Arugon an Paagi nin Pag-iisip ni Jehova Asin ni Jesus

1-2. Ano an kalabot sa pagkamuot ki Jehova, asin paano iyan ipinahiling ni Jesus?

“KAMUTAN mo si Jehova na saimong Diyos sa bilog mong puso asin sa bilog mong kalag saka sa bilog mong kusog pati sa bilog mong isip.” (Luc. 10:27) Malinaw na sinambit ni Jesus na ini an pinakamahalagang pagbuot sa Katugunan ni Moises. Mangnuhon na kalabot sa pagkamuot niyato ki Jehova an satong puso, na diyan kaiba an satong mga pagmawot, mga pagmati, asin mga emosyon. Kalabot man diyan an satong bilog na kalag na debosyon asin an satong kusog. Pero kalabot man sa pagkamuot niyato ki Jehova an satong isip, na diyan kaiba an paagi niyato nin pag-iisip manungod sa mga bagay-bagay. Siyempre, nungka tang lubos na masasabutan an gabos na kaisipan ni Jehova. Pero urog niyatong masasabutan an kaisipan nin Diyos paagi sa pag-adal sa “pag-iisip ni Cristo” huling perpektong naipahiling ni Jesus an kaisipan kan saiyang Ama.—1 Cor. 2:16 asin an study note na “taglay natin ang pag-iisip ni Kristo,” nwtsty-TG.

² Namutan ni Jesus si Jehova sa bilog niyang isip. Aram niya kun ano an kabutan nin Diyos para sa saiya asin determinado siyang humiro kauyon kaiyan, dawa mangangahulugan iyan na magsasakit siya alang-alang sa kun ano an tama. Huling nakapokus siya sa paggibo kan kabutan kan saiyang Ama, dai tinugutan ni Jesus an ano man na makadisturbo sa saiya sa pasuhan niyang iyan.

3. Ano an nanudan ni apostol Pedro ki Jesus, asin dinagka ni Pedro an saiyang mga kapwa Kristiyano na gibuhon an ano? (1 Pedro 4:1)

³ Nagkapribilehiyo si Pedro asin an saiyang mga kapwa apostol na makaibanan si Jesus asin direktang makanuod sa kun paano siya mag-isip. Kan gibuhon ni Pedro an inot na ipinasabong na surat niya, dinagka niya an mga Kristiyano na andamon an saindang sadiri na magkaigwa nin kaisipan na kapareho kan ki Cristo. (Basahon an 1 Pedro 4:1.) Sa orihinal na lengguwahe, sarong ekspresyon na pangmilitar an ginamit ni Pedro kan isurat niya: “Andamon . . . nindo an saindong sadiri.” Kaya kun inaarog kan mga Kristiyano an kaisipan ni Jesus, o paagi nin pag-iisip, magkakaigwa sinda nin mapuwersang armas sa saindang pakikipaglaban sa makasalan na mga tendensiya asin sa sarong kinaban na pinamamahalaan ni Satanas.—2 Cor. 10:3-5; Efe. 6:12.

4. Paano makakatabang sa sato an artikulong ini na masunod an sadol ni Pedro?

⁴ Sisiyasaton niyato an paagi nin pag-iisip ni Jesus asin aaramon kun paano niyato maaarog iyan. Aaramon ta (1) kun paano niyato maaarog an paagi nin pag-iisip ni Jehova, na makakatabang sa sato gabos na mag-isip na may pagkauruyon, (2) kun paano kita magigin mapakumbaba, asin (3) kun paano kita magkakaigwa nin tultol na isip paagi sa pagsarig ki Jehova sa pamibi.

ARUGON AN PAAGI NIN PAG-IISIP NI JEHOVA

5. Sa anong pangyayari dai naipahiling ni Pedro an kaisipan ni Jehova?

⁵ Pag-isipan an sarong pangyayari na diyan dai naipahiling ni Pedro an kaisipan ni Jehova sa mga bagay-bagay. Sinabi ni Jesus sa saiyang mga apostol na kaipuhan na magduman siya sa Jerusalem, itao sa kamot kan mga lider nin relihiyon duman, magsakit, dangan magadan. (Mat. 16:21) Posibleng nasakitan si Pedro na akuon na itutugot ni Jehova na gadanon si Jesus—an paglaom kan Israel asin an ipinanugang Mesiyas. (Mat. 16:16) Kaya irinayo nin dikit ni Pedro si Jesus asin sinabi: “Mahirak ka sa sadiri mo, Kagurangnan; dai lamang ini mangyayari sa saimo.” (Mat. 16:22) Huling dai naipahiling ni Pedro an kaisipan ni Jehova sa bagay na iyan, an kaisipan niya bakong kauyon kan ki Jesus.

