Dapat Daw Makiaram an Relihiyon sa Pulitika?

Sa bilog na kinaban, dakul na tawo na naghihingako na nagsusunod ki Jesu-Cristo an aktibong marhay na nakikiaram sa pulitika. Hinihinguwa kan iba na ipalakop an saindang relihiyosong mga paniniwala asin mga pamantayan sa moral paagi sa pagsuportar sa partikular na mga kandidato o mga partido sa pulitika. Dangan an mga pulitiko man, parating ginagamit an mga isyu sa moral o kamugtakan kan sosyedad para makua an suporta kan relihiyosong mga tawo. Ordinaryo na sana para sa mga lider nin relihiyon na kumandidato para sa sarong posisyon sa gobyerno. Asin sa nagkapirang nasyon, an sarong “Kristiyanong” denominasyon puwede pa nganing midbidon bilang relihiyon nin estado, o nasyon.

Ano sa hiling mo? Dapat daw na makiaram sa pulitika an mga parasunod ni Jesu-Cristo? Maaaraman mo an simbag paagi sa pagsiyasat sa halimbawa ni Jesus. Sinabi niya: “Nagtao ako sa saindo nin arugan, tanganing kun ano an ginibo ko sa saindo, iyo man dapat an gibuhon nindo.” (Juan 13:15) Kun manungod sa pulitika, anong halimbawa an itinao ni Jesus?

Nakiaram daw si Jesus sa pulitika?

Dai. Si Jesus dai nakiaram sa pulitika kan kinaban.

Dai si Jesus nagmawot na magkaigwa nin kapangyarihan sa pulitika. Nagsayuma siyang magin tagapamahala kan mga gobyerno nin tawo kan ialok sa saiya ni Satanas na Diyablo an “gabos na kahadian kan kinaban.” (Mateo 4:8-10)a Sa saro pang pagkakataon, nahiling kan mga tawo an magayon na mga kuwalidad ni Jesus na kaipuhan sa sarong lider kaya hininguwa nindang palaugon siya sa pulitika. Sinasabi kan Bibliya: “Huling aram ni Jesus na marani na sinda tanganing puwersahan siyang kuanon para gibuhon na hadi ninda, naghali giraray siya asin solong nagpasiring sa bukid.” (Juan 6:15) Dai ni Jesus sinunod an gusto kan mga tawo. Imbes, nagsayuma siyang makiaram sa pulitika.

Mayo nin kinampihan si Jesus sa mga isyu sa pulitika. Halimbawa, kan panahon ni Jesus, ikinakaanggot kan mga Judio an pagbayad nin buhis sa gobyerno kan Roma asin ibinilang ninda ining bakong makatanusan asin pagabat. Kan purbaran ninda na pakomentuhon si Jesus sa isyu para mahiling kun sain siya makampi, dai siya nakipag-argumento kun baga makatanusan o bako an mga buhis na iyan. Sinabi niya sa sainda: “Itao nindo ki Cesar an mga bagay na ki Cesar, pero sa Diyos an mga bagay na sa Diyos.” (Marcos 12:13-17) Nagdanay siyang neutral sa isyu sa pulitika pero sinabi niya na dapat na bayadan an mga buhis na hinahagad kan gobyerno kan Roma, na irinerepresentar ni Cesar. Kasabay kaiyan, ipinahiling niya na limitado sana an pagsunod sa sekular na awtoridad. An saro dai dapat na itao sa gobyerno an mga bagay na dapat na itao niya sana sa Diyos, kabilang na diyan an debosyon asin pagsamba.—Mateo 4:10; 22:37, 38.

Sinuportaran ni Jesus an sarong gobyerno sa langit, an Kahadian nin Diyos. (Lucas 4:43) Dai siya nakiaram sa pulitika huling aram niya na an Kahadian nin Diyos, bako an mga gobyerno nin tawo, an makakagibo kan katuyuhan nin Diyos para sa daga. (Mateo 6:10) Nasabutan niya na dai gagamiton kan Kahadian nin Diyos an mga gobyerno nin tawo kundi iyan an masalida sa mga iyan.—Daniel 2:44.

Nakiaram daw an inot na siglong mga Kristiyano sa pulitika?

Dai. Sinunod kan mga parasunod ni Jesus an pagbuot niya na magin “bakong kabtang kan kinaban.” (Juan 15:19) Sinunod ninda an halimbawa niya asin nagdanay na siblag sa pulitika kan kinaban. (Juan 17:16; 18:36) Imbes na makiaram sa mga bagay-bagay sa pulitika, ginibo ninda an gibuhon na ipinagbuot ni Jesus—an paghuhulit asin pagtutukdo manungod sa Kahadian nin Diyos.—Mateo 28:18-20; Gibo 10:42.

Ininot kan mga Kristiyano kan inot na siglo sa saindang buhay an pagsunod sa Diyos, pero aram man ninda na kaipuhan nindang igalang an sekular na mga awtoridad. (Gibo 5:29; 1 Pedro 2:13, 17) Sinunod ninda an mga ley asin nagbayad sinda nin buhis. (Roma 13:1, 7) Dawa ngani dai sinda nakiaram sa pulitika, nakinabang sinda sa legal na mga proteksiyon asin mga serbisyo na itinatao kan mga gobyerno.—Gibo 25:10, 11; Filipos 1:7.

Kristiyanong neutralidad ngunyan

Malinaw na ipinapahiling kan Bibliya na si Jesus asin an saiyang inot na mga parasunod dai nakiaram sa pulitika. Huli kaiyan, bilang mga Kristiyano, an mga Saksi ni Jehova sa bilog na kinaban nagdadanay na lubos na neutral. Arog kan inot na siglong mga Kristiyano, ginigibo ninda an gibuhon na ipinagbuot ni Jesus—ihinuhulit ninda “an maugmang baretang ini kan Kahadian.”—Mateo 24:14.