ARTIKULONG PAG-AADALAN 35
KANTA 121 Kaipuhan Niyato an Pagpupugol sa Sadiri
Kun Paano Manggagana sa Pakikipaglaban sa Salang mga Pagmawot
“Dai nindo pagtugutan an kasalan na padagos na mamahala bilang hadi sa saindong mortal na mga hawak asin pasunudon kamo sa mga pagmawot kaiyan.”—ROMA 6:12.
POKUS
Para tabangan kita na (1) dai pangluyahan nin buot asin (2) malikayan na dai magpadara sa sugot.
1. Ano an pagkakapareho niyato asin kan gabos na iba pang bakong perpektong tawo?
NANGYARI na daw saimo na nagkaigwa ka nin makusog na pagmawot na gibuhon an sarong bagay na dai inuuyunan ni Jehova? Kun iyo, dai pangluyahan nin buot asin isipon na an pagbalong napapaatubang saimo mas grabe kisa sa mga pagbalong napapaatubang sa iba. Sinasabi kan Bibliya: “Ano man na sugot na minaabot sa saindo, napapaatubang man diyan an ibang mga tawo.” (1 Cor. 10:13)a Nangangahulugan iyan na ano man na salang pagmawot an pinaglalabanan mo, pinaglalabanan man iyan kan iba. Dai ka nagsosolo, asin sa tabang ni Jehova, kaya mong magin mapanggana.
2. Anong mga sugot an pinaglalabanan kan nagkapirang Kristiyano asin mga tinutukduan sa Bibliya? (Hilingon man an mga ritrato.)
2 Sinasabi man kan Bibliya: “An lambang saro nababalo pag naguguyod siya asin naaakit kan sadiri niyang pagmawot.” (Sant. 1:14) An sarong bagay na nakakasugot sa sarong tawo tibaad dai sa iba. Halimbawa, may mga Kristiyano na tibaad nasusugutan na gumibo nin seksuwal na imoralidad sa bako nindang kasekso; an iba man, sa kasekso ninda. May mga indibidwal na nagpundo na sa paghiling nin pornograpiya an tibaad makamati nin makusog na pagmawot na maghiling giraray kaiyan. Napapaatubang man sa kaagid na sitwasyon an dakul na tawong nagpundo na sa pagdroga asin sa grabeng pag-inom nin inumon na de-alkohol. Pira lang iyan sa mga pagmawot na pinaglalabanan nin nagkapirang Kristiyano asin mga tinutukduan sa Bibliya. May pagkakataon na posibleng marhay na namatian ta man an namati ni apostol Pablo na nagsurat: “Pag gusto kong gibuhon an tama, an maraot an yaon sa sako.”—Roma 7:21.
An sugot puwedeng bigla na sanang umabot—ano man na oras asin sain man na lugar (Hilingon an parapo 2)d
3. Ano an puwedeng magin epekto sa saro kun igwa siya nin dai mahali-haling salang pagmawot?
3 Kun igwa ka nin dai mahali-haling salang pagmawot, tibaad mamatian mong mayo kang kusog na labanan an sugot, na dai mo kayang labanan iyan. Tibaad mamati mo man na mayo ka nang paglaom, na iniisip na bako kang akseptable ki Jehova dahil lang ta igwa ka kan salang pagmawot na iyan. Bako nanggad totoo an arin man diyan! Para maaraman ta kun taano, sisimbagon sa artikulong ini an duwang hapot: (1) Ano an dahilan kaya tibaad mamatian niyatong dai ta kayang labanan an sugot asin na mayo na kitang paglaom? (2) Paano mo mapaglalabanan an salang mga pagmawot?
KUN ANO AN GUSTO KAN “SARO NA MARAOT” NA MAMATIAN NIYATO
4. (a) Taano ta gusto ni Satanas na mamatian niyatong mayo kitang kusog na labanan an salang mga pagmawot? (b) Paano ta nasabi na igwa kita kan kusog na labanan an sugot?
