Kun Paano Aatubangon an Biglang Pagkakahilang

Nagkahilang ka daw nin dai mo inaasahan? Talagang nakakaubos iyan nin kusog dahil makulog iyan sa payo, sa daghan, saka sa bulsa. Paano mo iyan makakayanan? Paano mo matatabangan an sarong kapamilya o amigo na may tinatagalan na hilang? Dawa ngani bako man libro sa medisina an Bibliya, igwa iyan nin praktikal na mga prinsipyo na makakatabang saimo na matagalan an inaagihan mong masakit na sitwasyon.

Mga giya na makakatabang saimo pag nagkahilang ka

• Magpakonsulta sa doktor

  An sinasabi kan Bibliya: “An mga tawong marahay an salud dai nangangaipo nin doktor, pero an mga may hilang iyo.”—Mateo 9:12.

  Kun paano susunudon: Magpakonsulta sa doktor kun kinakaipuhan.

  Gibuhon ini: Pilion an pinakamarahay na pagbulong para saimo. Kun minsan, tibaad madunong na magpakonsulta giraray sa iba pang mga doktor. (Talinhaga 14:15) Makipag-ulay sa mga doktor mo. Siguraduhon na nasasabutan mo an mga sinasabi ninda saka na aram ninda an mga sintomas na namamati mo. (Talinhaga 15:22) Mag-research manungod sa hilang mo, kaiba na an mga pagbulong na puwede mong pagpilian. Pag malinaw na saimo an mga puwedeng mong asahan, mas andam ka nang akuon an kamugtakan mo saka makakagibo ka nin marahay na desisyon manungod sa paagi nin pagbulong na pipilion mo.

• Magkaigwa nin marahay na rutina nin pag-ataman sa salud

  An sinasabi kan Bibliya: “An ehersisyo marahay sa saimong hawak.”—1 Timoteo 4:8, Contemporary English Version.

  Kun paano susunudon: Makikinabang ka sa pagkaigwa nin marahay na rutina sa pag-ataman sa salud, arog kan regular na pag-ehersisyo.

  Gibuhon ini: Regular na mag-ehersisyo, magkakan nin tama asin masustansiyang mga kakanon, saka magkaigwa nin supisyenteng turog. Iyo, tibaad nag-a-adjust ka sa bagong rutina mo huli sa kamugtakan kan salud mo, pero sinasabi kan mga eksperto na sulit nanggad kun hihinguwahon mong magkaigwa nin marahay na rutina nin pag-ataman sa salud. Pero ano man an gigibuhon mo, siguraduhon na dai iyan makakaapektar sa kondisyon mo saka sa paagi nin pagbulong na ginigibo mo.

• Magpatabang sa iba

  An sinasabi kan Bibliya: “An tunay na amigo nagpapahiling nin pagkamuot sa gabos na panahon asin sarong tugang na namumundag sa mga panahon nin kasakitan.”—Talinhaga 17:17.

  Kun paano susunudon: Makakatabang saimo an mga amigo mo para matagalan an mga kasakitan na inaagihan mo.

  Gibuhon ini: Makipag-ulay sa sarong pinagkakatiwalaan na amigo na mapagsasabihan mo kan gabos na namamatian mo. Makakatabang iyan na mabawasan an stress mo saka makakapagian iyan sa pagmati mo. Gusto kan mga amigo saka mga kapamilya mo na tabangan ka, pero tibaad dai ninda aram kun paano iyan gigibuhon. Kaya sabihon sainda kun ano talagang tabang an kaipuhan mo. Magin rasonable sa inaasahan mo, asin pirming magpasalamat sa itinatao nindang tabang. Pero, tibaad kaipuhan mo man magbugtak nin mga limitasyon, arog kan kun gurano kaparati saka kahaloy an pagbisita saimo para dai ka mapagal.

• Magdanay na positibo

  An sinasabi kan Bibliya: “An maugmang puso marahay na bulong, pero an runot na espiritu nakakaubos nin kusog.”—Talinhaga 17:22.

  Kun paano susunudon: Makakatabang saimo an pagigin positibo na magdanay na kalmado saka makayanan na atubangon an grabeng stress huli sa pagkaigwa nin hilang.

  Gibuhon ini: Mantang nag-a-adjust ka sa bagong kamugtakan mo, magpokus sa mga bagay na kaya mong gibuhon, bako sa mga bagay na dai mo man kontrolado. Likayan na ikumparar an sadiri mo sa iba o sa kamugtakan mo kaidto na mayo ka pang hilang. (Galacia 6:4) Magbugtak nin rasonableng mga pasuhan na kaya mong abuton. Makakatabang an mga ini na magin positibo ka sa pag-atubang kan mga mangyayari sa maabot. (Talinhaga 24:10) Magtabang sa iba kun itinutugot iyan kan kamugtakan mo. An kaugmahan na dara kan pagigin matinao makakatabang saimo na dai magparapokus sa mga problema mo.—Gibo 20:35.

Tatabangan ka daw nin Diyos pag nagkahilang ka?

Sinasabi kan Bibliya na tatabangan kan Diyos na Jehovaa an sarong tawo na makayanan an mga problema niya huli sa pagkakahilang. Bagaman dai kita naglalaom na mamilagro an Diyos para paumayan kita, an mga nagsasamba sa saiya nag-aako kan saiyang tabang sa minasunod na mga paagi:

Katuninungan. Itatao ni Jehova “an katuninungan nin Diyos na nakakalabi sa gabos na pakasabot.” (Filipos 4:6, 7) Huli sa katuninungan na ini, o pakamati nin pagigin kalmado, matatabangan an saro na dai magparahadit na marhay. Kaya pag namimibi an saro asin ipinapahayag an mga ikinakahadit niya, siguradong itatao nin Diyos an katuninungan na iyan.—1 Pedro 5:7.

Kadunungan. Kaya kitang tawan ni Jehova nin kadunungan para makagibo nin madunong na mga desisyon. (Santiago 1:5) Paagi sa pag-adal asin pagsabuhay kan mga prinsipyo sa Bibliya, magkakaigwa nin arog kaiyan na kadunungan an saro.

Magayon na paglaom sa maabot. Nanunuga si Jehova na sa maabot na panahon, “mayo [na] nin residente an magsasabi: ‘May hilang ako.’” (Isaias 33:24) Huli sa paglaom na ini, dakul an nagdadanay na positibo dawa ngani may tinatagalan sindang grabeng hilang.—Jeremias 29:11, 12.