Suportaran an Satong Paraataman na si Jesus

1. Ano an kabutan ni Jehova ngunyan?

KABUTAN nin Diyos ngunyan na an maugmang bareta kan Kahadian ihulit sa bilog na daga. (Mar. 13:10; 1 Tim. 2:3, 4) Gibuhon ini ni Jehova, asin mahalagang marhay ini kaya pinili niya an saiyang namumutan na Aki para giyahan an gibuhon na ini. Makakasigurado kita na paagi sa mahusay na pangangataman ni Jesus, an gibuhon na paghuhulit matatapos uyon sa paaging gusto ni Jehova bago mag-abot an katapusan.—Mat. 24:14.

2. Ano an pag-uulayan ta sa artikulong ini?

² Sa artikulong ini, aaramon ta kun paano ginagamit ni Jesus an saiyang “maimbod asin mapagmansay na uripon” tanganing magtao nin espirituwal na kakanon asin tanganing organisaron an saiyang mga parasunod para sa pinakamahiwas na kampanya nin paghuhulit sa kasaysayan. (Mat. 24:45) Aaramon ta man kun ano an magigibo kan lambang saro sa sato tanganing suportaran si Jesus asin an maimbod na uripon.

GINIGIYAHAN NI JESUS AN GIBUHON NA PAGHUHULIT

3. Anong awtoridad an itinao ki Jesus?

³ Ginigiyahan ni Jesus an gibuhon na paghuhulit. Taano ta sigurado kita diyan? Bago nagsakat si Jesus sa langit, kinaulay niya an nagkapira sa saiyang maimbod na mga parasunod sa sarong bukid sa Galilea. Sinabi niya sa sainda: “An gabos na awtoridad sa langit asin sa daga itinao na sa sako.” Mangnuhon an sunod tulos na sinabi niya: “Kaya, padumán kamo asin gumibo kamo nin mga disipulo sa mga tawo kan gabos na nasyon.” (Mat. 28:18, 19) Kaya itinao ki Jesus an awtoridad na giyahan an gibuhon na paghuhulit.

4. Taano ta makakasigurado kita na ginigiyahan pa man giraray ni Jesus an gibuhon na paghuhulit?

⁴ Sinabi ni Jesus na an gibuhon na paghuhulit asin paggibo nin disipulo isasagibo sa “gabos na nasyon” asin na makakaibanan siya kan saiyang mga parasunod “sa gabos na aldaw sagkod sa pagtatapos kan sistema nin mga bagay.” (Mat. 28:20) Malinaw na ipinapahiling kan mga tataramon na iyan na an gibuhon na paghuhulit padagos na gigiyahan ni Jesus sagkod sa panahon ta ngunyan.

5. Paano kita nakakatabang sa kautuban kan Salmo 110:3?

⁵ Dai nahadit si Jesus na tibaad magkaigwa nin kakulangan sa mga parahulit sa panahon kan pagtatapos kan sistema nin mga bagay. Aram niya na mauutob an propetikong mga tataramon kan salmista: “Gikan sa buot na mapresentar kan saindang sadiri an saimong banwaan sa aldaw kan saimong hukbong militar.” (Sal. 110:3) Kun nakikikabtang ka sa gibuhon na paghuhulit, sinusuportaran mo si Jesus asin an maimbod na uripon asin nakakatabang ka para mautob an propesiyang iyan. Nagpapadagos an gibuhon, pero igwa nin mga kadipisilan.

