Magpahiling nin Respeto sa Iba

1. Taano ta naaapresyar niyato pag irinerespeto kita? (Talinhaga 22:1)

NAAAPRESYAR mo daw pag pinapahilingan ka nin respeto? Siguradong iyo. Gusto niyato gabos na mamatian na irinerespeto kita asin nauugma kita pag pinapahilingan kita kaiyan. Bako nanggad makangangalas na sinasabi kan Bibliya: “An irespeto ka mas marahay kisa sa pirak asin bulawan”!—Basahon an Talinhaga 22:1.

2-3. Taano ta bako pirming pasil na magpahiling nin respeto, asin sairisay an dapat tang pahilingan kaiyan?

² Bako pirming pasil na magpahiling nin respeto sa iba. An sarong dahilan iyo na kun minsan dai ta malikayan na maghiling sa mga kaluyahan kan mga tawo. Saro pa, nabubuhay kita sa panahon na normal na sana sa mga tawo na dai magpahiling nin respeto. Alagad dapat na dai kita magin arog sa sainda. Taano? Huling gusto ni Jehova na tawan ta nin onra, o pahilingan nin respeto, an “gabos na klase nin tawo.”—1 Ped. 2:17.

³ Makikinabang kita kun pag-uulayan ta an buot sabihon kan pagpahiling nin respeto sa iba asin kun paano ta iyan maipapahiling sa satong (1) mga kapamilya, (2) mga kapwa parasamba, asin sa (3) mga bako tang kapagtubod. Mapokus kita sa kun paano kita makakapahiling nin respeto sa mga sitwasyon na dipisil iyan gibuhon.

ANO AN BUOT SABIHON KAN PAGPAHILING NIN RESPETO?

4. Ano an buot sabihon kan pagpahiling nin respeto?

⁴ Ano an buot sabihon kan tataramon na “respeto”? Sa nagkapirang lengguwahe, magkakonektar an mga tataramon na “respeto” asin “onra.” Paano? An “respeto” panginot nang nanunungod sa kun paano ta minamansay an sarong tawo. Pag irinerespeto ta an iba, minamansay ta sinda bilang maninigo sa satong atensiyon asin konsiderasyon, tibaad huli sa saindang mga kuwalidad, mga naisagibo, o katungdan. Alagad an “onra” nanunungod sa kun paano ta tinatratar an sarong tawo. Pag tinatawan ta nin onra an iba, tinatratar niyato sinda sa paaging naipapamati tang pinapahalagahan niyato sinda, inaapresyar, asin tinatawan nin dignidad. Siyempre, tanganing magin tunay an itinatao tang onra, dapat na hali iyan sa puso.—Mat. 15:8.

5. Ano an makakatabang sa sato na magpahiling nin respeto sa iba?

⁵ Gusto ni Jehova na magpahiling kita nin respeto sa iba; sa katunayan, hinahagad niyang pahilingan ta kaiyan an “haralangkaw na awtoridad.” (Roma 13:1, 7) Alagad tibaad may mga magsabi, “Andam akong pahilingan nin respeto an iba basta tama an mga ginigibo ninda.” Tama daw an kaisipan na iyan? Bilang mga lingkod ni Jehova, aram niyato na nagpapahiling kita nin respeto sa mga tawo bako lang base sa saindang mga ginigibo. Mas hararom pa diyan an satong dahilan—an pagkamuot niyato ki Jehova asin an pagmawot tang mapaugma siya.—Jos. 4:14; 1 Ped. 3:15.

