Gamiton an mga Linalang Para Tukduan an Saindong mga Aki Manungod ki Jehova

1. Ano an gusto kan mga magurang para sa mga aki ninda?

MGA magurang, aram mi na gusto nindong tabangan an saindong mga aki na mamidbid asin mamutan si Jehova. Pero dai nahihiling an Diyos. Kaya paano nindo matatabangan an saindong mga aki na mahiling siya bilang sarong tunay na Persona asin magin dayupot sa saiya?—Sant. 4:8.

2. Paano puwedeng tukduan kan mga magurang an saindang mga aki manungod sa mga kuwalidad ni Jehova?

² An sarong importanteng paagi para matabangan an mga aki na magin dayupot ki Jehova iyo an pagtukdo sainda sa Bibliya. (2 Tim. 3:14-17) Minsan siring, may ihinahayag an Bibliya na saro pang paagi kun paano puwedeng makanuod an mga aki manungod ki Jehova. Sa libro nin Talinhaga, sarong ama an posibleng marhay na nagpapagirumdom sa saiyang aking lalaki na nungkang pabayaan na mawara sa paghiling kaini an mga kuwalidad ni Jehova, na mahihiling sa mga linalang. (Tal. 3:19-21) Pag-ulayan ta an nagkapirang paagi kun paano puwedeng magamit kan mga magurang an mga linalang para tabangan an saindang mga aki na makanuod manungod sa personalidad ni Jehova.

GAMITON AN MGA LINALANG PARA TUKDUAN AN SAINDONG MGA AKI—PAANO?

3. Anong tabang an dapat na itao kan mga magurang sa saindang mga aki?

³ Sinasabi kan Bibliya na an “dai nahihiling na mga kuwalidad [nin Diyos] malinaw na nahihiling puon pa sa paglalang kan kinaban, dahil namamansayan an mga iyan paagi sa mga bagay na linalang.” (Roma 1:20) Mga magurang, posibleng nauugma kamo na magtao nin panahon na magpasyar sa luwas kaiba an saindong mga aki. Gamiton an panahon na iyan para tabangan an saindong mga aki na mahiling sa “mga bagay na linalang” an makangangalas na mga kuwalidad ni Jehova. Mapadapit diyan, hilingon ta kun ano an manunudan kan mga magurang sa halimbawa ni Jesus.

4. Paano ginamit ni Jesus an mga linalang sa pagtukdo niya sa saiyang mga disipulo? (Lucas 12:24, 27-30)

⁴ Mangnuhon kun paano ginamit ni Jesus an mga linalang sa pagtukdo. Sarong beses, sinabihan niya an saiyang mga disipulo na masdan an mga uwak asin an mga liryo. (Basahon an Lucas 12:24, 27-30.) Puwede kutanang ibang hayop o tinanom an sinambit ni Jesus, pero pinili niya an gamgam asin burak na pamilyar na marhay sa mga disipulo niya. Kan mga oras na idto, posibleng may nahihiling an mga disipulo na nagraralayog-layog na mga uwak sa itaas ninda asin nagbubukad na mga burak sa kalangtadan. Naiimahinar mo daw si Jesus na pigtutukdo an mga iyan mantang nagtataram? Asin ano an ginibo niya pagkatapos na sambiton an mga halimbawang iyan? Tinukduan niya an saiyang mga disipulo nin sarong mapuwersang leksiyon manungod sa pagkabukas-palad asin kabuutan kan saindang Ama sa langit: Papakakanon asin babaduan ni Jehova an saiyang maimbod na mga lingkod arog kan ginigibo niya sa mga uwak asin mga liryo sa kalangtadan.

5. Anong mga halimbawa hali sa mga linalang an puwedeng gamiton kan mga magurang para tukduan an saindang aki manungod ki Jehova?

⁵ Mga magurang, aarugon daw nindo an paagi nin pagtutukdo ni Jesus? Puwede nindong sabihon sa saindong aki an saro sa mga linalang na personal mong nagustuhan, arog kan paborito mong hayop o tinanom. Mantang ginigibo iyan, siguraduhon na maipaliwanag kun ano an itinutukdo kan halimbawang iyan manungod ki Jehova. Dangan puwede mong haputon an saimong aki manungod sa paborito niyang hayop o tinanom. Kun gagamiton mo an saro sa mga linalang na nagugustuhan niya, posible pa ngani na magdangog siyang marhay pag ipinapakipag-ulay mo an manungod sa mga kuwalidad ni Jehova.

