Tama Asin Sala: Sarong Hapot na Inaatubang kan Gabos sa Sato

Kun gusto mong magduman sa sarong lugar na dai mo pa lamang nadumanan, ano an gigibuhon mo?

1. 1. Magpasiring sa direksiyon na sa hiling mo iyo an dapat mong dumanan.

2. 2. Sundan an iba asin maglaom na sana na aram ninda an dalan.

3. 3. Magkonsulta sa sarong masasarigan na giya, arog nin GPS, mapa, o sarong mapagtitiwalaan na amigo na nakakaaram kan dalan.

Kun pipilion ta an inot o ikaduwang opsiyon, makakaabot man kita sa sarong lugar pero bako sa lugar na gusto tang dumanan. Pero kun pipilion ta an ikatulo, siguradong makakaabot kita sa satong destinasyon.

An satong buhay garo pagbiyahe—saro na linalauman tang madara sa sato sa sarong maugmang puturo. Para makaabot diyan, nakadependeng marhay iyan sa paggiyang pinipili ta pag naggigibo kita nin mga desisyon.

Kadaklan sa mga ginigibo tang desisyon saradit sana, pero may mga desisyon man kita na talagang importanteng marhay. Ipinapahiling kan mga desisyon na iyan kun ano an pamantayan ta sa moral—an pagmansay ta sa kun ano an tama asin sala. An siring na mga desisyon igwa nin panghaluyan na epekto sa sato asin sa mga mahal ta sa buhay, magsalang marahay o maraot. Kaiba sa mga desisyon na ginigibo ta iyo an manungod sa:

• Sex asin pag-inaguman

• Pagigin onesto, trabaho, asin kuwarta

• Kun paano papadakulaon an mga aki

• Kun paano tatrataron an iba

Paano mo masisigurado na an pinipili mong desisyon sa mga bagay na ini matao saimo asin sa pamilya mo nin maugmang puturo?

An hapot na inaatubang kan lambang saro sa sato iyo ini: Ano an makakatabang sako na makagibo nin madunong na mga desisyon manungod sa kun ano an tama asin kun ano an sala?

Ipapaliwanag sa magasin na ini kun taano ta makakapagtiwala ka sa sinasabi kan Bibliya manungod sa kun ano an tama asin sala saka kun paano iyan makakatabang sa saimo.