Dai Mag-atraso sa Pagpabawtismo

1. Ano an nagkapirang marahay na dahilan para magpabawtismo?

NAMUMUTAN mo daw an Diyos na Jehova, an saro na nagtao saimo kan lambang marahay na regalo, pati ngani kan saimong buhay? Gusto mo daw na ipahiling saiya na namumutan mo siya? An pinakamarahay na paagi na gibuhon iyan iyo na idusay mo an saimong sadiri sa saiya dangan simbolisaran iyan paagi sa bawtismo sa tubig. Pag ginibo mo iyan, magigin parte ka kan pamilya ni Jehova. Bilang resulta, an saimong Ama asin Amigo gigiyahan ka asin aatamanon huling magigin saiya ka na. (Sal. 73:24; Isa. 43:1, 2) An pagdusay asin bawtismo nagtatao man saimo kan paglaom na magkaigwa nin buhay na daing katapusan.—1 Ped. 3:21.

2. Ano an pag-uulayan ta sa artikulong ini?

² May nakakapugol daw sa saimo na magpabawtismo? Kun igwa, dai ka nagsosolo. Kinaipuhan kaidto kan minilyon na tawo na gumibo nin mga pagbabago sa saindang paggawi asin paagi nin pag-iisip tanganing makuwalipikar sa bawtismo. Naglilingkod na sinda ngunyan ki Jehova nin may kaugmahan asin kaigutan. Ano an manunudan mo sa nagkapirang nabawtismuhan kaidtong inot na siglo? Pag-ulayan ta an mga ulang na napaatubang sa sainda asin hilingon kun ano an manunudan ta sa saindang halimbawa.

NABAWTISMUHAN AN MGA SAMARITANO

3. Anong mga ulang sa pagpabawtismo an posibleng napaatubang sa nagkapirang Samaritano?

³ An mga Samaritano kan panahon ni Jesus kabilang sa sarong sekta. An dakul sa sainda nakaistar sa palibot kan suanoy na Sekem asin sa Samaria, sa norte kan Judea. Tanganing mabawtismuhan an mga Samaritano, kaipuhan nguna nindang akuon an bilog na Tataramon nin Diyos asin urog pang makanuod diyan. An inaako lang kaya kan mga Samaritano bilang ipinasabong iyo an inot na limang libro kan Bibliya—an Genesis sagkod sa Deuteronomio—asin posibleng an libro nin Josue. Pero inaasahan kan mga Samaritano na maabot an Mesiyas base sa panuga nin Diyos na mababasa sa Deuteronomio 18:18, 19. (Juan 4:25) Tanganing mabawtismuhan, kaipuhan nindang akuon si Jesus bilang an ipinanugang Mesiyas. Iyan mismo an ginibo kan “dakul sa mga Samaritano.” (Juan 4:39) Haloy nang may pagpalain-lain sa pag-ultanan kan mga Samaritano asin kan mga Judio kaya tibaad kinaipuhan man kan nagkapirang Samaritano na halion an arog kaiyan na kaisipan.—Luc. 9:52-54.

4. Kauyon kan Gibo 8:5, 6, 14, ano an ginibo kan nagkapirang Samaritano kan maghulit sa sainda si Felipe?

⁴ Ano an nakatabang sa mga Samaritano para mabawtismuhan? Kan si Felipe na ebanghelisador ihulit “sa [mga taga Samaria] an Cristo,” “inako kan [nagkapira sa sainda] an tataramon nin Diyos.” (Basahon an Gibo 8:5, 6, 14.) Dawa ngani Judio si Felipe, nagdangog sinda sa saiya. Tibaad may nagirumduman sindang mga bersikulo sa Pentateuch na nagsasabing an Diyos mayo nin pinapalain. (Deu. 10:17-19) Ano man an dahilan, ‘nagdangog sinda sa mga sinabi’ ni Felipe mapadapit sa Cristo, asin inako ninda an malinaw na ebidensiya na yaon ki Felipe an espiritu nin Diyos. Nagsasagibo man siya nin dakul na tanda, kaiba na an pagpaumay sa mga may hilang asin pagpalayas nin mga demonyo.—Gibo 8:7.