6. Ano an manunudan niyato sa halimbawa kan ina ni Christopher?

⁶ Kaipuhan daw kan mga magurang na magtao nin dakul na panahon para mag-research manungod sa sarong hayop o tinanom bago ipakipag-ulay kun ano an itinutukdo kaiyan manungod ki Jehova? Dai man. Dai nagtao si Jesus nin halabang paliwanag mapadapit sa kun paano magkakan an mga uwak o kun paano minatubo an mga liryo. Totoo, puwedeng magustuhan paminsan-minsan kan saimong aki an detalyadong pag-uulay manungod sa mga linalang, pero kun minsan an sarong simpleng obserbasyon o hapot igo na para maipaliwanag an punto. Mangnuhon an nagigirumduman kan brother na si Christopher kan aki pa siya: “Paagi sa simpleng pagkomento manungod sa mga linalang na yaon sa palibot mi, tinatabangan kami kaidto ni Mama na mapahalagahan an mga iyan. Halimbawa, pag harani kami sa kabukidan, sinasabi niya: ‘Uy, hilinga nindo. Dakulaon saka magayunon an mga bukid! Makangangalas talaga si Jehova ano?’ O pag harani kami sa kadagatan, sinasabi niya: ‘Uy, hilinga nindo. Makusugon an mga alon! Makapangyarihan talaga si Jehova ano?’” Sinabi ni Christopher: “An simple asin nakakapaisip na mga komentong iyan nagkaigwa nin dakulaon na epekto sa samo.”

7. Paano nindo puwedeng sanayon an saindong mga aki na pag-isipan an manungod sa mga linalang?

⁷ Mantang nagdadakula an saindong mga aki, puwede nindong sanayon sinda na urog pang pag-isipan an manungod sa mga linalang asin kun ano an manunudan ninda diyan manungod sa personalidad ni Jehova. Puwede nindong ipakipag-ulay an dawa saro lang sa mga linalang nin Diyos asin haputon an saindong mga aki, “Ano an itinutukdo kaini saindo manungod ki Jehova?” Tibaad masurpresa ka na madangog an sasabihon ninda.—Mat. 21:16.

NUARIN NINDO PUWEDENG GAMITON AN MGA LINALANG PARA TUKDUAN AN SAINDONG MGA AKI?

8. Igwa nin anong oportunidad an mga magurang na Israelita pag nagbabaklay sinda “sa tinampo”?

⁸ Sinadol an mga magurang na Israelita na itukdo sa saindang mga aki an mga pagbuot ni Jehova pag naglalakaw “sa tinampo.” (Deu. 11:19) May mga tinampo sa palibot kan Israel. May mahihiling diyan na manlain-lain na mga hayop, mga gamgam, asin mga burak. Pag nagbabaklay an mga pamilyang Israelita, may oportunidad an mga magurang na pukawon an interes kan mga aki ninda manungod sa mga linalang ni Jehova. Mga magurang, posibleng may arog man kamo kaiyan na oportunidad na gamiton an mga linalang sa pagtukdo sa saindong mga aki. Pag-isipan kun paano iyan ginibo nin nagkapirang magurang.

9. Ano an manunudan mo ki Punitha asin Katya?

⁹ An ina na si Punitha, na nakaistar sa dakulang siyudad sa India, nagsabi: “Pag nagbibisita kami sa mga kapamilya mi sa probinsiya, ibinibilang mi iyan na oportunidad para tabangan an samong mga aki na makanuod manungod sa makangangalas na mga linalang ni Jehova. Sa hiling ko mas nasasabutan kan mga aki an manungod sa mga linalang pag harayo sinda sa matawong tinampo saka matrapik na siyudad.” Mga magurang, posibleng dai malilingawan kan mga aki nindo an panahon na nakaibanan ninda kamo sa sarong magayon na lugar. An sister na si Katya na taga Moldova, nagsabi: “An pinakadai ko malilingawan kan aki pa ako iyo idtong mga panahon na kaibanan ko an mga magurang ko sa probinsiya. Nagpapasalamat talaga ako sa pagtukdo ninda sako kan aki pa ako na magpundo nguna saka obserbaran an mga ginibo ni Jehova asin isip-isipon kun anong mga kuwalidad niya an ipinapahiling kan mga iyan.”

10. Ano an magigibo kan mga magurang kun dipisil an pagbiyahe parayo sa siyudad? (Hilingon an kahon na “Tabang Para sa mga Magurang.”)

