Siisay si Maria Magdalena?
An simbag kan Bibliya
Si Maria Magdalena sarong maimbod na parasunod ni Jesu-Cristo. An pangaran niya na Magdalena posibleng marhay na nanunungod sa banwaan nin Magdala (na posibleng iyo an Magadan), na harani sa Dagat nin Galilea. Posibleng nag-istar duman si Maria.
Saro si Maria Magdalena sa mga babayi na nagbaklay kaiba ni Jesus saka kan saiyang mga disipulo asin nagtao sa sainda nin materyal na suporta. (Lucas 8:1-3) Nahiling niya an paggadan ki Jesus. Saro siya sa mga inot na nakahiling ki Jesus pagkabuhay liwat saiya.—Marcos 15:40; Juan 20:11-18.
Si Maria Magdalena daw sarong hostes?
Mayong sinasabi an Bibliya na sarong hostes si Maria Magdalena. An sinasabi sana kaiyan iyo na nagpalayas si Jesus nin pitong demonyo hali sa saiya.—Lucas 8:2.
Sain hali an ideya na saro daa siyang hostes? Ginatos na taon pagkagadan niya, may mga nagsabi na siya man sana daa idtong dai pinangaranan na babayi (na posibleng marhay na sarong hostes) na naghugas sa mga bitis ni Jesus gamit an mga luha niya saka pinunasan iyan kan saiyang buhok. (Lucas 7:36-38) Pero, mayong basehan sa Bibliya na nagpapatunay kan paniniwalang iyan.
Si Maria Magdalena daw sarong “apostol kan mga apostol”?
Bako. Inaapod kan Iglesya Katolika si Maria na “Santa Maria Magdalena” saka “an apostol kan mga apostol,” huling saro siya sa mga inot na nagbareta sa mga apostol kan pagkabuhay liwat ni Jesus. (Juan 20:18) Pero dai kaiyan buot sabihon na apostol siya dahil sa ginibo niyang iyan. Asin mayo man sinasabi an Bibliya na saro siyang apostol.—Lucas 6:12-16.
Natapos na isurat an Bibliya sa pagtatapos kan inot na siglo C.E. Pero kan ikaanom na siglo, saka lang ginibong “santa” si Maria Magdalena kan mga nanginginot sa simbahan para tawan siya nin espesyal na posisyon. May mga isinurat kan ikaduwa saka ikatulong siglo—na bako man talagang parte kan Bibliya—na nagsasabi na an pira daa sa mga apostol ni Jesus nauuri ki Maria. An arog kaiyan na mga uruistorya mayong basehan sa Bibliya.
Si Maria Magdalena daw an agom ni Jesu-Cristo?
Bako. Sa katunayan, malinaw na sinasabi kan Bibliya na dai nag-agom si Jesus.a
a Hilingon an artikulong “May Asawa ba si Jesus? May mga Kapatid ba si Jesus?”