5. Ano an mga manunudan mo sa mga Samaritano?

⁵ An pagpalain-lain saka kakulangan nin kaaraman kan mga Samaritanong idto puwede kutanang nakaulang sa sainda na umuswag. Pero dai ninda iyan tinugutan na mangyari. Dai nag-atraso na magpabawtismo an mga Samaritano pagkatapos sindang makumbinsir na an itinukdo sa sainda ni Felipe iyo an katotoohan. Ini an sabi sa salaysay kan Bibliya: “Kan magtubod sinda ki Felipe, na nagpahayag kan maugmang bareta manungod sa Kahadian nin Diyos asin sa pangaran ni Jesu-Cristo, nabawtismuhan sinda, mga lalaki pati mga babayi.” (Gibo 8:12) Kumbinsido ka daw na an Tataramon nin Diyos iyo an katotoohan asin na hinihinguwa nanggad kan mga Saksi ni Jehova na dai magpalain-lain asin na magpahiling sa lambang saro nin tunay na pagkamuot—an midbidan kan tunay na mga Kristiyano? (Juan 13:35) Kun siring magdesisyon nang magpabawtismo, na nagtitiwalang bebendisyunan ka ni Jehova.

6. Ano an manunudan mo sa halimbawa ni Ruben?

⁶ Si Ruben, na taga Germany, nagdakula sa pamilyang Saksi. Pero, kan siya hoben pa, nagduda siya kun baga nag-eeksister si Jehova. Paano niya nahali an saiyang pagduda? Narealisar niyang kulang an saiyang kaaraman, kaya may ginibo siya. Sinabi niya: “Sa personal study ko, kinaipuhan kong aramon kun ano talaga an totoo. Kaya pinag-adalan ko nin nagkapirang beses an manungod sa ebolusyon.” Binasa niya an librong Is There a Creator Who Cares About You? Dakula an naitabang ki Ruben kan publikasyon na iyan. Naisip niya: ‘Wow! Totoo si Jehova.’ Asin kan magpasyar siya sa world headquarters, lalong naapresyar ni Ruben an satong nagkakasararong internasyonal na kasararuan nin magturugang. Pagbalik niya sa Germany, nagpabawtismo si Ruben sa edad na 17. Kun may mga pagduda ka, mag-research sa satong mga publikasyon. Mahahali kan “tamang kaaraman” an mga pagduda. (Efe. 4:13, 14) Asin pag nakakadangog ka nin mga eksperyensiya manungod sa pagkamuot asin pagkasararo kan mga lingkod ni Jehova sa ibang mga parte kan kinaban asin pag nahihiling mo mismo iyan sa saindong kongregasyon, lalo mong maaapresyar an satong pambilog na kinaban na kasararuan nin magturugang.

NABAWTISMUHAN SI SAULO NA TAGA TARSO

7. Anong kaisipan an kinaipuhan na itanos ni Saulo?

⁷ Pag-isipan an halimbawa ni Saulo na taga Tarso. Marikas an pag-uswag niya kaidto sa Judaismo asin nagigin prominente na siya sa mga kapwa niya Judio. (Gal. 1:13, 14; Fil. 3:5) Kan panahon na ibinibilang kan dakul na Judio na mga apostata an mga Kristiyano, pinersegir sinda ni Saulo nin may grabeng kaanggutan. An paghuna niya kaya ginigibo niya an kabutan nin Diyos. (Gibo 8:3; 9:1, 2; 26:9-11) Tanganing magibo ni Saulo na akuon si Jesus asin mabawtismuhan bilang sarong Kristiyano, kaipuhan niyang magin andam man mismong mapaatubang sa persekusyon.

8. (a) Ano an nakatabang ki Saulo para mabawtismuhan? (b) Uyon sa Gibo 22:12-16, paano tinabangan ni Ananias si Saulo? (Hilingon man an ritrato.)

