Nagigirumduman Mo Daw?

Binasa mo daw na marhay an mga isyu kan An Torrengbantayan sa taon na ini? Kun iyo, hilinga kun masisimbag mo an minasunod na mga hapot:

Paano kita babalusan kun matao kita nin panahon para kaulayon asin dangugon si Jehova saka isip-isipon an manungod sa saiya?

Makakagibo kita nin mas marahay na mga desisyon, magigin mas mahusay kitang mga paratukdo, magigin mas makusog an satong pagtubod, asin magigin makusog an satong pagkamuot ki Jehova.—w22.01, p. 30-31.

Paano kita makikinabang kun makakanuod kita na magtiwala ki Jehova asin sa saiyang mga representante?

Ngunyan na an panahon para makanuod na magtiwala sa paagi nin Diyos sa paggibo nin mga bagay-bagay na dai kinukuwestiyon an mga instruksiyon asin desisyon kan mga elder. Pag nag-abot an dakulang kasakitan, magigin andam kita na sumunod dawa ngani makaresibi kita nin mga instruksiyon na garo kakaiba o bakong rasonable.—w22.02, p. 4-6.

Ano an buot sabihon kan anghel kan sabihon niya ki Zacarias an manungod sa “hulog sa kamot [ni Gobernador] Zerubabel”? (Zac. 4:8-10)

An bisyon na ini nag-asigurar sa banwaan nin Diyos na an simpleng templo na itinutugdok matatapos asin makakaabot sa mga pamantayan nin Diyos.—w22.03, p. 16-17.

Paano kita magigin “halimbawa . . . sa pagtaram”? (1 Tim. 4:12)

Nagtataram kita nin may kabuutan asin may paggalang sa satong ministeryo, makanta nin bilog na puso, regular na makomento sa mga pagtiripon, saka mataram nin totoo asin sa paaging nakakapakusog sa iba, na linilikayan an mapang-insultong pagtaram.—w22.04, p. 6-9.

Taano ta an mga karakteristiko kan apat na hayop (mga kahadian) na sinambit sa Daniel kapitulo 7 yaon sa saro sanang hayop na ilinadawan sa Kapahayagan 13:1, 2?

An hayop na sinambit sa Kapahayagan 13 dai nagrerepresentar sa saro sanang kahadian, siring kan Roma. Imbes, nagrerepresentar iyan sa gabos na pulitikal na kapangyarihan na namahala sa mga tawo.—w22.05, p. 9.

Ano an panginot na paagi para ipahiling an satong pagtitiwala sa hustisya nin Diyos?

Kun an saro ininsulto kita, kinulgan an buot ta, o nagkasala sa sato, hinihinguwa ta na mahali an kaanggutan asin kulog nin buot, na ipinapabaya sa mga kamot ni Jehova an mga bagay-bagay. Hahalion niya an gabos na danyos na resulta kan kasalan.—w22.06, p. 10-11.

Ano an dapat na girumdumon nin sarong brother na nanginginot sa pamibi sa sarong pagtiripon?

Dai dapat gamiton an pamibi para magtao nin konseho sa kongregasyon o magpaabot nin mga paisi. Dai kaipuhan na ‘kadakul kan pigtataram’ lalo na sa pagpupuon kan pagtiripon. (Mat. 6:7)—w22.07, p. 24-25.

Sa paanong paagi na an mga “naggiribo nin karatan” maagi sa “pagkabuhay liwat para sa paghukom”? (Juan 5:29)

Dai sinda mapapaatubang sa bakong paborableng paghukom base sa dati nindang buhay. Eebalwaron sinda sigun sa saindang ugali asin paggawi pakatapos na sinda buhayon liwat.—w22.09, p. 18.

Anong nakakaugmang pagdagka an sinabi ni J. F. Rutherford sa kumbensiyon kan Setyembre 1922?

Sa kumbensiyon sa Cedar Point, Ohio, U.S.A., sinabi niya: “Nagrereynar na an Hadi! Kamo an saiyang mga representante sa pagpaisi. Kun siring ipaisi, ipaisi, ipaisi, an Hadi asin an saiyang Kahadian!”—w22.10, p. 3-5.

Ano an itinampok sa Isaias kapitulo 30 na tulong paagi kun paano kita tinatabangan nin Diyos para makatagal?

Ipinapahiling sa kapitulong ini na (1) dinadangog asin sinisimbag niya an satong mga pamibi, (2) ginigiyahan niya kita, asin (3) binebendisyunan niya kita ngunyan asin bebendisyunan niya kita sa maabot na panahon.—w22.11, p. 9.

Taano ta makakapagkongklusyon kita na an Salmo 37:10, 11, 29 nagkaigwa nin kautuban kan suanoy na panahon asin magkakaigwa nin kautuban sa maabot na panahon?

An mga tataramon ni David angay nanggad na ilinaladawan an magayunon na kamugtakan sa Israel, siring kan panahon kan pamamahala ni Solomon. Nagsambit si Jesus manungod sa maabot na paraiso asin kinotar niya an bersikulo 11. (Mat. 5:5; Luc. 23:43)—w22.12, p. 8-10, 14.