6. Ano an sarong kadipisilan na inaatubang ngunyan kan mga parahulit kan Kahadian?

⁶ An sarong kadipisilan na inaatubang kan mga parahulit kan Kahadian iyo an pagkontra. An mga apostata, mga lider nin relihiyon, asin mga pulitiko nagsasabi nin mga kaputikan manungod sa satong gibuhon. Kun an satong mga kapamilya, kamidbid, asin katrabaho napatubod kan salang impormasyon na ini, tibaad gipiton ninda kita na magpundo na sa paglilingkod ki Jehova asin sa paghuhulit. Sa nagkapirang nasyon, an pagkontra ginigibo paagi sa pananakot, paghuma, pag-arestar, asin pagpreso pa ngani. Dai kita nagngangalas sa ginigibo nindang ini. Ihinula ni Jesus: “Ikakaungis kamo kan gabos na nasyon huli sa pangaran ko.” (Mat. 24:9) An mismong bagay na naeeksperyensiyahan ta an arog kaiyan na pagkaungis katunayan na inuuyunan kita ni Jehova. (Mat. 5:11, 12) An Diyablo an nasa likod kan pagkontrang iyan. Pero mas makapangyarihan nanggad si Jesus kisa ki Satanas! Sa pagsuportar ni Jesus, an maugmang bareta nakakaabot sa mga tawo sa gabos na nasyon. Hilingon ta an ebidensiya.

7. Anong ebidensiya an nahihiling mo na nauutob an Kapahayagan 14:6, 7?

⁷ Bilang mga parahulit kan Kahadian, inaatubang ta man an kadipisilan na mapangganahan an problema sa lengguwahe. Sa kapahayagan na itinao ni Jesus ki apostol Juan, sinabi niya na sa panahon ta mapapangganahan kan maugmang bareta an ulang na iyan. (Basahon an Kapahayagan 14:6, 7.) Paano? Tinatawan ta nin pagkakataon an pinakadakul na tawo sagkod sa mapupuwede na maghimati sa mensahe kan Kahadian. Sa ngunyan, mababasa kan mga tawo sa bilog na kinaban an basado sa Bibliyang mga materyal na yaon sa satuyang jw.org website huling igwa iyan nin mga impormasyon sa labing 1,000 lengguwahe! Inaprubaran na itradusir sa labing 700 na lengguwahe an librong Mabuhay nin Maugma Sagkod Pa Man!, an panginot na publikasyon na ginagamit ta sa pag-adal para sa paggibo nin mga disipulo! An espirituwal na kakanon ginibo man na available paagi sa mga video recording para sa mga púla asin mga publikasyon sa braille para sa mga buta. Nahihiling tang nauutob an mga propesiya sa Bibliya. An mga tawo “hali sa gabos na lengguwahe kan mga nasyon” nakakanuod na magtaram kan “dalisay na lengguwahe” kan katotoohan sa Bibliya. (Zac. 8:23; Sof. 3:9) Nagigibo an gabos na ini paagi sa mahusay na pangangataman ni Jesu-Cristo.

8. Ano na an nagin resulta sa ngunyan kan satong gibuhon na paghuhulit?

⁸ Sa ngunyan, labing 8,000,000 katawo sa 240 na kadagaan an kabilang sa organisasyon ni Jehova, asin manampulong ribo an nababawtismuhan kada taon! Alagad, an mas importante kisa sa mga numero iyo an espirituwal na mga kuwalidad, “an bagong personalidad” na napatalubo kan bagong mga disipulong ini. (Col. 3:8-10) Dakul an nagpundo sa pagigin imoral, bayolente, mapagpalain-lain, asin pagigin nasyonalistiko. Nauutob an propesiya na nakarekord sa Isaias 2:4; dai na sinda ‘nag-aadal nin pakikigiyera.’ Mantang nagmamaigot kita na isulot an bagong personalidad, natatabangan ta an mga tawo na rumani sa organisasyon nin Diyos asin pinapatunayan ta na sinusunod ta an satong paraataman na si Cristo Jesus. (Juan 13:35; 1 Ped. 2:12) Dai iyan nagkataon sana. Itinatao sa sato ni Jesus an tabang na kaipuhan ta.

NAGNOMBRA SI JESUS NIN URIPON

9. Sigun sa Mateo 24:45-47, ano an ihinula manungod sa panahon kan katapusan?

⁹ Basahon an Mateo 24:45-47. Ihinula ni Jesus na sa panahon kan katapusan, manombra siya nin sarong “maimbod asin mapagmansay na uripon” tanganing magtao nin espirituwal na kakanon. Kaya inaasahan ta na an uripon na iyan magigin sibot sa panahon ta. Asin totoo nanggad iyan. An satong paraataman na si Jesus naggagamit nin sadit na grupo nin linahidan na mga lalaki tanganing magtao sa mga lingkod nin Diyos asin sa mga interesado nin espirituwal na “kakanon sa tamang panahon.” An mga lalaking ini dai minamansay an saindang sadiri na kagurangnan kan pagtubod kan iba. (2 Cor. 1:24) Imbes, minimidbid ninda na si Jesu-Cristo iyo an “lider asin komandante” kan saiyang banwaan.—Isa. 55:4.