⁸ Ano an nakatabang ki Saulo para mabawtismuhan? Kan magpahiling sa saiya an pinamuraway na Kagurangnan na Jesus, nabuta si Saulo. (Gibo 9:3-9) Sa laog nin tulong aldaw, dai siya nagkakan ni nag-inom asin siguradong hinurop-hurop niya an nangyari pa sana sa saiya. Iyo, nakumbinsir si Saulo na si Jesus an Mesiyas asin na isinasagibo kan mga parasunod niya an tunay na pagsamba. Siyertong grabe an pagbasol ni Saulo sa nagin kabtang niya sa paggadan ki Esteban! (Gibo 22:20) Sa katapusan kan tulong aldaw, sarong disipulo na an pangaran Ananias an mabuot na nagdulok ki Saulo, ibinalik an paghiling kaini, asin dinagka ining magpabawtismo tulos. (Basahon an Gibo 22:12-16.) Mapakumbabang inako ni Saulo an tabang asin pinunan an sarong bagong paagi nin pamumuhay.—Gibo 9:17, 18.

9. Ano an mga manunudan mo ki Saulo?

⁹ May mga manunudan kita ki Saulo. Puwede kutanang nakaulang sa saiya na mabawtismuhan an kapalangkawan o pagkatakot sa tawo. Pero dai niya iyan tinugutan na mangyari. Mapakumbabang binago ni Saulo an saiyang pamumuhay kan akuon niya an katotoohan manungod sa Cristo. (Gibo 26:14, 19) Andam si Saulo na magin Kristiyano dawa ngani aram niyang pepersegiron siya. (Gibo 9:15, 16; 20:22, 23) Pagkatapos na mabawtismuhan, padagos siyang nagsarig ki Jehova na tatabangan Niya siyang matagalan an manlain-lain na pagbalo. (2 Cor. 4:7-10) Pag nabawtismuhan ka bilang sarong Saksi ni Jehova, tibaad mapaatubang ka sa mga pagbalo sa saimong pagtubod, pero may matabang sa saimo. Makakapagtiwala ka na pirmi kang tatabangan nin Diyos asin ni Cristo.—Fil. 4:13.

10. Ano an manunudan mo sa halimbawa ni Anna?

¹⁰ Si Anna nagdakula sa sarong pamilyang Kurdish sa Sirangan na Europa. Pagkatapos na mabawtismuhan an saiyang ina, kan si Anna nuwebe anyos, tinugutan siya kan saiyang ama na magpuon na mag-adal nin Bibliya. Alagad, dai ini nagustuhan kan iba pang mga paryente niya, na nakairistar kairibanan kan pamilya ni Anna. Para sa mga paryente niya, sarong kasusupgan na bayaan nin saro an relihiyon kan saindang mga apuon. Kan si Anna 12 anyos, nakiulay siya sa saiyang ama na tugutan siyang magpabawtismo. Gustong maaraman kan saiyang ama kun personal na desisyon iyan ni Anna o kun may nagpipirit lang saiya. Nagsimbag si Anna: “Namumutan ko po si Jehova.” Nagtugot an saiyang ama na magpabawtismo siya. Pagkatapos kaiyan, nakaeksperyensiya si Anna nin manlain-lain na pagtuya asin bakong marahay na pagtrato. Sinabi saiya kan saro sa mga paryente niya, “Mas marahay pang mamuhay ka nin imoral saka magsigarilyo kisa magin Saksi ka ni Jehova.” Paano iyan natagalan ni Anna? Sinabi niya, “Tinabangan ako ni Jehova na magin marigon saka suportadong marhay ako ni Mama saka ni Papa.” Isinusurat ni Anna an espesipikong mga pagkakataon na namatian niyang tinabangan siya ni Jehova. Hinihiling niya iyan sa pana-panahon tanganing dai niya malingawan kun paano siya tinabangan ni Jehova. Kun natatakot kang mapaatubang sa pagkontra, tandaan na tatabangan ka man ni Jehova.—Heb. 13:6.

NABAWTISMUHAN SI CORNELIO

11. Ano kuta an puwedeng magin dahilan na mag-atraso si Cornelio na magpabawtismo?

¹¹ An saro pang halimbawa sa Bibliya iyo si Cornelio. Saro siyang “senturyon,” an buot sabihon, namamayo siya sa mga 100 na suldados sa hukbong Romano. (Gibo 10:1, nota sa ibaba) Huli kaiyan, posibleng irinerespeto siyang marhay kan mga tawo asin mga suldados. “Dakul siyang itinataong tabang sa mga pobre.” (Gibo 10:2) Isinugo ni Jehova si apostol Pedro tanganing ipahayag sa saiya an maugmang bareta. Nagin dahilan daw an katungdan ni Cornelio para mag-atraso siyang magpabawtismo?