4 Gusto ni Satanas na mamatian tang dai ta kayang labanan an salang mga pagmawot, na mayo kitang kusog na labanan iyan. Malinaw iyan na ipinahiling ni Jesus kan tukduan niya an saiyang mga parasunod na ipamibi: “Dai mo kami pagpabayaan na madaog nin sugot, kundi iligtas mo kami sa saro na maraot.” (Mat. 6:13) Hinihingako ni Satanas na pag an mga tawo mapaatubang sa sugot, dai na sinda masunod ki Jehova. (Job 2:4, 5) Isip-isipa na sana baya iyan. Si Satanas baga an nagpadara sa pagmawot niya, saka siya an habong magdanay na maimbod ki Jehova. Minalataw na iniisip niyang arog kita sa saiya, na tatalikdan ta tulos si Jehova pag mapaatubang kita sa sugot. Inisip pa ngani ni Satanas na madadara niya sa sugot an perpektong Aki nin Diyos! (Mat. 4:8, 9) Pero isip-isipa ini: Mayo daw talaga kitang kusog na labanan an salang mga pagmawot? Igwa nanggad! Uyon kita sa isinurat ni apostol Pablo: “Igwa akong kusog na atubangon an gabos na bagay paagi sa saiya na nagtatao sa sako nin puwersa.”—Fil. 4:13.
5. Paano ta naaraman na tiwala si Jehova na kaya tang labanan an salang mga pagmawot?
5 Bakong arog ni Satanas, tiwala si Jehova na kaya tang labanan an salang mga pagmawot. Paano ta naaraman iyan? Huling ihinula ni Jehova na may sarong dakulang kadaklan na magdadanay na maimbod sa saiya asin makakaligtas sa dakulang kasakitan. Isip-isipa an kahulugan kaiyan. Si Jehova, na dai makakapagputik, nagsasabi na may dakulang bilang nin mga tawo—bakong pipira lang—an malaog sa saiyang bagong kinaban. Igwa sinda nin malinig na kamugtakan, an buot sabihon, “linabahan ninda an saindang haralabang bado saka pinaputi an mga iyan sa dugo kan Kordero.” (Kap. 7:9, 13, 14) Malinaw na dai iniisip ni Jehova na dai ta kayang labanan an salang mga pagmawot.
6-7. Taano ta gusto ni Satanas na mamatian tang mayo na kitang paglaom sa pakikipaglaban ta sa sugot?
6 Gusto ni Satanas na dai ta lang mamatian na mayo kitang kusog na labanan an salang mga pagmawot kundi mamatian ta man na mayo na kitang paglaom—na bako kitang akseptable ki Jehova dahil lang ta igwa kita nin salang mga pagmawot. Sa giraray, isip-isipa na sana baya iyan. Si Satanas baga an daing paglaom dahil hinusgaran na siya ni Jehova bilang bakong maninigo na magkaigwa nin buhay na daing katapusan. (Gen. 3:15; Kap. 20:10) Siguradong gustong-gusto ni Satanas na, arog niya, mamatian ta man na mayo na kitang paglaom—lalo na ta igwa kita kan oportunidad na magkamit kan mismong bendisyon na dai itinao sa saiya. Pero bako nanggad kitang arog niya na mayo nang paglaom. Sa katunayan, inaasigurar sa sato kan Bibliya na gusto ni Jehova na tabangan kita, bako na kondenaron kita. “Habo niyang malaglag an siisay man, imbes, gusto niya na an gabos makapagsulsol.”—2 Ped. 3:9.
7 Kaya kun iniisip tang dai ta kayang labanan an salang mga pagmawot o mayo na kitang paglaom, nag-iisip na palan kita sa paaging gusto ni Satanas. Kun malinaw sa sato an katotoohan na ini, mapapakusog kaiyan an satong determinasyon na marigon na manindugan laban sa saiya.—1 Ped. 5:8, 9.
KUN ANO AN PUWEDENG MAIPAMATI SATO KAN SATONG MAKASALAN NA KAMUGTAKAN
8. Apuwera sa mga salang gibo, sa ano pa nanunungod an kasalan? (Salmo 51:5) (Hilingon man an “Paliwanag Dapit sa Tataramon.”)
8 Apuwera ki Satanas, may saro pang dahilan na puwedeng makapamati sa sato na mayo kitang kusog na labanan an sugot asin na mayo na kitang paglaom. Ano iyan? An satong makasalan na kamugtakan, na minana ta sa satong inot na mga magurang.b—Job 14:4; basahon an Salmo 51:5.
9-10. (a) Ano an nagin epekto ki Adan asin Eva huli kan saindang makasalan na kamugtakan? (b) Ano an epekto sa sato kan satong makasalan na kamugtakan?