6. Sa paanong paagi ipinahiling ni Jesus na an kaisipan niya kauyon kan kaisipan ni Jehova?

⁶ An kaisipan ni Jesus lubos na kauyon kan kaisipan kan saiyang Ama sa langit. Sinabi ni Jesus ki Pedro: “Diyan ka sa likod ko, Satanas! Nakakaulang ka sa sako, ta an mga pig-iisip mo bakong kaisipan nin Diyos, kundi kaisipan nin tawo.” (Mat. 16:23) Posible na marahay man an intensiyon ni Pedro, pero dai inako ni Jesus an sadol niya. May manunudan kita digdi. Bakong kabutan ni Jehova para ki Jesus na maglikay ini sa pagsakit. Sa pangyayaring iyan, nakanuod si Pedro nin sarong mahalagang leksiyon—kaipuhan niyang iuyon an saiyang kaisipan sa kaisipan ni Jehova.

7. Paano ipinahiling ni Pedro kan huri na gusto niyang iuyon an kaisipan niya sa paagi nin pag-iisip ni Jehova? (Hilingon an ritrato.)

⁷ Kan huri, ipinahiling ni Pedro na gusto niyang iuyon an kaisipan niya sa paagi nin pag-iisip ni Jehova. Nag-abot na an panahon tanganing an bakong turing mga Hentil magin parte na kan banwaan nin Diyos. Inasignaran si Pedro na hulitan an Hentil na si Cornelio, na magigin saro sa inot na mga kabilang sa bagong grupong ini nin mga parasamba. An mga Judio haros dai nakikiasosyar sa mga Hentil, kaya bakong makangangalas na kinaipuhan ni Pedro nin tabang tanganing makapag-andam sa saiyang asignasyon. Kan maaraman ni Pedro an kabutan nin Diyos manungod sa bagay na ini, liniwat niya an saiyang pagmansay. Bilang resulta, kan pinakiulayan siyang magduman ki Cornelio, “dai [siya] nagsayuma.” (Gibo 10:28, 29) Hinulitan niya si Cornelio asin an mga kaiba kaini sa harong, asin nagpabawtismo sinda.—Gibo 10:21-23, 34, 35, 44-48.

8. Paano niyato maipapahiling na an satong kaisipan kauyon kan ki Jehova? (1 Pedro 3:8 asin nota sa ibaba)

⁸ Pakalihis nin mga taon, dinagka ni Pedro an saiyang mga kapwa Kristiyano na “mag-isip na may pagkauruyon.” (Basahon an 1 Pedro 3:8 asin nota sa ibaba.) Bilang banwaan ni Jehova, puwede kitang mag-isip na may pagkauruyon paagi sa pagpahiling kan kaisipan ni Jehova, na maaaraman ta sa saiyang Tataramon. Halimbawa, sinadol ni Jesus an saiyang mga parasunod na inuton sa saindang buhay an Kahadian. (Mat. 6:33) Kauyon kaiyan, tibaad magdesisyon an sarong parahayag sa saindong kongregasyon na lumaog sa sarong porma nin bilog na panahon na paglilingkod. Imbes na sabihon sa saiya na magin mabuot siya sa saiyang sadiri, dapat kitang magtaram nin positibo manungod sa kaumaw-umaw na desisyon na iyan asin suportaran siya.

MAGIN MAPAKUMBABA

9-10. Paano si Jesus nagpahiling nin ekstraordinaryong kapakumbabaan?

⁹ Kan banggi bago siya gadanon, tinukduan ni Jesus si Pedro asin an iba pang mga apostol nin sarong mahalagang leksiyon manungod sa kapakumbabaan. Bago kaiyan, isinugo ni Jesus si Pedro asin Juan na andamon an mga kakaipuhanon para sa huring pamanggihan na makakaibanan ninda si Jesus bilang tawo. Posibleng marhay na kaiba sa pag-andam an pagsigurado na igwang planggana saka mga tuwalya na magagamit para mahanawan an mga bitis kan mga bisita bago an pamanggihan. Alagad, siisay an magibo kan menos na trabahong ini na paghanaw sa mga bitis?