12. Ano an nakatabang ki Cornelio para mabawtismuhan?

¹² Ano an nakatabang ki Cornelio para mabawtismuhan? Mababasa niyato na “may pagkatakot [siya] sa Diyos pati na an bilog niyang pamilya.” Asin pirmi siyang nagngangayo-ngayo sa Diyos. (Gibo 10:2) Kan ipahayag ni Pedro ki Cornelio an maugmang bareta, inako niya saka kan saiyang pamilya si Cristo asin nagpabawtismo tulos. (Gibo 10:47, 48) Daing duda na andam si Cornelio na gibuhon an ano man na pagbabagong hinahagad sa saiya tanganing masamba niya saka kan saiyang pamilya si Jehova.—Jos. 24:15; Gibo 10:24, 33.

13. Ano an mga manunudan mo ki Cornelio?

¹³ Arog ni Saulo, an katungdan ni Cornelio puwede kutanang nakaulang sa saiya na magin Kristiyano. Pero dai niya iyan tinugutan na mangyari. An pag-ako mo daw kan katotoohan mangangahulugan na kakaipuhanon mong gumibo nin darakulang pagbabago sa saimong buhay? Kun iyo, si Jehova magigin saimong Paratabang. Bebendisyunan niya an saimong determinasyon na maglingkod sa saiya kauyon kan mga prinsipyo sa Bibliya.

14. Ano an manunudan mo sa halimbawa ni Tsuyoshi?

¹⁴ Si Tsuyoshi na taga Japan, kinaipuhan na gumibo nin pagbabago sa saiyang trabaho tanganing makuwalipikar sa bawtismo. Assistant siya kan headmaster kan Ikenobo, sarong eskuwelahan nin pag-ayos nin mga burak. Pag an headmaster dai makakaatender sa mga lubong, si Tsuyoshi an parating nagigin representante niya sa mga ritwal nin Budismo. Alagad, kan maaraman ni Tsuyoshi an katotoohan manungod sa kagadanan, an mga ritwal na iyan nagin ulang sa pagpabawtismo niya. Personal siyang nagdesisyon na dai makikabtang sa mga seremonya nin Budismo. (2 Cor. 6:15, 16) Nakipag-ulay si Tsuyoshi sa headmaster manungod sa bagay na iyan. An resulta? Dai siya hinali sa trabaho saka dai na man pinapartisipar sa mga ritwal. Nabawtismuhan siya mga sarong taon puon kan mag-adal siya nin Bibliya.a Kun kaipuhan mong gumibo nin pagliliwat may koneksiyon sa saimong trabaho tanganing mapaugma an Diyos, makakasigurado ka na itatao niya sa saimo saka sa saimong pamilya an mga pangangaipo nindo.—Sal. 127:2; Mat. 6:33.

NABAWTISMUHAN AN MGA TAGA CORINTO

15. Anong mga ulang sa pagpabawtismo an napaatubang sa mga taga Corinto?

¹⁵ Midbid an suanoy na Corinto sa pagigin materyalistiko asin sa kawaran nin pagpupugol sa moral. An dakul na nakaistar diyan namumuhay sa paaging dai inuuyunan nin Diyos. Malinaw na an siring na mga kamugtakan dipisil nanggad para sa siisay man na gustong mag-ako kan maugmang bareta. Alagad, kan mag-abot si apostol Pablo sa siyudad na iyan asin maghulit kan maugmang bareta manungod sa Cristo, “an dakul sa mga taga Corinto na nakadangog kan mensahe nagturubod asin nabawtismuhan.” (Gibo 18:7-11) Dangan nagpahiling ki Pablo an Kagurangnan na Jesu-Cristo paagi sa sarong bisyon asin nagsabi: “An dakul na tawo sa siyudad na ini sakuya.” Kaya padagos na naghulit diyan si Pablo sa laog nin saro may kabangang taon.

