Mga Hoben—Padagos na Maghinguwang Umuswag Pagkatapos kan Bawtismo

1. Anong marahay na mga bagay an nagibo na kan dakul na hoben?

KADA taon, rinibong hoben na mga Kristiyano an nababawtismuhan. Nagibo mo na daw an lakdang na ini? Kun iyo, nauugma para saimo an saimong espirituwal na mga tugang, asin iyo man si Jehova! (Tal. 27: 11) Pag-isipan kun ano na an mga nagibo mo. Maigot mong pinag-adalan an Bibliya, na tibaad sa laog nin nagkapirang taon. Dahil diyan, nagin kumbinsido ka na an Bibliya iyo an Tataramon nin Diyos. Pero an mas mahalaga, namidbid mo asin namutan an Awtor kan sagradong librong iyan. An saimong pagkamuot ki Jehova nagin makusog kaya saro ka na ngunyan sa nagdusay asin bawtisadong mga lingkod niya. Marahayon nanggad na desisyon!

2. Ano an pag-uulayan ta sa artikulong ini?

² Siguradong nabalo an saimong pagtubod sa nagkapirang paagi mantang nag-uuswag ka pasiring sa bawtismo. Pero mantang nagkakaedad ka, mapapaatubang ka sa mga bagong pagbalo. Pupurbaran ni Satanas na paluyahon an saimong pagkamuot ki Jehova asin papunduhon ka sa paglilingkod sa Saiya. (Efe. 4:14) Dai mo pagtugutan na mangyari iyan. Ano an makakatabang sa saimo na magdanay na maimbod ki Jehova asin na utubon an saimong iprinomesa kan ika magdusay? Dapat kang padagos na umuswag—“maghinguwang makaabot” sa pagigin maygurang na Kristiyano. (Heb. 6:1) Pero, paano mo iyan magigibo?

PAANO MO MAGIGIBONG UMUSWAG BILANG SARONG KRISTIYANO?

3. Anong pag-uswag an kaipuhan na gibuhon kan gabos na Kristiyano pagkatapos na mabawtismuhan?

³ Pagkatapos na mabawtismuhan, gabos kita kaipuhan na sunudon an sadol na itinao ni apostol Pablo sa mga kapagtubod sa Efeso. Dinagka niya sinda na “magin maygurang” na mga Kristiyano. (Efe. 4:13, nota sa ibaba) An buot sabihon, kaipuhan nindang ‘padagos na maghinguwang umuswag.’ Masasabutan ta kun ano an buot sabihon ni Pablo kan ikumparar niya an espirituwal na pag-uswag sa pisikal na pag-uswag nin sarong aki. An bagong mamundag na umboy ipinag-uugma asin ipinag-oorgulyo kan saiyang mga magurang. Pero dai puwedeng magdanay siyang umboy sagkod lamang. Pag-abot nin panahon, kaipuhan niyang halion “an mga ugali nin sarong aki.” (1 Cor. 13:11) Arog man kaiyan sa mga Kristiyano. Pagkatapos na mabawtismuhan, dapat na padagos kitang maghinguwang umuswag. Pag-ulayan ta an nagkapirang suhestiyon na makakatabang sa sato na magibo iyan.

4. Anong kuwalidad an makakatabang sa saimo para umuswag sa espirituwal? Ipaliwanag. (Filipos 1:9)

⁴ Pakusugon an saimong pagkamuot ki Jehova. Namumutan mo nang marhay si Jehova. Pero an pagkamuot mo sa saiya puwedeng lalo pang kumusog. Paano? May sinambit si apostol Pablo na sarong paagi, arog kan nakarekord sa Filipos 1:9. (Basahon.) Ipinamibi ni Pablo na lugod an pagkamuot kan mga taga Filipos “lalo pang mag-urog nin mag-urog.” Kaya mapapakusog ta an satong pagkamuot. Magigibo ta iyan paagi sa pagkua nin “tamang kaaraman asin lubos na pakamansay.” Mantang mas namimidbid ta si Jehova, mas nag-uurog man an satong pagkamuot sa saiya asin an pagpapahalaga ta sa saiyang personalidad saka sa kun paano niya ginigibo an mga bagay-bagay. Mas nagkukusog an satong pagmawot na paugmahon siya, asin habo ta nanggad gumibo nin ano man na makakapamundo sa saiya. Nagmamaigot kita na masabutan kun ano an saiyang kabutan asin kun paano ta magigibo iyan.