¹⁰ Si Jesus daing pagduwa-duwa na nagpahiling nin ekstraordinaryong kapakumbabaan. May ginibo siyang sarong bagay na sa parati uripon lang an naggigibo, kaya nagngalas na marhay an saiyang mga apostol. Hinuba ni Jesus an saiyang mga pang-ibabaw na bado, hinagkusan nin tuwalya an saiyang habayan, linagan nin tubig an planggana, asin pinunan na hanawan an saindang mga bitis. (Juan 13:4, 5) Posibleng nahaloy an paghanaw sa mga bitis kan enterong 12 apostol—kaiba na si Judas, na matraydor sa saiya. Pero, mapakumbabang tinapos iyan ni Jesus. Dangan mapasensiya niyang sinabi sa sainda: “Nasasabutan nindo an ginibo ko sa saindo? Inaapod nindo akong ‘Paratukdo’ saka ‘Kagurangnan,’ asin tama an pag-apod nindong iyan. Kaya kun ako ngani, na Kagurangnan asin Paratukdo, naghanaw kan mga bitis nindo, dapat man nindong hanawan an mga bitis kan lambang saro.”—Juan 13:12-14.

11. Paano ipinahiling ni Pedro na nakanuod na siyang magin mapakumbaba? (1 Pedro 5:5) (Hilingon man an ritrato.)

¹¹ Nakanuod si Pedro sa kapakumbabaan ni Jesus. Pagkabalik ni Jesus sa langit, may ginibong milagro si Pedro. Pinaumayan niya an sarong lalaking pilay puon pagkamundag. (Gibo 1:8, 9; 3:2, 6-8) Makangangalas na pangyayari ini, kaya natural sanang pigtiripunan si Pedro nin dakul na tawo. (Gibo 3:11) Aakuon saka ikakaugma daw ni Pedro an atensiyon na itinatao sa saiya, lalo na ta pinadakula siya sa sarong kultura na grabe an pagpapahalaga sa posisyon asin pagkaprominente? Dai, mapakumbabang itinao ni Pedro an pag-umaw ki Jehova asin ki Jesus, na sinasabi: “Paagi sa [ngaran ni Jesus], asin huling nagtutubod kami sa saiyang ngaran, an lalaking ini na nahihiling nindo asin bisto nindo nagin makusog.” (Gibo 3:12-16) An mga tataramon na ginamit ni Pedro sa sarong surat sa mga Kristiyano manungod sa pangangaipong magin mapakumbaba tibaad magpagirumdom sa sato kan paghagkos kaidto ni Jesus nin tuwalya sa saiyang habayan asin paghanaw sa mga bitis kan mga apostol.—Basahon an 1 Pedro 5:5.

12. Arog ni Pedro, paano kita padagos na magigin mapakumbaba?

¹² Arog ni Pedro, puwede niyatong padagos na hinguwahon na magin mapakumbaba. Tandaan na bako sana basta pagsabi kan tamang mga tataramon an kalabot sa tunay na kapakumbabaan. Kalabot sa kahulugan kan terminong ginamit ni Pedro para sa kapakumbabaan an satong kauruiraruming mga kaisipan—“kababaan nin pag-iisip.” Naggigibo kita nin marahay na mga bagay sa iba bako dahil gustong-gusto tang hangaan kita, kundi dahil namumutan niyato si Jehova asin an mga tawo. Kun maugma tang pinaglilingkudan si Jehova asin an satong mga tugang sa ano man na paaging magigibo niyato, naririsa man o dai an satong mga paghihinguwa, patunay iyan na mapakumbaba kita.—Mat. 6:1-4.

MAGIN ‘TULTOL AN ISIP’

13. Ano an buot sabihon kan pagkaigwa nin ‘tultol na isip’?

¹³ Ano an buot sabihon kan pagkaigwa nin ‘tultol na isip’? (1 Ped. 4:7) An sarong Kristiyano na igwa nin ‘tultol na isip’ ginigibo an saiyang pinakamakakaya na makagibo nin mga desisyon na nagpapahiling kan kaisipan ni Jehova. Aram kan siring na Kristiyano na sa buhay, mayo nang ibang bagay na mas mahalaga kisa sa relasyon niya ki Jehova. Balanse an pagmansay niya sa saiyang sadiri, huling nasasabutan niya na may mga bagay siyang dai aram. Asin ipinapahiling niyang nagsasarig siya sa Diyos paagi sa parating pagdulok ki Jehova sa pamibi.a