9 Pag-isipan kun paano nakaapektar ki Adan asin Eva an saindang makasalan na kamugtakan. Pagkatapos nindang suwayon si Jehova, nagtago sinda asin naggibo nin pantahob sa saindang hawak. Manungod sa ginibo nindang iyan, ini an sabi kan Kaunawaan sa Kasulatan: “Kaya dahil sa kasalan nakamati sinda nin pagkakonsiyensiya, kapurisawan, kawaran nin katiwasayan, asin pagkasupog.” Para mas masabutan, iagid ta sa apat na kuwarto sa harong an kada saro sa mga pagmating ini. Si Adan saka Eva garo man sana nakakulong sa harong na iyan. Puwede sindang magpalipat-lipat nin kuwarto, pero dai sinda makakaluwas sa harong. Dai ninda madudulagan an saindang makasalan na kamugtakan.
10 Siyempre, an kamugtakan ta bakong eksaktong kapareho kan kamugtakan kaidto ni Adan asin Eva. Bakong arog sa sainda, aplikado sa sato an pantubos. Kaya kitang linigon kaiyan sa satong kasalan asin tawan nin malinig na konsiyensiya. (1 Cor. 6:11) Dawa arog kaiyan, namana ta pa man giraray sa sainda an makasalan na kamugtakan. Kaya bakong makangangalas na nakakamati man kita nin pagkakonsiyensiya, kapurisawan, kawaran nin katiwasayan, asin pagkasupog. Sa katunayan, uyon sa Bibliya padagos na nagkakaigwa nin makusog na impluwensiya sa mga tawo an kasalan. Asin naaapektaran kaiyan “maski [an] mga dai nagkasala na kapareho kan paglapas ni Adan.” (Roma 5:14) Garo baga nakakadisganar iyan, pero dai man iyan nangangahulugan na dai ta na talaga kayang gibuhon an tama asin na mayo na kitang paglaom. Kaya tang halion an negatibong mga pagmating iyan. Paano?
Huli sa kasalan, nakamati si Adan asin Eva nin pagkakonsiyensiya, kapurisawan, kawaran nin katiwasayan, asin pagkasupog (Hilingon an parapo 9)
11. Ano an dapat tang gibuhon pag namamatian tang dai ta kayang labanan an salang mga pagmawot, asin taano? (Roma 6:12)
11 Pag namamatian tang dai ta kayang labanan an salang mga pagmawot, isipon tang garo man sana “nagtataram” an satong makasalan na kamugtakan. Dai kita dapat magdangog diyan. Taano? Huling itinutukdo sa sato kan Bibliya na dai pagtugutan an kasalan na padagos na “mamahala bilang hadi” sa sato. (Basahon an Roma 6:12.) Nangangahulugan ini na puwede tang pilion na dai isagibo an salang mga pagmawot. (Gal. 5:16) Tiwala sato si Jehova na kaya tang labanan an sugot huling dai niya man sato hahagadon iyan kun mayo siyang tiwala sato. (Deu. 30:11-14; Roma 6:6; 1 Tes. 4:3) Malinaw na bakong totoo na dai ta kayang labanan an salang mga pagmawot.
12. Ano an dapat tang gibuhon pag namamatian tang mayo na kitang paglaom sa pakikipaglaban ta sa salang mga pagmawot, asin taano?
12 Sa kaagid na paagi, pag namamatian tang mayo na kitang paglaom—na iniisip na bako kitang akseptable ki Jehova dahil lang ta igwa kita nin salang mga pagmawot—isipon tang garo man sana “nagtataram” an satong makasalan na kamugtakan. Dai kita dapat magdangog diyan. Taano? Huling itinutukdo sa sato kan Bibliya na nasasabutan ni Jehova an satong makasalan na kamugtakan. (Sal. 103:13, 14) Aram niya an “gabos na bagay” manungod sa sato, kaiba na kun paano an satong minanang makasalan na kamugtakan nakakaimpluwensiya sa sato na magkaigwa nin salang mga pagmawot. (1 Juan 3:19, 20) Sagkod na dai ta isinasagibo an salang mga pagmawot, magigin malinig kita sa atubangan ni Jehova. Taano ta sigurado kita diyan?
13-14. Bako na daw kitang akseptable ki Jehova dahil lang ta igwa kita nin salang mga pagmawot? Ipaliwanag.
13 Ipinapahiling kan Bibliya na magkalain nanggad an pagsagibo nin sarong bagay na sala (na kaya tang kontrulon) asin an pagmawot na gibuhon iyan (na tibaad dai ta aram kun nuarin ta mamamatian). Halimbawa, may nagkapira kaidto sa inot na siglong mga Kristiyano sa Corinto na dating nagsasagibo nin homoseksuwalidad. Isinurat ni Pablo: “Arog kaiyan dati an nagkapira sa saindo.” Nangangahulugan daw ini na nungka na giraray sindang nakamati nin ano man na homoseksuwal na pagmawot? Bakong realistiko iyan huling sa parati nakagamot nang marhay an siring na mga pagmawot. Pero an mga Kristiyanong nagpahiling nin pagpupugol sa sadiri asin dai nagpadara sa saindang mga pagmawot ibinilang ni Jehova na akseptable sa saiya. Ibinilang niya sindang “hinugasan . . . asin lininig.” (1 Cor. 6:9-11) Puwede man na magin arog kaiyan an paghiling sa saimo ni Jehova.
