ARTIKULONG PAG-AADALAN 18
KANTA 65 Mag-uswag!
Mga Hoben na Brother—Arugon si Marcos Asin Timoteo
“Iiba mo si Marcos, dahil makakatabang siyang marhay sa sako sa ministeryo.”—2 TIM. 4:11.
POKUS
Kun paano an mga halimbawa ni Marcos asin Timoteo makakatabang sa hoben na mga brother na magkaigwa kan mga kuwalidad na kaipuhan tanganing mas lubos na makapaglingkod sa iba.
1-2. Anong mga kadipisilan an puwede kutang nakapugol ki Marcos asin Timoteo na mas lubos na makapaglingkod sa iba?
MGA hoben na brother, gusto daw nindong urog na makapaglingkod ki Jehova asin mas makatabang sa mga tugang sa saindong kongregasyon? Siguradong iyo. Nakakaugma nanggad mahiling na dakulon na hoben na lalaki an andam na maglingkod sa iba! (Sal. 110:3) Pero, tibaad mapaatubang ka sa mga kadipisilan. Nag-aalangan ka daw na pahiwason an saimong ministeryo huling natatakot ka sa mga posibleng mangyari? Nagduwa-duwa ka na daw na akuon an sarong asignasyon huling mayo ka nin kumpiyansa sa sadiri mo? Kun iyo, bako lang ika an nakamati nin arog kaiyan.
2 Si Marcos asin Timoteo napaatubang man sa kaagid na mga kadipisilan. Pero dai ninda tinugutan an pagkatakot sa mga posibleng mangyari o an kawaran ninda nin eksperyensiya na makapugol sa sainda na paglingkudan an iba. Posibleng nakaistar pa kaidto si Marcos kaiba kan saiyang ina sa sarong komportableng harong kan imbitaran siya ni apostol Pablo saka Bernabe na mag-iba sa sainda sa saindang inot na pagbiyahe bilang misyonero. (Gibo 12:12, 13, 25) Binayaan ni Marcos an nakatudan niyang kamugtakan na iyan tanganing pahiwason an saiyang ministeryo. Inot, nagbalyo siya sa Antioquia. Dangan, inibanan niya si Pablo saka Bernabe sa pagbiyahe pasiring sa iba pang hararayong lugar. (Gibo 13:1-5) Kaagid kaiyan, posibleng marhay na nakaistar pa kaidto si Timoteo sa saiyang mga magurang kan imbitaran siya ni Pablo na umiba sa saiya sa gibuhon na paghuhulit. Huling hoben pa asin daing eksperyensiya, puwede kutang nakapugol ki Timoteo na mag-iba ki Pablo an kawaran nin kumpiyansa. (Ikumparar an 1 Corinto 16:10, 11 asin 1 Timoteo 4:12.) Alagad, inako niya an imbitasyon ni Pablo asin bilang resulta nag-ako siya nin dakul na bendisyon.—Gibo 16:3-5.
3. (a) Paano ta naaraman na naapresyar na marhay ni Pablo si Marcos asin Timoteo? (2 Timoteo 4:6, 9, 11) (Hilingon man an mga ritrato.) (b) Anong mga hapot an pag-uulayan niyato sa artikulong ini?
3 Si Marcos asin Timoteo nagkaigwa nin kapaki-pakinabang na mga eksperyensiya asin nakanuod kun paano isasaabaga an magabat na mga paninimbagan mantang sinda hoben pa. Naapresyar na marhay ni Pablo an hoben na mga lalaking ini kaya kan huri gusto niya sindang makaibanan kan garo sa pagmati niya madali na siyang gadanon. (Basahon an 2 Timoteo 4:6, 9, 11.) Anong mga kuwalidad igwa si Marcos asin Timoteo kaya napamahal sinda ki Pablo? Paano sinda maaarog kan hoben na mga brother? Asin paano makikinabang an hoben na mga lalaki sa mamumuton asin sa-amang sadol ni Pablo?
Napamahal ki Pablo si Marcos asin Timoteo paagi sa pagsaabaga kan mga ini nin mga paninimbagan mantang hoben pa sinda (Hilingon an parapo 3)b
ARUGON SI MARCOS—MAGIN ANDAM NA MAGLINGKOD
4-5. Paano ipinahiling ni Marcos na andam siyang maglingkod sa iba?