14. Sa sarong pagkakataon, paano dai naipahiling ni Pedro an pagsarig ki Jehova?

¹⁴ Kan huring banggi bago an kagadanan ni Jesus, pinatanidan niya an saiyang mga disipulo: “Ngunyan na banggi, babayaan nindo ako gabos dahil sa mangyayari sa sako.” May kumpiyansang nagsimbag si Pedro: “Maski pa bayaan ka ninda gabos dahil sa mangyayari sa saimo, dai taka nuarin man babayaan!” Kan bangging iyan, sinadol ni Jesus an nagkapira sa saiyang mga disipulo: “Padagos kamong magbantay asin padagos na mamibi.” (Mat. 26:31, 33, 41) Kun sinunod ni Pedro an sadol na iyan, tibaad nagkaigwa kuta siya kan kusog nin buot na sabihon na disipulo siya ni Jesus. Imbes, pignigaran ni Pedro an saiyang Kagurangnan asin pinagbasulan niya iyan na marhay.—Mat. 26:69-75.

15. Paano si Jesus padagos na nakapahiling nin tultol na isip durante kan huring banggi kan saiyang buhay bilang tawo?

¹⁵ Lubos na nagsarig si Jesus ki Jehova. Dawa ngani perpekto si Jesus, pauruutro siyang namibi. Nagtao iyan sa saiya kan kusog nin buot na humiro kauyon kan kabutan ni Jehova para sa saiya. (Mat. 26:39, 42, 44; Juan 18:4, 5) Nahiling ni Pedro an pauruutrong pagpamibi ni Jesus, asin siguradong dai niya iyan nalingawan.

16. Paano ipinahiling ni Pedro na igwa na siya nin tultol na isip? (1 Pedro 4:7)

¹⁶ Pag-abot nin panahon, nanudan ni Pedro na urog na magsarig ki Jehova sa pamibi. An binuhay liwat na si Jesus inasigurar si Pedro asin an iba pang mga apostol na mag-aako sinda nin banal na espiritu tanganing maisagibo ninda an pagbuot sa sainda na maghulit. Alagad, tinugon sinda ni Jesus na maghalat sa Jerusalem sagkod na mangyari iyan. (Luc. 24:49; Gibo 1:4, 5) Ano an ginibo ni Pedro mantang naghahalat? Si Pedro asin an saiyang mga kapwa Kristiyano “matiyagang namimibi.” (Gibo 1:13, 14) Kan huri, sa inot na surat ni Pedro, dinagka niya an saiyang mga kapwa Kristiyano na magkaigwa nin tultol na isip asin magsarig ki Jehova sa pamibi. (Basahon an 1 Pedro 4:7.) Nakanuod si Pedro na magsarig ki Jehova asin nagin siyang sarong harigi sa kongregasyon.—Gal. 2:9.

17. Ano an kaipuhan tang padagos na gibuhon ano man na natural na mga abilidad an tibaad igwa kita? (Hilingon man an ritrato.)

¹⁷ Para magkaigwa nin tultol na isip, dapat na parati kitang magdulok ki Jehova sa pamibi. Nasasabutan niyato na kaipuhan tang padagos na mamibi ki Jehova ano man na natural na mga abilidad an tibaad igwa kita. Kaya namimibi kita ki Jehova para sa paggiya, lalo na pag may gigibuhon kitang importanteng mga desisyon, huling nagtitiwala kita na aram niya kun ano an pinakamarahay para sa sato.

18. Paano ta urog na maiuuyon an satong kaisipan sa paagi nin pag-iisip ni Jehova?

¹⁸ Nagpapasalamat nanggad kita na linalang kita ni Jehova na may kakayahan na maipahiling an saiyang mga kuwalidad. (Gen. 1:26) Siyempre, dai ta perpektong maaarog si Jehova. (Isa. 55:9) Alagad, arog ni Pedro, magigibo niyatong urog na maiuyon an satong kaisipan sa paagi nin pag-iisip ni Jehova. Lugod na gibuhon niyato iyan paagi sa padagos na pag-arog sa paagi nin pag-iisip nin Diyos, pagigin mapakumbaba, asin pagkaigwa nin tultol na isip.