16. Ano an nakatabang sa nagkapira sa Corinto na mahali an mga nakakaulang sa sainda para mabawtismuhan? (2 Corinto 10:4, 5)

¹⁶ Ano an nakatabang sa mga taga Corinto para mabawtismuhan? (Basahon an 2 Corinto 10:4, 5.) An Tataramon nin Diyos asin an saiyang mapuwersang banal na espiritu nakatabang sa sainda na gumibo nin darakulang pagbabago sa saindang buhay. (Heb. 4:12) An mga taga Corinto na nag-ako kan maugmang bareta manungod ki Cristo nagibong bayaan an mga kinatudan asin gibo-gibo na arog kan pagburat, paghabon, saka homoseksuwalidad.—1 Cor. 6:9-11.b

17. Ano an manunudan mo sa mga taga Corinto?

¹⁷ Mangnuhon na dawa ngani may mga taga Corinto na igwa nin haloy nang mga kinatudan na kaipuhan halion, dai ninda inisip na dipisilon para sa sainda na magin Kristiyano. Nagmaigot sindang marhay tanganing makalaog sa piot na dalan na pasiring sa buhay na daing katapusan. (Mat. 7:13, 14) Nasasakitan ka daw na mahali an sarong bisyo, maraot na ugali, o salang paggawi tanganing mabawtismuhan? Dai sumuko! Makimahirak ki Jehova na tabangan ka kan saiyang banal na espiritu na malabanan an makusog na pagmawot na gumibo nin sala.

18. Ano an nanudan mo sa halimbawa ni Monika?

¹⁸ Si Monika, na taga Georgia, nagmaigot na halion an rapsak na pananaram asin ipundo an paghiling saka pagdangog nin maraot na mga libangan tanganing umuswag sagkod na mabawtismuhan. Sinabi niya: “Kan tin-edyer ako, sa pamibi ako nagkukua nin kusog. Aram ni Jehova na gusto kong gibuhon an tama, asin pirmi niya akong tinatabangan saka ginigiyahan.” Nabawtismuhan si Monika sa edad na 16. May mga gibo daw na kaipuhan mong halion tanganing makapaglingkod ka ki Jehova sa paaging inuuyunan niya? Padagos na hagadon sa saiya an puwersa para magibo an kinakaipuhan na mga pagbabago. Bulaos na itinatao ni Jehova an saiyang banal na espiritu.—Juan 3:34.

AN SAIMONG PAGTUBOD MAKAKAPALIPAT NIN MGA BUKID

19. Ano an makakatabang sa saimo na mahali an arog-bukid na mga ulang? (Hilingon man an ritrato.)

¹⁹ Maniwala ka na namumutan ka ni Jehova asin gusto ka niyang magin parte kan saiyang pamilya. Totoo iyan ano man na ulang sa pagpabawtismo an mapaatubang sa saimo. Sinabi ni Jesus sa sarong grupo nin mga disipulo niya kan inot na siglo: “Kun igwa kamong pagtubod na siring kasadit kan pisog nin mustasa, sasabihon nindo sa bukid na ini, ‘Maglipat ka, hali digdi pasiring duman,’ dangan malipat iyan, asin dai nin ano man na magigin imposible sa saindo.” (Mat. 17:20) An mga nakadangog kaiyan pirang taon pa lang na nakaibanan ni Jesus kaya an saindang pagtubod nagtatalubo pa sana. Alagad inasigurar sinda ni Jesus na kun magkakaigwa sinda nin supisyenteng pagtubod, tatabangan sinda ni Jehova na mailipat an arog-bukid na mga ulang. Tatabangan ka man ni Jehova na magibo iyan!

20. Paano nakatabang sa saimo an mga halimbawa kan mga Kristiyano kan inot na siglo asin sa presenteng panahon na sinambit sa artikulong ini?

²⁰ Kun mahiling mong may mga nakakaulang sa saimo na mabawtismuhan, gumibo tulos nin aksiyon para mahali iyan. Mararanga ka asin mapapakusog kan mga halimbawa kan mga Kristiyano kan inot na siglo asin sa presenteng panahon. Lugod na an saindang halimbawa makadagka asin makapahiro saimo na idusay an saimong sadiri ki Jehova asin magpabawtismo. Iyan an pinakamarahay na desisyon na puwede mong gibuhon!