4 Uyon sa sarong reperensiya, an paglilingkod sa iba nagpaparisa kan ideya na hinihinguwa nin saro na tabangan an iba nin may “kahigusan asin pagkapursigido.” Marahay na halimbawa si Marcos sa bagay na ini. Kan magsayuma si Pablo na iiba siya sa ikaduwang pagbiyahe bilang misyonero, posibleng marhay na nakulgan asin nadisganar si Marcos. (Gibo 15:37, 38) Pero dai iyan nakapapundo ki Marcos na paglingkudan an mga tugang.
5 Nag-ako si Marcos nin sarong asignasyon sa paglilingkod kaiba an saiyang pinsan na si Bernabe. Pakalihis nin mga 11 taon, saro si Marcos sa mga nagpakusog ki Pablo durante kan inot kaining pagkapreso sa Roma. (Filem. 23, 24) Sa katunayan, pinahalagahan na marhay ni Pablo an saiyang suporta kaya sinabi niya na si Marcos sarong “dakulang karangahan.”—Col. 4:10, 11.
6. Paano nakinabang si Marcos sa pakikiiba-iba sa maygurang na mga Kristiyano? (Hilingon an footnote.)
6 Nakinabang si Marcos sa dayupot na pakikiiba-iba sa maygurang na mga Kristiyano. Pagkatapos na makaibanan ni Pablo sa Roma, nagpasiring sa Babilonya si Marcos para ibanan si apostol Pedro. Nagin dayupot sinda sa kada saro kaya inapod siya ni Pedro na “Marcos na sakuyang aki.” (1 Ped. 5:13) Mantang magkaibanan sinda, posibleng marhay na iinistorya ni Pedro sa saiyang hoben na amigong ini an dakul na interesanteng detalye manungod sa buhay asin ministeryo ni Jesus na kan huri isinurat ni Marcos sa saiyang Ebanghelyo.a
7. Paano inarog kan hoben na brother na si Seung-Woo an halimbawa ni Marcos? (Hilingon man an ritrato.)
7 Padagos na nagin sibot si Marcos sa saiyang paglilingkod asin nagdanay na dayupot sa maygurang na mga brother. Paano mo maaarog si Marcos? Kun dai mo pa naaabot an sarong pribilehiyo sa paglilingkod, magin mapasensiya sa saimong sadiri asin padagos na maghanap nin iba pang mga paagi na makapaglingkod ki Jehova asin sa kongregasyon. Nangyari iyan ki Seung-Woo, na naglilingkod ngunyan bilang elder. Kan siya mas hoben pa, pigkukumparar niya an saiyang sadiri sa iba pang hoben na mga brother. An iba sa sainda mas nainot na natawan nin mga pribilehiyo kisa sa saiya. Pagmati ni Seung-Woo binabaliwala siya kaya kan huri ipinakipag-ulay niya iyan sa maygurang na mga brother. Sinabi sa saiya kan sarong elder na gibuhon niya an makakaya niya na paglingkudan an iba dawa pa kun dai naririsa kun minsan an marahay na mga ginigibo niya. Ginibo iyan ni Seung-Woo kaya pinunan niyang alalayan an mga may edad na asin an mga nangangaipo nin tabang para makapasiring sa mga pagtiripon. Mantang ginigirumdom an eksperyensiyang iyan, sinabi niya: “Nasabutan ko na kun paano ako mas lubos na makakapaglingkod sa iba. Namatian ko an kaugmahan sa pagtao nin praktikal na tabang sa iba.”
Paano nakikinabang an hoben na mga lalaki sa parating pakikiiba-iba sa maygurang na mga brother? (Hilingon an parapo 7)
ARUGON SI TIMOTEO—MAGPAHILING NIN MAMUMUTON NA PAGMALASAKIT SA IBA
8. Taano ta pinili ni Pablo si Timoteo na magin kaiba-iba niya sa pagbiyahe? (Filipos 2:19-22)
8 Kaipuhan ni Pablo nin mga kaiba-ibang makusog an buot sa pagbalik niya sa mga siyudad kun sain napaatubang siya kaidto sa pagkontra. An inot niyang piniling magin kaiba-iba iyo an eksperyensiyadong Kristiyano na si Silas. (Gibo 15:22, 40) Kan huri, pinili niya man si Timoteo. Taano ta pinili ni Pablo si Timoteo? An sarong dahilan iyo na igwa siya nin marahay na reputasyon. (Gibo 16:1, 2) Igwa man siya nin tunay na pagmakulog sa mga tawo.—Basahon an Filipos 2:19-22.