14 Ano man na salang mga pagmawot an pinaglalabanan mo, puwede mo iyan na mapangganahan. Dawa kun dai mo mahali iyan, puwede kang magpahiling nin pagpupugol sa sadiri asin malikayan na “[gibuhon] an kagustuhan kan laman saka kan [saimong] mga kaisipan.” (Efe. 2:3) Paano mo iyan magigibo asin sa siring manggana sa pakikipaglaban mo sa salang mga pagmawot?
KUN PAANO MANGGAGANA
15. Taano ta kaipuhan niyatong magin onesto sa satong sadiri tanganing manggana sa pakikipaglaban sa salang mga pagmawot?
15 Tanganing manggana sa pakikipaglaban sa salang mga pagmawot, kaipuhan mong magin onesto sa saimong sadiri manungod sa mga kaluyahan mo. Dai pagdayaon an saimong sadiri nin “salang pangangatanusan.” (Sant. 1:22) Halimbawa, tibaad isipon nin saro, ‘An iba ngani mas grabe pa sakong mag-inom nin inumon na de-alkohol,’ o tibaad basulon nin saro an iba, ‘Kun mas mapagpadangat lang kuta si agom, dai man ako matetentaran na maghiling nin pornograpiya.’ Kun gigibuhon mo iyan, pinapasadit mo an problema, asin mas madali kang madadara sa sugot. Kaya dai pagpurbaran na ipangatanusan an salang gibo, dawa sa isip lang. Ika an maninimbag sa mga ginigibo mo.—Gal. 6:7.
16. Paano mo mapapakusog an saimong determinasyon na gibuhon an tama?
16 Apuwera sa pagigin onesto sa saimong sadiri manungod sa mga kaluyahan mo, kaipuhan mo man na pakusugon an saimong determinasyon na dai magpadara diyan. (1 Cor. 9:26, 27; 1 Tes. 4:4; 1 Ped. 1:15, 16) Isip-isipon kun anong kaluyahan an pinakanasasakitan kang labanan asin kun nuarin pinakamasakit sa saimo na labanan iyan. Tibaad sarong partikular na sugot iyan o sarong partikular na oras kan aldaw na diyan mas posibleng matentaran ka. Halimbawa, mas madali ka daw matentaran pag pagal ka o pag banggihon na? Pag-andaman an sugot asin isip-isipon kun ano an gigibuhon mo para malabanan iyan. An pinakamarahay na panahon na gibuhon iyan iyo na bago mag-abot an sugot.—Tal. 22:3.
17. Ano an manunudan ta sa halimbawa ni Jose? (Genesis 39:7-9) (Hilingon man an mga ritrato.)
17 Pag-isipan kun ano an ginibo ni Jose kan purbaran siyang akiton kan agom ni Potifar. Tulos-tulos asin marigon siyang nagsayuma. (Basahon an Genesis 39:7-9.) Ano an ipinaparisa kaiyan? Aram na ni Jose kun ano an dapat na magin pagmansay niya manungod sa pagkua nin agom kan ibang lalaki bago pa siya purbaran na akiton kan agom ni Potifar. Sa kaagid na paagi, mapapakusog mo man an saimong determinasyon na gibuhon an tama bago pa mag-abot an nakakatentar na sitwasyon. Paagi kaiyan, pag natetentaran ka, magigin mas madali sa saimo na isagibo an napagdesisyunan mo na.