¹⁰ Paano kun dai posible na makaduman kamo sa probinsiya? Si Amol na nakaistar man sa India, nagsabi: “Sa lugar mi, dakul na oras an ginagamit kan mga magurang sa pagtrabaho, saka puwedeng magin magastos an pagbiyahe pasiring sa probinsiya. Pero, puwedeng magduman sa sadit na parke o sa beranda sa rooftop para obserbaran an mga linalang asin ipakipag-ulay an mga kuwalidad ni Jehova.” Kun mangangalag-kalag kang marhay, posible man na dakul kang mahihiling na mga linalang harani sa saindong harong na puwede mong ipahiling sa saimong mga aki. (Sal. 104:24) Posibleng may mahiling kang mga gamgam, insekto, tinanom, asin iba pa. Si Karina na taga Germany, nagsabi: “Gustong-gusto ni Mama an mga burak, kaya kan aki pa ako, may itutukdo siya kaiyan na magayon na mga burak kada maglakaw-lakaw kami sa luwas.” Mga magurang, puwede man nindong gamiton an dakul na video asin mga publikasyon mapadapit sa paglalang na ginibo kan satong organisasyon para matukduan nindo an saindong mga aki. Iyo, ano man an saindong kamugtakan, matatabangan nindo an saindong mga aki na obserbaran an mga linalang nin Diyos. Pag-ulayan ta ngunyan an pira sa mga kuwalidad ni Jehova na puwede nindong itukdo sa saindong mga aki.

AN “DAI NAHIHILING NA MGA KUWALIDAD [NI JEHOVA] MALINAW NA NAHIHILING”

11. Paano matatabangan kan mga magurang an saindang mga aki na mahiling an pagkamuot ni Jehova?

¹¹ Para matabangan an saindong mga aki na mahiling an pagkamuot ni Jehova, puwede nindong ipaliwanag sa sainda an mamumuton na pag-ataman kan dakul na mga hayop sa saindang mga ugbon. (Mat. 23:37) Puwede man nindong itampok an magayunon na pagkakalain-lain kan mga linalang na ikinakaugma tang marhay. Si Karina na sinambit sa inutan, nagsabi: “Pag naglalakaw-lakaw kami kaidto ni Mama, pirmi niyang sinasabi sako na magpundo nguna para obserbaran kun paano napapalain an lambang burak asin kun paano ipinapahiling kan kagayunan kaiyan an pagkamuot ni Jehova. Dawa mga taon na an naglihis, pinagmamasdan ko pa man giraray na marhay an mga burak—an saindang pagkakalain-lain, disenyo, saka kulor. Padagos kaiyan na ipinapagirumdom sa sako kun gurano kita kanamumutan ni Jehova.”

12. Paano matatabangan kan mga magurang an saindang mga aki na mahiling an kadunungan nin Diyos? (Salmo 139:14) (Hilingon man an ritrato.)

¹² Tabangan an saindong mga aki na mahiling an kadunungan nin Diyos. Si Jehova mas madunong nanggad kisa sa sato. (Roma 11:33) Halimbawa, puwede mong sambiton kun paano nagigibo kan tubig na napopormang panganuron na magianon sanang maglataw-lataw hali sa sarong lugar pasiring sa sarong lugar. (Job 38:36, 37) Puwede mo man na itampok an makangangalas na pagkadisenyo kan hawak nin tawo. (Basahon an Salmo 139:14.) Mangnuhon kun paano iyan ginibo kan sarong ama na si Vladimir. Sinabi niya: “Sarong aldaw, natumba an aki ming lalaki mantang nagbibisikleta asin nabakrusan an tuhod niya. Pakalihis nin pirang aldaw, rahay na an lugad. Ipinaliwanag ming mag-agom na dinisenyo ni Jehova an satong mga selula na may kakayahan na paumayan an sadiri. Sinabi mi na wara kitang mahihiling na arog kaiyan sa mga ginibo nin tawo. Halimbawa, dai kaya nin sarong awto na hirahayon an sadiri pagkatapos na maaksidente iyan. Nakatabang sa aki mi an pangyayaring idto na masabutan an kadunungan ni Jehova.”

13. Paano matatabangan kan mga magurang an saindang mga aki na mahiling an kapangyarihan nin Diyos? (Isaias 40:26)

¹³ Inaagda kita ni Jehova na magtangad sa langit asin pag-isipan kun paano pinapagdanay kan saiyang kapangyarihan an mga bituon sa kalangitan. (Basahon an Isaias 40:26.) Puwede nindong dagkahon an saindong mga aki na magtangad sa kalangitan asin pag-isipan an mga nahihiling ninda diyan. Mangnuhon an nagigirumduman kan sarong sister sa Taiwan na si Tingting kan siya aki pa: “Sarong beses, nag-camping kami kaidto ni Mama, tapos pinagmasdan mi an kalangitan sa banggi na dai naaagaw an samong atensiyon kan mga ilaw sa siyudad. Iyo idto su panahon na stress akong maray huli sa panggigipit kan mga kairiba tapos nahahadit ako na tibaad dai ako makapagdanay na maimbod ki Jehova. Pinakusog ako ni Mama na pag-isipan an manungod sa kapangyarihan na ginamit ni Jehova para lalangon an gabos na bituon asin tandaan na puwede nanggad Niyang gamiton an kapangyarihan na iyan para tabangan akong makayanan an ano man na pagbalo. Pagkatapos na mapagmasdan an mga linalang sa pagpasyar na idto, napahiro ako na mas bistuhon pa si Jehova, saka mas nagin determinado ako na paglingkudan siya.”