5-6. Paano ta mapapakusog an satong pagkamuot ki Jehova? Ipaliwanag.

⁵ Mapapakusog ta an satong pagkamuot ki Jehova pag urog tang namimidbid an saiyang Aki, na perpektong nagpahiling kan personalidad kan saiyang Ama. (Heb. 1:3) An pinakamarahay na paagi para mamidbid si Jesus iyo an pag-adal kan apat na Ebanghelyo. Kun dai mo pa nagigibo an regular na pagbasa kan Bibliya aroaldaw, ano ta dai mo punan ngunyan? Mantang binabasa mo an mga pagkasaysay manungod ki Jesus, magpokus sa saiyang mga kuwalidad. Madali siyang dulukon; mamumuton niyang kinugos an sadit na mga aki. (Mar. 10:13-16) Ginibo niyang magin pamugtak an buot kan saiyang mga disipulo; dai sinda nag-alangan na sabihon sa saiya kun ano an nasa isip ninda. (Mat. 16:22) Sa bagay na iyan, inarog ni Jesus an saiyang Ama sa langit. Si Jehova madalion man na dulukon. Puwede kitang magdulok sa saiya sa pamibi. Pag namimibi kita, puwede tang sabihon sa saiya an laog kan satong puso. May kumpiyansa kita na dai niya kita huhusgaran. Namumutan niya kita; nagmamakulog siya sa sato.—1 Ped. 5:7.

⁶ Nahirak si Jesus sa mga tawo. Sinabi ni apostol Mateo: “Kan mahiling niya an dakul na tawo, nahirak siya sa sainda, huli ta naanitan sinda asin napabayaan arog nin mga karnero na daing pastor.” (Mat. 9:36) Ano man an namamatian ni Jehova? Sinabi ni Jesus: “Dai nakakaugma sa sakuyang Ama na nasa langit na mapahamak an maski saro sa mga tawong arog nin sadit na mga aki.” (Mat. 18:14) Nakakaugma nanggad iyan! Mantang mas namimidbid ta si Jesus, mas nagkukusog an satong pagkamuot ki Jehova.

7. Paano makakatabang saimo an pakikiiba-iba sa maygurang na mga Kristiyano?

⁷ Makakanuod ka man na magin mas mamumuton saka mag-uuswag ka bilang sarong Kristiyano paagi sa pakikiiba-iba sa maygurang na mga tugang sa saindong kongregasyon. Obserbaran mo kun gurano sinda kaugma. Mayo lamang sindang pinagbabasulan sa desisyon ninda na paglingkudan si Jehova. Paistoryahon mo sinda kan mga eksperyensiya ninda sa paglilingkod ki Jehova. Pag may gigibuhon kang importanteng desisyon, magpatabang sa sainda. Tandaan, “may kapangganahan pag dakul an parakonseho.”—Tal. 11:14.

8. Ano an puwede mong gibuhon kun may mga pagduda ka manungod sa sinasabi kan Bibliya?

⁸ Pangganahan an saimong mga pagduda. Arog kan sinambit sa parapo 2, pupurbaran ni Satanas na ulangon ka sa saimong pag-uswag sa espirituwal. An sarong paagi na puwede niyang gibuhon iyan iyo na papagdudahon ka manungod sa nagkapira sa mga katukduan sa Bibliya. Halimbawa, tibaad mag-abot an panahon na may mga magkumbinsir sa saimo na paniwalaan an teoriya nin ebolusyon na naglalapastangan sa Diyos. Tibaad kan aki ka pa dai mo pa iyan gayong napag-iisipan, pero ngunyan tibaad itinutukdo na mismo iyan sa saimo sa eskuwelahan. An sinasabi kan saimong mga maestro o maestra para suportaran an ebolusyon tibaad garo baga lohikal man asin nakakakumbinsir. Alagad, tibaad dai pa lamang ninda pinag-isipan na marhay an ebidensiya na igwa nin sarong Kaglalang. Girumdumon an prinsipyo sa Talinhaga 18:17: “An inot na magpresentar kan saiyang lado sa kaso garo baga iyo an tama, sagkod na mag-abot an ibong na lado asin usisaon siya.” Imbes na basta na sana akuon na totoo an mga ideyang nadadangog mo sa eskuwelahan, maingat na pag-adalan an mga katotoohan na yaon sa Tataramon nin Diyos, an Bibliya. Mag-research sa satong mga publikasyon. Makipag-ulay sa mga tugang na dati nagtutubod sa ebolusyon. Haputon sinda kun ano an nakakumbinsir sa sainda na igwa nin Kaglalang na namumuot sa sato. An nakakapakusog na pag-urulay na iyan makakatabang sa saimo na magpokus sa mga ebidensiya na igwa nin Kaglalang.