6. Magigibo ta daw na irespeto an saro na dai man kita irinerespeto? Ipaliwanag. (Hilingon man an ritrato.)

⁶ Tibaad isipon kan iba, ‘Magigibo ta daw talagang irespeto an saro na dai man kita irinerespeto?’ Iyo. Pag-isipan an nagkapirang halimbawa. Ipinasupog ni Hading Saul an aki niyang si Jonathan sa atubangan kan iba. (1 Sam. 20:30-34) Pero, may paggalang pa man giraray na sinuportaran ni Jonathan sa laban an saiyang amang si Saul sagkod kan aldaw na magadan ini. (Exo. 20:12; 2 Sam. 1:23) Inakusaran si Hana kan Halangkaw na Saserdoteng si Eli na burat daa ini. (1 Sam. 1:12-14) Dawa arog kaiyan, may paggalang na nagtaram si Hana ki Eli, dawa ngani aram kan gabos sa Israel an mga pagkukulang kaini bilang ama asin halangkaw na saserdote. (1 Sam. 1:15-18; 2:22-24) Asin ininsulto si Pablo kan mga lalaki sa Atenas, na inaapod siyang “matabil.” (Gibo 17:18) Sa ibong kaiyan, may paggalang na nagtaram sa sainda si Pablo. (Gibo 17:22) Ipinapahiling kan mga halimbawang iyan na an hararom na pagkamuot ki Jehova asin an pagkaigwa nin tamang pagkatakot na mapamundo siya makakapahiro sa sato na magpahiling nin respeto sa iba, bako lang pag pasil iyan na gibuhon kundi dawa pag dipisil man na magpahiling kaiyan. Pag-ulayan ta kun sairisay an maninigo sa satong respeto asin taano.

MAGPAHILING NIN RESPETO SA MGA KAPAMILYA

7. Ano an puwedeng makapadipisil sa sato na magpahiling nin respeto sa mga miyembro kan satong pamilya?

⁷ An kadipisilan. Dakul na panahon tang kaibanan an satong mga kapamilya. Huli kaiyan, aram ta an marahay na mga kuwalidad ninda pati man an saindang mga kaluyahan. An iba tibaad may hilang na nakakapadipisil sa pag-ataman ta sa sainda, o tibaad haraditon na marhay sinda. An iba ngani tibaad magtaram saka gumawi sa mga paaging nakakakulog sa sato. Imbes na hinguwahon na magin sarong lugar na nakakaginhawa asin matuninong an saindang harong, may mga indibidwal na nagkakawsa nin ribok paagi sa pagtratar sa saindang mga kapamilya nin daing respeto. Bilang resulta, mayo nin pagkakauruyon sa saindang pamilya. Arog sa artritis na nakakaapektar sa paghiro-hiro kan satong bilog na hawak, nakakaulang man an kawaran nin respeto na magin marahay an iribanan kan mga miyembro nin pamilya. Pero bakong arog sa artritis, na dai ta kayang bulungon sa sadiri ta sana, kaya tang manudan na magpahiling nin respeto sa lambang miyembro kan satong pamilya.

8. Taano ta mahalaga na magpahiling nin respeto sa mga kapamilya? (1 Timoteo 5:4, 8)

⁸ Taano ta dapat kitang magpahiling nin respeto? (Basahon an 1 Timoteo 5:4, 8.) Sa inot na surat ni Pablo ki Timoteo, tinukar niya kun paano dapat asikasuhon kan mga miyembro nin pamilya an pangangaipo kan lambang saro. Ipinaliwanag niya na tinatawan ta nin onra an satong mga kapamilya, bako lang basta dahil paninimbagan ta iyan, kundi panginot na dahil sa satong “debosyon sa Diyos.” An terminong iyan nanunungod sa maimbod na pagsamba asin paglilingkod sa Diyos. Si Jehova an nag-establisar kan areglo nin pamilya. (Efe. 3:14, 15) Kaya pag tinatawan ta nin onra an sarong kapamilya, an totoo tinatawan ta nin onra si Jehova, an Kag-establisar nin pamilya. (Hilingon an mga study note sa 1 Timoteo 5:4.) Makusog na dahilan nanggad iyan para magpahiling nin respeto sa mga kapamilya!

9. Paano maipapahiling kan agom na lalaki asin kan agom na babayi na irinerespeto ninda an lambang saro? (Hilingon man an mga ritrato.)