9. Paano ipinahiling ni Timoteo na tunay siyang nagmamakulog sa mga tugang?
9 Puon sa kapinunan kan saiyang ministeryo kaiba ni Pablo, ipinahiling ni Timoteo na mas nagmamakulog siya sa iba kisa sa sadiri niya. Huli kaiyan, tiwala si Pablo na puwede niyang iwalat si Timoteo sa Berea tanganing pakusugon an mga bagong disipulo duman. (Gibo 17:13, 14) Sa pagkakataon na iyan, siguradong nakinabang si Timoteo sa halimbawa ni Silas na nagpawalat man sa Berea. Pero kan huri, solong isinugo ni Pablo si Timoteo pa-Tesalonica tanganing pakusugon an mga Kristiyano sa siyudad na iyan. (1 Tes. 3:2, footnote) Sa suminunod na mga 15 taon, nanudan ni Timoteo na “makitangis sa mga nagtatangis,” bilang empatiya sa siisay man na nagsasakit. (Roma 12:15; 2 Tim. 1:4) Paano si Timoteo maaarog kan hoben na mga Kristiyanong lalaki?
10. Paano nakanuod an brother na si Woo Jae na urog na magpahiling nin personal na interes sa iba?
10 An brother na si Woo Jae nakanuod na urog na magpahiling nin personal na interes sa iba. Kan siya mas hoben pa, nasasakitan si Woo Jae na makipag-ulay sa mga tugang na mas matua sa saiya. Kaya pag nasa Kingdom Hall, tinitino niya lang sinda tapos mahali na. Sarong elder an nagsabi ki Woo Jae na punan an pakikipag-ulay sa saiyang mga tugang paagi sa pagsabi kan mga naaapresyar niya sa sainda. Dinagka man siya kan elder na pag-isipan kun sa ano posibleng interesado an kaulay niya. Inaplikar ni Woo Jae an sadol na ini sa saiyang pakikipag-ulay sa iba. Si Woo Jae, na elder na ngunyan, nagsabi: “Mas madali na sako ngunyan na makipag-ulay sa mga tawo na manlain-lain an edad. Marahay sa pagmati na mas nasasabutan ko na an mga inaagihan kan iba. Nagin kapaki-pakinabang talaga ini sa sako sa pagtabang ko sa mga kapagtubod.”
11. Paano makakapahiling nin personal na interes an mga hoben na brother sa mga tugang sa kongregasyon? (Hilingon man an ritrato.)
11 Kamong mga hoben na brother, puwede man kamong makanuod na magpahiling nin personal na interes. Pag nasa mga pagtiripon, magpahiling nin personal na interes sa mga indibidwal na manlain-lain an edad saka kamugtakan. Kumustahon sinda, dangan magdangog. Sa paglihis nin panahon, tibaad maaraman mo kun sa anong mga paagi mo sinda matatabangan. Tibaad igwa nin may edad nang mag-agom na kaipuhan nin tabang sa paggamit nin JW Library® app. O tibaad mayo pa palan sindang makakapartner sa ministeryo. Puwede mo daw sindang tabangan sa paggamit kan saindang gadyet o partneran sa ministeryo? Kun mainisyatiba ka sa pagtabang sa iba, makakapahiling ka nin marahay na halimbawa sa gabos.
An mga hoben na brother makakatabang sa kongregasyon sa dakul na praktikal na paagi (Hilingon an parapo 11)
MAKINABANG SA MAMUMUTON ASIN SA-AMANG SADOL NI PABLO
12. Paano makikinabang an hoben na mga lalaki sa sadol ni Pablo ki Timoteo?
12 Tinawan ni Pablo si Timoteo nin praktikal na sadol para tabangan siyang magin mapanggana sa saiyang buhay asin ministeryo. (1 Tim. 1:18; 2 Tim. 4:5) Kamong mga hoben na brother, puwede man kamong makinabang sa mamumuton asin sa-amang sadol ni Pablo. Paano? Basahon an duwang surat ni Pablo ki Timoteo na garo baga isinurat iyan para sa saimo asin hilingon kun anong sadol an puwede mong iaplikar. Pag-isipan an pirang halimbawa.