9. Ano an manunudan mo sa eksperyensiya ni Melissa?

⁹ An sister na si Melissa nakinabang na marhay sa pag-research niya manungod sa paglalang.b Sinabi niya: “Sa eskuwelahan, an ebolusyon itinutukdo sa paaging garo baga nakakakumbinsir talaga. Kan inot, natatakot akong atubangon an mga pagduda ko. Natakot ako ta ’baad totoo an ebolusyon asin sala an pinapaniwalaan ko. Pero inisip-isip ko na habo ni Jehova na basta ta na sana paglingkudan siya na dai pigkokonsiderar an mga ebidensiya. Kaya nag-research ako. Binasa ko an librong Is There a Creator Who Cares About You? asin an mga brosyur na Linalang daw an Buhay? saka The Origin of Life—Five Questions Worth Asking. Ini mismo an kaipuhan ko. Sana ginibo ko tulos ini kaidto.”

10-11. Ano an makakatabang sa saimo na magdanay na malinig sa moral? (1 Tesalonica 4:3, 4)

¹⁰ Isikwal an salang paggawi. Sa panahon nin pagigin tin-edyer, puwedeng magin makusugon an seksuwal na pagmati, asin tibaad mapaatubang ka sa grabeng panggigipit na gumibo nin seksuwal na imoralidad. Gusto ni Satanas na magpadara ka sa arog kaiyan na pagmati. Ano an makakatabang sa saimo para magdanay kang malinig sa moral? (Basahon an 1 Tesalonica 4:3, 4.) Sa saimong mga pamibi, sabihon mo ki Jehova an mga namamatian mo asin hagadon na pakusugon ka niya. (Mat. 6:13) Girumdumon na an gusto ni Jehova tabangan ka, bako na husgaran ka. (Sal. 103:13, 14) Makakatabang man sa saimo an Tataramon nin Diyos. Si Melissa, na sinambit kasubago, maigot na pinaglabanan an maating mga kaisipan. Sinabi niya: “An pagbasa kan Bibliya aroaldaw nakatabang sako na padagos na labanan an maating mga kaisipan. Ipinagirumdom kaiyan sa sako na sadiri ako ni Jehova asin na gusto kong paglingkudan siya.”—Sal. 119:9.

¹¹ Dai mo pagsolohon an saimong mga problema. Ipakipag-ulay mo iyan sa saimong mga magurang. Siyempre, bakong pasil na ipakipag-ulay an arog kaiyan na personal na mga bagay, pero mahalaga na gibuhon mo iyan. Sinabi ni Melissa: “Namibi ako para sa kusog nin buot, dangan sinabi ko ki Papa an manungod sa problema ko. Pagkatapos kaiyan, grabeng kaginhawahan an namati ko. Aram ko na maugma sako si Jehova.”