14. Paano puwedeng gamiton kan mga magurang an mga linalang para mahiling kan mga aki ninda na si Jehova sarong maugmang Diyos?

¹⁴ Ipinapahiling kan mga linalang ni Jehova na siya maugma asin mapagpangisi. Naobserbaran kan mga siyentista na kadaklan sa mga hayop nagkakawat, kaiba na an mga gamgam saka sira. (Job 40:20) Nahiling mo na daw an mga aki mo na grabe an ngisi mantang pighihiling an nagkakawat na mga hayop? Tibaad nakahiling sinda nin kuting na may piglalapag na sadit na bola o mga ido na nagkakarawat asin naggugurumulan. Sa sunod na mahiling mo an saimong mga aki na nagngingirisi mantang pighihiling an makangingising mga hiro kan mga hayop, taano ta dai ipagirumdom sainda na an pinaglilingkudan ta sarong maugmang Diyos?—1 Tim. 1:11.

IKAUGMA AN MGA LINALANG NI JEHOVA BILANG SARONG PAMILYA

15. Ano an makakatabang sa mga magurang na makua an buot kan mga aki ninda para maaraman an saindang mga iniisip? (Talinhaga 20:5) (Hilingon man an ritrato.)

¹⁵ Kun minsan, tibaad masakitan an mga magurang na dagkahon an mga aki ninda na sabihon sa sainda an mga problemang inaagihan kan mga ini. Kun arog kaiyan an sitwasyon mo, tibaad kaipuhan mong makua an buot ninda para maaraman an saindang iniisip. (Basahon an Talinhaga 20:5.) Para sa nagkapirang magurang, mas madali iyan na gibuhon pag nasa luwas sinda asin nag-e-enjoy sa naturalesa kaiba an mga aki ninda. Taano? An sarong dahilan iyo na mas dikit an puwedeng makadisturbo sa mga aki asin sa mga magurang. An sarong ama na taga Taiwan na si Masahiko nagsambit nin saro pang dahilan: “Pag kaibanan mi an samong mga aki sa pagpasyar sa luwas—sa pag-hiking sa mga bulod o paglakaw-lakaw sa baybayon—sa parati mas relaks sinda. Kaya mas madali samo na makua an buot ninda asin aramon kun ano an iniisip ninda.” Si Katya, na sinambit sa inutan, nagsabi: “Pagluwas sa eskuwelahan, pig-iiba ako kaidto ni Mama sa sarong magayon na parke. Sa relaks na lugar na iyan, mas madali para sako na sabihon saiya an mga nangyari sa eskuwelahan o kun ano an mga ikinakahadit ko.”

16. Paano puwedeng magrelaks asin mag-ugma an mga pamilya mantang nag-e-enjoy sa mga linalang ni Jehova?

¹⁶ An mga linalang ni Jehova nagtatao man sa mga pamilya nin pagkakataon na magrelaks asin mag-enjoy, asin napapakusog kaiyan an saindang pag-iribanan. Sinasabi kan Bibliya na may “panahon na magngisi” asin “panahon na maglukso-lukso.” (Ecl. 3:1, 4, nota sa ibaba) Paagi sa mga linalang ni Jehova, tinawan niya kita nin magayon na mga lugar na diyan puwede tang magibo an mga bagay na ikinakaugma ta. Dakul na pamilya an gustong magduman nin iriba sa sarong eco park, sa luwas kan siyudad, sa mga bulod, o sa gilid nin dagat. May mga aki na gustong-gustong magdalagan asin magkawat sa sarong parke, magmasid sa mga hayop, o maglangoy sa salog, sa danaw, o sa dagat. Marahayon nanggad na pagkakataon na maglibang pag kita nasa luwas asin napapalibutan kan mga bagay na ginibo ni Jehova!

17. Taano ta dapat tabangan kan mga magurang an saindang mga aki na ikaugma an mga linalang nin Diyos?

¹⁷ Sa bagong kinaban nin Diyos, lubos na ikakaugma kan mga magurang asin mga aki an mga linalang ni Jehova. Bakong arog sa ngunyan, mayo na duman nin dahilan para matakot kita sa mga hayop asin an mga hayop dai na man matatakot sa sato. (Isa. 11:6-9) Ikakaugma ta an mga ginibo ni Jehova sagkod sa panahon na daing katapusan. (Sal. 22:26) Pero mga magurang, dai na paghalaton an panahon na iyan para tabangan an saindong mga aki na punan na ikaugma an mga linalang. Mantang ginagamit nindo an mga linalang para tukduan an saindong mga aki manungod ki Jehova, posibleng marhay na mag-uyon sinda sa sinabi ni Hading David: “O Jehova, mayo nin mga gibo na arog kan sa saimo.”—Sal. 86:8.