Sayumahan tulos an sugot, arog kan ginibo ni Jose! (Hilingon an parapo 17)
“PADAGOS NA BALUON”
18. Paano ka manggagana sa pakikipaglaban sa salang mga pagmawot? (2 Corinto 13:5)
18 Tanganing manggana sa pakikipaglaban sa salang mga pagmawot, kaipuhan mong “padagos na baluon” an saimong sadiri—an buot sabihon, regular na siyasaton an saimong sadiri. (Basahon an 2 Corinto 13:5.) Siyasaton sa pana-panahon an saimong kaisipan asin paggawi asin gumibo nin kinakaipuhan na mga pagbabago. Halimbawa, dawa pag napangganahan mo an sarong sugot, haputon an sadiri: ‘Gurano kahaloy bago ko napaglabanan an sugot?’ Kun marealisar mo na medyo nag-atraso ka, dai maanggot sa sadiri. Imbes, gumibo nin mga lakdang tanganing pakusugon an saimong depensa. Haputon an sadiri arog kan: ‘Puwede ko daw na dai na pahaluyon pa na halion an salang mga kaisipan? An mga pinipili ko daw na libangan mas nakakapadipisil sako na labanan an sugot? Irinarayo ko daw tulos an paghiling ko sa imoral na mga bagay? Nasasabutan ko daw kun taano ta an mga pamantayan ni Jehova pirming para sa pinakaikakarahay dawa pag hinahagad kaiyan na magpahiling ako nin pagpupugol sa sadiri?—Sal. 101:3.
19. Paano an garo baga saradit na bakong madunong na desisyon puwedeng mas makapadipisil sa sato na labanan an salang mga pagmawot?
19 Dapat mo man na likayan an pagdadahilan. Sinasabi kan Bibliya: “An puso urog na mapandaya kisa sa ano pa man na bagay asin desperado.” (Jer. 17:9) Sinabi ni Jesus na minaluwas diyan an “maraot na mga kaisipan.” (Mat. 15:19) Halimbawa, sa paglihis nin panahon tibaad isipon nin sarong tawong nagpundo na sa paghiling nin pornograpiya na “okey man” maghiling nin nakakapukaw sa seksong mga ritrato dahil mayo man iyan nin mga tawong biyo talagang huba. O tibaad mangatanusan siya, ‘Mayo man maraot sa pagpantasya manungod sa salang mga pagmawot basta dai ko iyan gibuhon.’ An mapandayang puso kan tawong iyan garo man sana “[nagpaplano] para sa mga kamawutan kan laman.” (Roma 13:14) Paano mo malilikayan na gibuhon iyan? Magin alerto asin likayan na gumibo nin saradit na bakong madunong na desisyon huling magigin dahilan iyan na makagibo ka nin darakulang bakong madunong na desisyon, arog kan pagpadara sa sugot na gumibo nin sala.c Halion man an ano man na kaisipan, o “maraot na mga kaisipan,” na puwedeng magin dahilan na ipangatanusan ta an salang paggawi.
20. Anong paglaom an igwa kita sa maabot na panahon, asin anong tabang an igwa kita ngunyan?
20 Arog kan naaraman ta, paagi sa tabang ni Jehova, igwa kita kan kusog na labanan an sugot. Salamat man sa saiyang pagkahirak, igwa kita kan paglaom na mabuhay nin daing katapusan sa bagong kinaban. Nakakaginhawa nanggad na paglingkudan si Jehova sa panahon na iyan huling igwa na kita nin dalisay na isip asin puso! Pero sagkod na dai pa nag-aabot iyan, makakasigurado kita na bako nanggad totoo na dai ta kayang labanan an satong salang mga pagmawot asin na mayo na kitang paglaom. Bebendisyunan ni Jehova an satong mga paghihinguwa asin sa tabang niya, manggagana nanggad kita!
KANTA 122 Magin Marigon, Dai Natatanyog!
a Ini an pagkatradusir kan An Marahay na Bareta Biblia (Bikol Popular Version) sa bersikulong iyan: ‘Ano man na sugot na minaabot saindo, ordinaryo nang minaabot sa tawo.’
b PALIWANAG DAPIT SA TATARAMON: Sa Bibliya, an terminong “kasalan” sa parati nanunungod sa sarong gibo, arog kan paghabon, pagsambay, o paggadan. (Exo. 20:13-15; 1 Cor. 6:18) Pero sa nagkapirang teksto, an “kasalan” nanunungod sa sarong kamugtakan na namana ta pagkamundag sa sato, dawa ngani dai pa man kita nakakakomiter nin ano man na makasalan na gibo kan panahon na iyan.
c Mangnuhon na an hoben na lalaking ilinadawan sa Talinhaga 7:7-23 nakagibo nguna nin saradit na bakong madunong na desisyon bago siya nakagibo kan dakula na bakong madunong na desisyon, an pagpadara sa seksuwal na imoralidad.
d DESKRIPSIYON KAN RITRATO: Sa wala: Mantang nakatukaw sa sarong coffee shop, nahiling kan sarong hoben na brother an duwang lalaki na nagpapahiling nin romantikong interes sa kada saro. Sa tuo: Sarong sister na nakahiling nin duwang tawong nagsisigarilyo.