12. Paano ka makakagibo nin marahay na mga desisyon?

¹² Magpagiya sa mga prinsipyo sa Bibliya. Mantang nagkakaedad ka, luway-luway kang pagtitiwalaan kan saimong mga magurang na gumibo nin sadiri mong mga desisyon. Pero kulang pa man giraray an mga eksperyensiya mo sa buhay. Paano mo malilikayan na makagibo nin sala na puwedeng makaraot sa pakikiamigo mo ki Jehova? (Tal. 22:3) Ipinaliwanag kan sister na si Kari kun ano an nakatabang sa saiya na makagibo nin mas marhay na mga desisyon. Narealisar niya na kun saro kang maygurang na Kristiyano, dai mo kaipuhan na magkaigwa nin mga susundon sa gabos na sitwasyon. Sinabi niya: “Kinaipuhan kong masabutan an mga prinsipyo sa Bibliya imbes na mga susundon sana.” Pag nagbabasa nin Bibliya, haputon an sadiri: ‘Ano an itinutukdo kaini sa sako manungod sa kaisipan ni Jehova? Igwa daw ini nin mga prinsipyo na magagamit ko para giyahan an sakong paggawi? Kun igwa, paano ako makikinabang pag inaplikar ko iyan?’ (Sal. 19:7; Isa. 48:17, 18) Paagi sa pagbasa kan Bibliya asin sa paghurop-hurop sa mga prinsipyo na yaon diyan, magigin mas madali sa saimo na gumibo nin mga desisyon na nakakapaugma ki Jehova. Mantang padagos kang nag-uuswag, mahihiling mo na dai mo kaipuhan nin susundon sa lambang sitwasyon huling masasabutan mo an kaisipan ni Jehova sa mga bagay-bagay.

13. Ano an puwedeng magin epekto saimo kan marahay na mga amigo? (Talinhaga 13:20)

¹³ Pumili nin mga amigo na namumutan si Jehova. Arog kan sinambit sa inutan, an pagpili mo nin mga amigo igwa nin dakulang epekto sa saimong pag-uswag bilang Kristiyano. (Basahon an Talinhaga 13:20.) Namati kan sister na si Sara na nawawara na an saiyang kaugmahan. Dangan may nangyari na nakatabang sa saiya na maibalik an saiyang kaugmahan. Sinabi ni Sara: “Nagkaigwa ako nin marahay na mga amigo sa panahon na kaipuhan ko talaga sinda. Sarong hoben na sister an kaiba ko kada semana para pag-adalan an Torrengbantayan. Saro man na amiga an nagtabang sako para makapagkomento ako sa mga pagtiripon. Dahil sa tabang kan mga amiga ko, pinunan kong mas seryosuhon an pag-personal study saka an pagpamibi. Nagkaigwa ako nin mas dayupot na relasyon ki Jehova asin namati ko giraray an kaugmahan.”

14. Paano nagkaigwa si Julien nin marahay na mga amigo?

¹⁴ Paano ka makikipag-amigo sa mga tawong magigin marahay an impluwensiya sa saimo? Si Julien, na naglilingkod ngunyan bilang elder, nagsabi: “Kan medyo hoben pa ako, nagkaigwa ako nin marahay na mga amigo mantang nakikikabtang sa ministeryo. Mga maigot sinda, asin tinabangan ninda ako na mahiling kun gurano kaugma an ministeryo. Kaya nagin pasuhan ko an bilog na panahon na pagmiministeryo. Narealisar ko man na napapalampas ko an oportunidad na magkaigwa nin marahay na mga kairiba saka nakakaugmang pakikiamigo pag mga kaedad ko lang an pinipili kong magin amigo. Pag-abot nin panahon, nagkaigwa man ako nin marahay na mga amigo sa Bethel. An halimbawa ninda nakatabang sako na magin mas mapamili sa mga libangan, asin dahil diyan nagin mas harani ako ki Jehova.”

15. Anong patanid manungod sa pakikiiba-iba an itinao ni Pablo ki Timoteo? (2 Timoteo 2:20-22)

¹⁵ Paano kun marealisar mo na may saro sa kongregasyon na bakong marahay na magin kaiba-iba? Aram ni Pablo na may mga indibidwal sa Kristiyanong kongregasyon kan inot na siglo na bakong marahay an espirituwalidad, kaya pinatanidan niya si Timoteo na rayuan sinda. (Basahon an 2 Timoteo 2:20-22.) Mahalagang marhay an satong pakikiamigo ki Jehova. Pinagmaigutan tang marhay na magin harani sa satong Ama sa langit, kaya dai ta dapat pagtugutan an siisay man na paluyahon an satong pakikiamigo sa Saiya.—Sal. 26:4.

