Makinabang na Marhay sa mga Artwork

An satong mga publikasyon dakulon nin artwork na nagtutukdo nin importanteng mga punto. Paano ka makikinabang na marhay sa mga visual aid na ini?

• Hilingon an artwork bago basahon an artikulo. An mga ritrato puwedeng makakua kan interes mo asin makamotibar saimo na basahon an artikulo. Arog kan sa ano man na masiram na kakanon, an “nagnanamit” nguna iyo an satong mga mata. Kaya haputon an sadiri, ‘Ano an nahihiling ko?’—Amos 7:7, 8.

• Mantang binabasa mo an artikulo, pag-isipan kun taano ta an artwork na iyan an pinili. Basahon an mga caption o deskripsiyon kan ritrato kun igwa. Pag-isipan kun ano an koneksiyon kan artwork sa temang pinag-uulayan asin kun ano an manunudan mo diyan.

• Pagkatapos na magbasa, gamiton an artwork para repasuhon an panginot na mga punto kan artikulo. Hinguwahon na iladawan sa isip an artwork asin an mga punto na itinutukdo kan lambang ritrato.

• Hilingon giraray an mga artwork sa magasin na ini asin aramon kun magigirumduman mo an mga itinutukdo kaiyan.