siya kan paninimbagan na maggibo kan magabat na desisyon kun baga papatawadon o dai niya na aakuon an dati niyang agom. Saro pa, an pagmansay kan kongregasyon sa pag-agom giraray dai madepende sa kun baga an pinagkasalaan na agom nagadan kan huri, nag-agom giraray, o nakagibo nin seksuwal na imoralidad.b

Sa halimbawa na sinambit sa inutan, an agom na lalaki nakagibo nin pagsambay na uminabot sa pagdiborsiyo. Paano kun an agom na lalaki dai man nakagibo nin pagsambay pero nakipagdiborsiyo asin nag-agom giraray? O paano kun an agom na lalaki dai man nakagibo nin seksuwal na imoralidad bago kan pagdiborsiyo kundi pagkatapos na kan pagdiborsiyo tapos nag-agom giraray dawa handa man an pinagkasalaan na agom na patawadon siya? Sa gabos na halimbawang ini, an inot na pag-inaguman tinatapos kan diborsiyo saka kan pag-agom giraray, na ibinibilang na pagsambay. An pag-agom niya giraray maibibilang na sarong legal na relasyon. Arog kaini an pagkapaliwanag kaiyan sa Nobyembre 15, 1979, na isyu kan The Watchtower, pahina 32: “Naglaog na siya ngunyan sa bagong pag-aguman kaya dai niya iyan basta na lang puwedeng tapuson para balikan an dati niyang agom; tapos na an dating pag-aguman huli sa pagdiborsiyo, pagsambay asin pag-agom giraray.”

An pagliliwat na ini sa satong pakasabot dai nangangahulugan na bako nang sagrado an pag-aguman o na an pagsambay bako nang magabat na kasalan para sa mga Kristiyano. Kun an sarong lalaki nakipagdiborsiyo dawa mayo siya nin suno sa Kasuratan na basehan para gibuhon iyan tapos nag-agom giraray dawa mayo siya nin suno sa Kasuratan na katalingkasan na mag-agom giraray, an mga elder mabilog nin hudisyal na komite huli ta nakagibo siya nin pagsambay. (Kun an bago niyang agom sarong Kristiyano, maatubang man ini sa hudisyal na komite huli ta nakagibo ini nin pagsambay.) An pag-aguman ninda kan bago niyang agom dai ibibilang na pagsambay (adulterous marriage), pero an agom na lalaki dai magigin kuwalipikado sa espesyal na mga pribilehiyo sa kongregasyon sa laog nin dakul na taon asin sagkod na dai pa nahahali an maraot na dangog o katuyawan na epekto kan saiyang pagkakasala. Kaiba digdi an pagkonsiderar sa presenteng sitwasyon kan dating agom na tibaad patraydor na idiniborsiyo asin sa menor de-edad na mga aki na binayaan kan agom na nagkasala.—Mal. 2:14-16.

Huli sa seryosong mga konsekwensiyang ini nin bakong suno sa Kasuratan na pagdiborsiyo asin pag-agom giraray, sarong kadunungan para sa mga Kristiyano na arugon an pagmansay ni Jehova sa pagigin sagrado kan areglo nin pag-aguman.—Ecl. 5:4, 5; Heb. 13:4.