10. Arin sa mga publikasyon na mahihiling sa artwork an nakakumbinsir sa saimo na maglakaw sa dalan na pasiring sa buhay na daing katapusan?

¹⁰ Puon kan 1919, an maimbod na uripon nag-aandam nin lain-lain na mga publikasyon na nagtatao sa bagong mga interesado nin pagkakataon na manamitan an masustansiyang espirituwal na kakanon. Kan 1921, pig-andam kan uripon an librong The Harp of God tanganing tabangan an mga interesado na manudan an panginot na mga katukduan sa Bibliya. Sa paglihis nin panahon, dagdag na mga publikasyon an itinao. Arin na publikasyon an nakatabang sa saimo na mamidbid asin mamutan an satong Ama sa langit? Iyan daw an “Let God Be True,” An Katotoohan na Minagiya Pasiring sa Buhay na Daing Sagkod, Puwede Kamong Mabuhay Sagkod Lamang sa Paraiso Digdi sa Daga, Kaaraman na Minagiya Pasiring sa Buhay na Daing Katapusan, Ano Man Nanggad an Itinotokdo kan Biblia?, Ano an Itinutukdo Sato kan Bibliya?, o an Mabuhay nin Maugma Sagkod Pa Man!, na pinakabago tang publikasyon? An gabos na publikasyon na ini dinisenyo para itao an espesipikong pangangaipo sa panahon kan pagpublikar kaiyan.

11. Taano ta mahalagang marhay na gabos kita nag-aako nin espirituwal na kakanon?

¹¹ Bako sanang mga baguhan na mga interesado an nangangaipo nin matagas na espirituwal na kakanon kundi gabos kita. Si apostol Pablo nagsurat: “An matagas na kakanon para sa mga tawong adulto na.” Sinabi pa ni Pablo na an pag-aplikar kan mga nanunudan tang iyan sa Bibliya makakatabang sa sato na “mamidbid an pagkakalain kan tama asin sala.” (Heb. 5:14) Sa masakit na panahon na ini na an pamantayan sa moral hababaon nang marhay, magigin masakit nanggad na sumunod sa mga pamantayan ni Jehova. Pero sinisigurado ni Jesus na igwa kita kan kusog na kaipuhan ta paagi sa nakakaganang espirituwal na kakanon. An pinaghahalian kan kakanon na ini iyo an ipinasabong na Tataramon nin Diyos, an Bibliya. An maimbod na uripon pig-aandam asin pigdidistribwir an kakanon na ini sa paggiya ni Jesus.

12. Arog ni Jesus, paano ta tinawan nin onra an pangaran nin Diyos?

¹² Arog ni Jesus, tinawan ta nin maninigong onra an pangaran nin Diyos. (Juan 17:6, 26) Halimbawa, kan 1931 inako ta an basado sa Kasuratan na apod na Mga Saksi ni Jehova. Paagi kaiyan, ipinapahiling ta na gusto tang mamidbid sa pangaran kan satong Ama sa langit. (Isa. 43:10-12) Asin puon kan Oktubre kan taon na iyan, an pangaran nin Diyos mahihiling na sa cover kan kada isyu kan magasin na ini. Apuwera kaiyan, ibinalik man kan Bagong Kinaban na Traduksiyon kan Banal na Kasuratan an pangaran nin Diyos sa tamang kinamumugtakan kaiyan sa saiyang Tataramon. Kabaliktaran nanggad iyan sa ginibo kan mga relihiyon kan Kakristiyanuhan na paghali kan pangaran ni Jehova sa dakul na traduksiyon kan saindang Bibliya!