⁹ Kun paano makakapahiling nin respeto. Tinatawan nin onra kan agom na lalaki an saiyang agom pag ipinapahiling niya—sa pribado man o pag may mga kaibanan sinda—na mahalagang marhay siya sa saiya. (Tal. 31:28; 1 Ped. 3:7) Nungka niya siyang kinukulgan, ipinapasupog, o ipinapamati na dai siyang kuwenta. Si Ariela na taga Argentina nagsabi: “Dahil sa hilang ni agom, kun minsan nakakasabi siya nin mga nakakakulog sa sako. Pag nangyayari iyan, ipinapagirumdom ko sa sadiri ko na an mga sinasabi niya bako man talaga an namamatian niya. Ginigirumdom ko man an 1 Corinto 13:5. Nakakamotibar sako an tekstong iyan na makipag-ulay sa saiya sa magalang na paagi imbes na magin mapangmenos sa saiya.” (Tal. 19:11) Tinatawan man nin onra kan agom na babayi an saiyang agom pag positibong mga bagay an sinasabi niya sa iba manungod sa agom niya. (Efe. 5:33) Bako siyang sarkastiko sa agom niya, dai niya ini tinutuya, o binabansagan huling nasasabutan niyang an arog kaiyan na paggawi garo takla na nakakaraot sa pag-ibanan ninda. (Tal. 14:1) Sarong sister sa Italy na an agom haraditon na marhay an nag-istorya: “May mga pagkakataon na pagmati ko sobra man an paghadit ni agom sa mga bagay-bagay. Kaidto, maririsa sa mga sinasabi saka sa lalawgon ko na nawawaran ako nin respeto sa saiya. Pero nahiling kong mantang mas nakikiiba-iba ako sa mga tawong nagtataram nin may respeto manungod sa iba, nagigin mas motibado man akong magpahiling nin respeto sa agom ko.”

10. Paano maipapahiling kan mga hoben na irinerespeto ninda an saindang mga magurang?

¹⁰ Mga hoben, sunudon an mga patakaran na itinatao kan saindong mga magurang. (Efe. 6:1-3) Makipag-ulay sa saimong mga magurang sa magalang na paagi. (Exo. 21:17) Mantang nagkakaedad an mga magurang mo, tibaad mas mangaipo na sinda kan saimong tabang saka panahon. Kaya gibuhon an pinakamakakaya mo na atamanon sinda. Pag-isipan an halimbawa ni Maria, na an ama bakong Saksi ni Jehova. Kan magkahilang an saiyang ama, pinadipisil kaini ki Maria na atamanon siya. Nagigirumduman ni Maria: “Ipinamibi ko bako lang para magkaigwa ako nin respeto ki Tatay kundi para maipahiling ko man iyan. Naisip kong kun hinahagad sako ni Jehova na tawan nin onra an mga magurang ko, buot sabihon kaya niya man akong tawan kan kusog na magibo iyan. Pag-abot nin panahon, narealisar ko na dai man kaipuhan ni Tatay na baguhon an paggawi niya tanganing pahilingan ko siya nin respeto.” Pag tinatawan ta nin onra an satong mga kapamilya sa ibong kan mga pagkukulang ninda, pinapatunayan tang iginagalang ta an areglo ni Jehova.

MAGPAHILING NIN RESPETO SA MGA KAPAGTUBOD

11. Taano ta tibaad madipisilan kita kun minsan na trataron nin may respeto an satong mga kapagtubod?

¹¹ An kadipisilan. An satong mga kapagtubod namumuhay kauyon kan mga pamantayan kan Bibliya; alagad kun minsan, tibaad trataron kita kan iba sa bakong mabuot na paagi, husgaran kita nin bakong makatanusan, o iritaron kita. Kun an sarong kapagtubod may masabi o nagibo sa sato na sarong bagay na ‘dahilan para ireklamo’ ta siya, tibaad masakitan kitang padagos siyang irespeto. (Col. 3:13) Ano an makakatabang sa sato?