13. Ano an makakatabang sa saimo na magkaigwa nin dayupot na relasyon ki Jehova?
13 “Sanayon mo an saimong sadiri na an obheto iyo na magkaigwa nin debosyon sa Diyos.” (1 Tim. 4:7b) Ano an debosyon sa Diyos? Iyan an pagkaigwa nin dayupot na relasyon ki Jehova na may pagmawot na gibuhon kun ano an nakakapaugma sa Saiya. Dai kita ipinangaki na igwa na kan kuwalidad na ini kaya kaipuhan tang patalubuon iyan. Paano? An Griegong tataramon na itrinadusir na “sanayon mo an saimong sadiri” sa parati ginagamit para iladawan an maigot na pagsasanay nin mga atleta na nag-aandam para sa sarong kompetisyon. Kaipuhan kan mga atletang ini an disiplina sa sadiri. Kaipuhan ta man an disiplina sa sadiri tanganing mapatalubo an mga kaugalian na mas makakapadayupot sa sato ki Jehova.
14. Ano an dapat na magin pasuhan niyato pag nagbabasa nin Bibliya? Iilustrar.
14 Mantang pinapauswag mo an kaugalian mo sa pagbasa nin Bibliya, isaisip na an pasuhan mo iyo na magin mas dayupot ki Jehova. Halimbawa, ano an manunudan mo sa pag-uulay ni Jesus saka kan mayaman na hoben na tagapamahala? (Mar. 10:17-22) Naniniwala an hoben na lalaki na si Jesus iyo an Mesiyas pero kulang an saiyang pagtubod para magin parasunod niya. Dawa arog kaiyan, “nakamati nin pagkamuot para sa saiya” si Jesus. Bako daw na nakakapahiro an paagi nin pakikipag-ulay ni Jesus sa hoben na lalaking ini? Malinaw, gusto ni Jesus na makagibo siya nin madunong na desisyon. An pagkamuot na iyan na ipinahiling ni Jesus iyo man mismo an namati ni Jehova para sa hoben na lalaking ini. (Juan 14:9) Mantang iniisip-isip mo an manungod sa salaysay na ini asin an saimong kamugtakan, haputon an sadiri, ‘Ano an kaipuhan kong gibuhon tanganing magin mas dayupot ako ki Jehova asin mas lubos na makapaglingkod sa iba?’
15. Taano ta dapat na tawan nin atensiyon nin sarong hoben na brother an halimbawang ipinapahiling niya? Iilustrar. (1 Timoteo 4:12, 13)
15 “Magi kang halimbawa sa mga maimbod.” (Basahon an 1 Timoteo 4:12, 13.) Dinagka ni Pablo si Timoteo na pauswagon bako lang an mga kasanayan—arog kan pagbasa asin pagtukdo—kundi pati man an mga kuwalidad—arog kan pagkamuot, pagtubod, asin pagigin malinig. Taano? An marahay na halimbawa mas mapuwersa kisa sa mga tataramon. Sabihon ta ngayang inasignaran kang magtao nin pahayag manungod sa kun paano kita magigin mas maigot sa ministeryo. Mas may kumpiyansa kang makakapagtaram manungod sa temang ini kun itinatao mo an saimong pinakamakakaya sa ministeryo. An saimong marahay na halimbawa makakadagdag nin puwersa sa saimong mga tataramon.—1 Tim. 3:13.
16. (a) Sa anong limang bagay puwedeng magin marahay na halimbawa an mga hoben na Kristiyano? (b) Paano an sarong hoben na brother puwedeng magin marahay na halimbawa “sa pagtaram”?
16 Arog kan ipinaparisa sa 1 Timoteo 4:12, nagsambit si Pablo nin limang bagay na diyan puwedeng makapahiling nin marahay na halimbawa an sarong hoben na brother. Puwede mo daw na gibuhon na saimong proyekto sa pag-adal an paghurop-hurop sa kada saro sa mga ini? Sabihon ta ngayang gusto mong magin mas marahay na halimbawa “sa pagtaram.” Pag-isipan an mga paagi na magagamit mo an saimong mga tataramon para mapakusog an iba. Kun nakaistar ka pa sa harong kan saimong mga magurang, puwede mo daw na mas parating ipahiling an saimong pasasalamat sa mga ginigibo ninda para sa saimo? Pagkatapos nin mga pagtiripon, puwede mo daw na sabihon sa sarong may kabtang sa programa kun ano an napahalagahan mo sa saiyang presentasyon? Tibaad puwede mo man hinguwahon na magtao nin mga komento sa mga pagtiripon gamit an sadiri mong mga tataramon. An mga paghihinguwa mo na magin marahay na halimbawa sa pagtaram magpapahiling na nag-uuswag ka sa espirituwal.—1 Tim. 4:15.