INOORGANISAR NI JESUS AN SAIYANG MGA PARASUNOD

13. Ano an nakakakumbinsir sa saimo na ginagamit ngunyan ni Jesus “an maimbod asin mapagmansay na uripon”? (Juan 6:68)

¹³ Paagi sa “maimbod asin mapagmansay na uripon,” nakaestablisar si Jesus nin daing kaagid na organisasyon sa daga para suportaran an dalisay na pagsamba. Ano an masasabi mo manungod sa organisasyon na iyan? Tibaad naiisip mo an mga tataramon ni apostol Pedro na nagsabi ki Jesus: “Kiisay pa man kami maduman? Yaon sa saimo an mga tataramon nin buhay na daing katapusan.” (Juan 6:68) Hain daw kita ngunyan kun dai ta nanumpungan an organisasyon ni Jehova? Paagi kaiyan, sinisigurado ni Cristo na pirmi kitang basog sa espirituwal. Sinasanay niya man kita para maisagibo niyato nin epektibo an satong ministeryo. Saro pa, tinatabangan niya kita na maisulot “an bagong personalidad” tanganing magin magayon kita sa paghiling ni Jehova.—Efe. 4:24.

14. Paano ka nakikinabang sa pagigin kabtang mo kan organisasyon ni Jehova sa panahon kan COVID-19 na pandemya?

¹⁴ Nagtatao si Jesus nin madunong na instruksiyon sa masakit na mga panahon. Risang-risa an mga pakinabang kan mga instruksiyon na iyan kan magpuon an COVID-19 na pandemya. Mantang an dakul sa kinaban dai sigurado kun ano an gigibuhon, sinigurado ni Jesus na makakaresibi kita nin malinaw na paggiya para magdanay kitang ligtas. Dinagka kita na magsulot nin face mask asin nin face shield pag nasa pampublikong mga lugar asin ugalion an physical distancing. Pinagirumdom an mga elder na regular na kontakon an gabos na nasa kongregasyon asin aramon an saindang pisikal asin espirituwal na mga pangangaipo. (Isa. 32:1, 2) Nakaresibi man kita nin dagdag na mga instruksiyon asin pampakusog paagi sa mga update kan Namamahalang Grupo.

15. Anong instruksiyon an itinao manungod sa kun paano gigibuhon an mga pagtiripon asin an paghuhulit sa panahon kan pandemya, asin ano an mga resulta?

¹⁵ Sa panahon kan pandemya, nakaresibi man kita nin malinaw na instruksiyon manungod sa kun paano gigibuhon an mga pagtiripon sa kongregasyon asin an paghuhulit. Tulos-tulos, pinunan ta na gibuhon an satong Kristiyanong mga pagtiripon, mga asembleya, asin mga kumbensiyon paagi sa videoconferencing. Pinunan ta man an paghuhulit na haros paagi lang sa surat asin telepono. Binendisyunan ni Jehova an satong mga paghihinguwa. Dakul na sangay an nagreport nin pambihirang paglangkaw sa bilang nin mga parahayag. Sa katunayan, dakul an nagkaigwa nin nakakapakusog na mga eksperyensiya sa panahon na ini.—Hilingon an kahon na “Binebendisyunan ni Jehova an Satong Paghuhulit.”

16. Sa ano kita makakasigurado?

¹⁶ Tibaad iniisip nin nagkapira na sobra man an ginigibong pag-iingat kan organisasyon mapadapit sa pandemya. Pero pauruutrong napatunayan na an mga instruksiyon na naresibi ta talagang may basehan. (Mat. 11:19) Asin mantang hinuhurop-hurop ta an mamumuton na paggiya ni Jesus sa banwaan nin Diyos, makakasigurado kita na ano man an mangyari sa maabot na panahon, kaibanan ta si Jehova asin an saiyang namumutan na Aki.—Basahon an Hebreo 13:5, 6.

17. Ano an namamati mo na si Jesus an saimong paraataman?

¹⁷ Nauugma nanggad kita na si Jesus an satuyang paraataman! Kabilang kita sa sarong organisasyon na dai nagigin ulang an kultura, nasyon, asin lengguwahe. Abundang marhay kita sa espirituwal asin nasangkapan para sa gibuhon na paghuhulit. An kada saro sa sato tinatabangan kun paano isusulot an bagong personalidad asin nanunudan ta na kamutan an lambang saro. Dakul nanggad an dahilan ta na ipag-orgulyo an satong paraataman na si Jesus!