12. Taano ta mahalaga na magpahiling nin respeto sa mga kapagtubod? (2 Pedro 2:9-12)

¹² Taano ta dapat kitang magpahiling nin respeto? (Basahon an 2 Pedro 2:9-12.) Sa ikaduwang ipinasabong na surat ni Pedro, sinambit niya na may nagkapirang indibidwal sa inot na siglong Kristiyanong kongregasyon na nagtataram nin daing paggalang sa mga “tinawan nin Diyos nin onra,” an buot sabihon, sa Kristiyanong kamagurangan. Ano an reaksiyon kan maimbod na mga anghel kan mahiling ninda iyan? “Bilang paggalang ki Jehova,” dai sinda nagtaram nin ano man na maraot laban sa daing galang na mga indibidwal na idto. Imahinara na sana iyan! An perpektong mga anghel dai nagtaram nin malanit sa aroganteng mga tawong idto. Imbes, ipinabaya ninda ki Jehova an paghusgar asin pagsaway sa sainda. (Roma 14:10-12; ikumparar an Judas 9.) May manunudan kita sa mga anghel. Kun dai ta ngani tinatratar nin daing paggalang an mga parakontra, lalo nang lilikayan tang trataron nin daing paggalang an mga kapagtubod niyato. Sa kabaliktaran, dapat kitang “manginot” sa pagtao nin onra sa sainda. (Roma 12:10) Sa paggibo kaiyan, ipinapahiling tang irinerespeto ta si Jehova.

13-14. Paano kita makakapahiling nin respeto sa mga yaon sa satong kongregasyon? Magtao nin mga halimbawa. (Hilingon man an mga ritrato.)

¹³ Kun paano makakapahiling nin respeto. Mga elder, pag nagtutukdo kamo, hinguwahon na pirming gibuhon iyan sa mamumuton na paagi. (Filem. 8, 9) Kun kaipuhan nindong magsadol, gibuhon iyan sa mabuot na paagi asin bako pag nauuyam kamo. Mga sister, dakula an maitatabang nindo para an gabos sa kongregasyon makapahiling nin respeto sa lambang saro. Magigibo nindo iyan paagi sa dai pagbali sa mga iristoryahan na may kaiba nang tsismis o pagpakaraot sa iba. (Tito 2:3-5) Maipapahiling niyato gabos na irinerespeto ta an mga elder sa kongregasyon paagi sa pakikikooperar asin pagpasalamat sa sainda sa mga ginigibo nindang paghihinguwa para magkondukta nin mga pagtiripon, manginot sa gibuhon na paghuhulit, asin magtabang sa mga ‘napasala nin lakad.’—Gal. 6:1; 1 Tim. 5:17.

¹⁴ An sister na si Rocío nasakitan na irespeto an sarong elder na nagtao sa saiya nin sadol. Sinabi niya: “Nauyam ako saiya ta pagmati ko dai siya nagin mabuot sako. Kaya pagpuli ko sa harong, nagtaram ako nin mga negatibo manungod saiya. Dawa ngani dai ko ipinaparisa, sa buot-buot ko duda ako sa mga motibo niya saka habo kong sunudon an sadol niya.” Ano an nakatabang ki Rocío? Ipinaliwanag niya: “Sa pagbasa ko nin Bibliya, naagihan ko an 1 Tesalonica 5:12, 13. Kan marealisar ko na dai na ako nagpapahiling nin respeto sa brother na ini, nagpuon akong ribukon kan konsiyensiya ko. Namibi ako ki Jehova asin nag-research sa satong mga publikasyon para makahanap nin espesipikong impormasyon na makakatabang sa sako na mabago an sakong sabuot. Kan huri, narealisar ko na an problema bako an brother kundi an pride ko. Nasasabutan ko na ngunyan na kaipuhan ko nin kapakumbabaan tanganing makapahiling nin respeto sa iba. Aram kong may mga kaipuhan pa akong pauswagon, pero mantang hinihinguwa kong magpahiling nin respeto, namamati kong napapaugma ko si Jehova.”

MAGPAHILING NIN RESPETO SA MGA BAKONG KAPAGTUBOD

15. Taano ta tibaad masakitan kitang magpahiling nin respeto sa mga bako niyatong kapagtubod?

¹⁵ An kadipisilan. Parati kitang nakakanumpong sa ministeryo nin mga tawo na dai interesado sa katotoohan sa Bibliya. (Efe. 4:18) May mga tawo man na habong magdangog sa satong mensahe dahil sa mga katukduan o paniniwalang dinakulaan ninda. Tibaad an employer o titser ta dai naaapresyar an satong mga ginigibo o tibaad may mga katrabaho o kaeskuwela kita na masakit pakiibanan. Sa paglihis nin panahon, tibaad mabawasan na an respeto ta sa sainda asin dai na niyato sinda trataron arog kan gusto tang magin pagtratar ninda sa sato.