17. Ano an makakatabang sa sarong hoben na brother na maabot an saiyang espirituwal na mga pasuhan? (2 Timoteo 2:22)
17 “Rayuan mo an mga kamawutan na dara nin pagigin hoben, pero magmaigot ka na mahiling sa saimo an pagigin matanos.” (Basahon an 2 Timoteo 2:22.) Dinagka ni Pablo si Timoteo na labanan an mga kamawutan na puwedeng makadisturbo sa pag-abot niya sa saiyang espirituwal na mga pasuhan asin makaraot sa relasyon niya ki Jehova. Tibaad marealisar mo man na may partikular na mga aktibidad na, dawa ngani bako man talaga maraot, puwedeng makaubos kan panahon mo para sa espirituwal na mga aktibidad. Halimbawa, pag-isipan kun gurano kadakul na panahon an nagagamit mo sa pagkawat nin sports o nin mga video game o sa pag-browse sa Internet. Puwede mo daw gamiton sa teokratikong mga aktibidad an pirang panahon na ginagamit mo diyan? Tibaad puwede kang magpresentar na tumabang sa pagmentenar kan saindong Kingdom Hall o magsuportar sa pagpapatotoo paagi sa cart. Kun makikikabtang ka sa siring na mga aktibidad, posibleng marhay na magkakaigwa ka nin bagong mga amigo na makakatabang saimo na magkaigwa nin espirituwal na mga pasuhan asin maabot an mga iyan.
AN PAGLILINGKOD SA IBA NAGRERESULTA SA MGA BENDISYON
18. Paano niyato nasabi na nagkaigwa nin nakakaugma asin nakakakontentong buhay si Marcos asin Timoteo?
18 Naggibo nin mga pagsasakripisyo si Marcos asin Timoteo tanganing mas lubos na makapaglingkod sa iba, asin nagresulta iyan sa nakakaugma asin nakakakontentong buhay. (Gibo 20:35) Tanganing mapaglingkudan an saiyang mga kapagtubod, nagbiyahe si Marcos sa manlain-lain na parte kan kinaban. Nagsurat man siya nin buhay na buhay na salaysay manungod sa buhay asin ministeryo ni Jesus. Tinabangan ni Timoteo si Pablo sa pag-establisar nin mga kongregasyon asin sa pagpakusog sa mga tugang. Siguradong naugmang marhay si Jehova sa pagigin mapagsakripisyo ni Marcos asin Timoteo.
19. Taano ta dapat tawan nin atensiyon kan mga hoben na brother an sadol ni Pablo ki Timoteo, asin ano an magigin resulta kaiyan?
19 Malinaw na mahihiling an pagkamuot ni Pablo ki Timoteo sa mga isinurat niya para sa hoben na amigo niyang ini. Ihinahayag man kan ipinasabong na mga surat na ini na namumutan na marhay ni Jehova kamong mga hoben na lalaki. Gusto niya kamong magin mapanggana. Kaya isapuso an sa-amang sadol ni Pablo, asin patalubuon an saindong pagmawot na mas lubos na makapaglingkod sa iba. Kun gigibuhon nindo iyan, magkakaigwa kamo nin nakakaugmang buhay ngunyan asin ‘makakapangapot kamo nin higot sa tunay na buhay’ sa maabot.—1 Tim. 6:18, 19.
KANTA 80 “Namiti Asin Hilinga Nindo na si Jehova Marahay”
a Si Pedro sarong tawo na madaling mahiling an emosyon, kaya malinaw niyang nailadawan ki Marcos an mga namatian asin an mga nagin reaksiyon ni Jesus sa manlain-lain na sitwasyon. Tibaad iyan an dahilan kaya sa saiyang mga isinurat, parating ilinaladawan ni Marcos an mga emosyon asin aksiyon ni Jesus.—Mar. 3:5; 7:34; 8:12.
b DESKRIPSIYON KAN RITRATO: Si Marcos na inaasikaso an mga pangangaipo ni Pablo asin Bernabe sa saindang pagbiyahe bilang misyonero. Si Timoteo na gikan sa buot na nagdadalaw sa sarong kongregasyon para pakusugon an mga tugang.