PAANO MAKAKATABANG SA PAG-USWAG MO SA ESPIRITUWAL AN PAGKAIGWA NIN MGA PASUHAN?

16. Anong klaseng mga pasuhan an dapat na pilion mo?

¹⁶ Magkaigwa nin kapaki-pakinabang na mga pasuhan. Pumili nin mga pasuhan na makakapakusog kan saimong pagtubod asin makakatabang saimo na magin mas maygurang na Kristiyano. (Efe. 3:16) Halimbawa, puwede mong pauswagon an saimong rutina nin personal na pag-adal asin pagbasa nin Bibliya. (Sal. 1:2, 3) O tibaad mahiling mo na kaipuhan mong mamibi nin mas parati asin nin mas udok sa puso. Tibaad kaipuhan mo nin urog na pagpupugol sa sadiri sa pagpili mo nin libangan asin sa paggamit mo kan saimong panahon. (Efe. 5:15, 16) Mauugma si Jehova pag nahihiling niya an saimong paghihinguwa na urog na umuswag.

17. Anong pakinabang an makukua mo sa pagtabang sa iba?

¹⁷ Nagigin mas maygurang kang Kristiyano pag tinatabangan mo an iba. Sinabi ni Jesus: “Igwang urog na kaugmahan sa pagtao, kisa sa pag-ako.” (Gibo 20:35) Makikinabang kang marhay kun gagamiton mo an ibang panahon mo saka an saimong kusog bilang hoben. Halimbawa, puwede mong magin pasuhan na tabangan an mga may edad na asin an mga maluya an hawak o may mga kamatian sa saindong kongregasyon. Tibaad puwedeng ika an mamakal kan saindang mga pangangaipo o puwede mo man sindang tabangan sa paggamit kan saindang mga electronic device. Kun saro kang brother, gibuhon mong pasuhan na magin ministeryal na lingkod, na an katuyuhan iyo na paglingkudan an mga tugang. (Fil. 2:4) Ipinapahiling mo man an saimong pagkamuot sa mga bakong kapagtubod paagi sa pagsabi sa sainda kan maugmang bareta kan Kahadian. (Mat. 9:36, 37) Sagkod na posible, gibuhon mong pasuhan na lumaog sa bilog na panahon na ministeryo.

18. Paano makakatabang sa saimong pag-uswag an paglilingkod sa bilog na panahon na ministeryo?

¹⁸ An bilog na panahon na ministeryo puwedeng magtao sa saimo nin dakul na oportunidad na umuswag sa espirituwal. An paglilingkod bilang payunir puwedeng magbukas sa saimo nin oportunidad na makaatender sa School for Kingdom Evangelizers, makapaglingkod sa Bethel o sa teokratikong mga proyekto sa pagtugdok. An hoben na payunir na sister na si Kaitlyn, nagsabi: “An pakikikabtang sa ministeryo kaiba kan eksperyensiyadong mga tugang dakulang tabang sako na umuswag sa espirituwal pagkatapos akong mabawtismuhan. An halimbawa ninda nakamotibar sako na pararumon an sakong kaaraman sa Bibliya saka pauswagon an sakong kakayahan sa pagtutukdo.”

19. Anong mga bendisyon an makakamtan mo mantang padagos kang naghihinguwang umuswag sa espirituwal?

¹⁹ Mantang padagos kang naghihinguwang umuswag sa espirituwal, magkakamit ka nin dakul na bendisyon. Malilikayan mong masayang an saimong kusog bilang hoben dahil sa pag-abot nin mga pasuhan na daing saysay. (1 Juan 2:17) Malilikayan mo man an mga kakulugan huli sa salang mga desisyon. Imbes, makakamtan mo an tunay na kapangganahan asin kaugmahan. (Tal. 16:3) An marahay mong halimbawa makakapakusog sa saimong mga kapagtubod, hoben man o gurang. (1 Tim. 4:12) Asin an pinakamahalaga, makakamtan mo an katuninungan asin pagkakontento huling napaugma mo si Jehova asin igwa ka nin dayupot na pakikiamigo sa saiya.—Tal. 23:15, 16.