16. Taano ta mahalaga na magpahiling nin respeto sa mga bako pang lingkod ni Jehova? (1 Pedro 2:12; 3:15)

¹⁶ Taano ta dapat kitang magpahiling nin respeto? Girumdumon na tinatawan ni Jehova nin atensiyon kun paano ta tinatratar an mga bakong kapagtubod. Ipinagirumdom ni apostol Pablo sa mga Kristiyano na paagi sa saindang marahay na paggawi puwedeng mapahiro an nagkapira na “pamurawayon . . . an Diyos.” Huli kaiyan, sinadol niya sinda na idepensa an saindang pagtubod “na may mahuyong buot asin hararom na paggalang.” (Basahon an 1 Pedro 2:12; 3:15.) Sinda man nasa atubangan kan korte asin idinedepensa an saindang pagtubod o nakikipag-ulay sa saindang pagtaraid para idepensa an saindang mga tinutubod, dapat na trataron kan mga Kristiyano an mga bakong kapagtubod arog mismo kan gigibuhon ninda kun yaon sinda sa atubangan nin Diyos. Tutal, naghihiling si Jehova asin nagdadangog sa mga sinasabi ta asin kun paano ta iyan sinasabi. Mapuwersang dahilan nanggad iyan na trataron ta nin may respeto an mga bakong kapagtubod!

17. Paano kita makakapahiling nin respeto sa mga bako tang kapagtubod?

¹⁷ Kun paano makakapahiling nin respeto. Mantang nasa ministeryo, habo ta nanggad na magtao nin impresyon na minemenos ta an mga may dikit o mayong kaaraman sa Bibliya. Imbes, gusto tang mansayon an iba bilang mahalagang marhay sa Diyos asin mas urog kisa sato. (Hag. 2:7; Fil. 2:3) Kun may nang-iinsulto sa saimo huli sa mga tinutubod mo, pugulan an sadiri na magbalos, arog kan pagsabi sa saiya nin madunong kutanang simbag pero sarkastiko man. (1 Ped. 2:23) Kun makagibo ka nin sarong bagay na dai mo pinag-isipan, maghagad tulos nin dispensa. Paano ka makakapahiling nin respeto pag nasa trabaho? Magin mahigos asin hinguwahon na magpahiling nin marahay na ugali sa mga katrabaho saka sa employer mo. (Tito 2:9, 10) Dawa kun ika onesto, mahigos, asin dedikado sa trabaho, dai mo pa man giraray sigurado kun pirmi mong mapapaugma an mga tawo, pero an Diyos siguradong mapapaugma mo.—Col. 3:22, 23.

18. Taano ta mahalaga na magkaigwa kita nin respeto asin ipahiling iyan sa iba?

¹⁸ Dakulon nanggad kita nin dahilan para magkaigwa nin respeto asin ipahiling iyan sa iba! Nahiling niyato na pag nagpapahiling kita nin respeto sa satong mga kapamilya, natatawan ta nin onra si Jehova, an satong Payo kan pamilya. Siring man, pag nagpapahiling kita nin respeto sa satong mga tugang sa espirituwal, natatawan ta nin onra an satong Ama sa langit. Asin pag nagpapahiling kita nin respeto sa mga bakong kapagtubod, natatawan ta sinda nin pinakamarahay na dahilan para pamurawayon, o umawon, an satong makapangyarihan na Diyos. Dawa pa kun dai kita pahilingan nin respeto kan iba, mahalaga nanggad na magkaigwa kita nin respeto asin ipahiling iyan sa sainda. Taano? Huling bebendisyunan kita ni Jehova. Nanunuga siya: “An mga nagtataong onra sa sako tatawan ko nin onra.”—1 Sam. 2:30.