Makusog na mga Linog—Ano an Iprinopesiya kan Bibliya?

Kada taon, nagkakaigwa nin manampulong ribong linog. Dawa kadaklan sa mga iyan maluya, an makusog na mga linog puwedeng magkawsa nin grabeng destroso, pagsakit, asin kagadanan. Kun minsan, nagreresulta iyan sa mga tsunami na nandedestroso sa mga lugar na harani sa baybayon, asin minagadan sa dakul na nakaistar diyan. Ihinula daw kan Bibliya an makusog na mga linog na ini?

Sa artikulong ini

• Iprinopesiya daw kan Bibliya an mga linog?

• Kautuban daw kan propesiya sa Bibliya an mga linog ngunyan?

• Ano an kahulugan para sa sato kan propesiya sa Bibliya manungod sa mga linog?

• Mga salang ideya manungod sa mga propesiya sa Bibliya asin sa mga linog

Iprinopesiya daw kan Bibliya an mga linog?

Sinasambit kan Bibliya an mga linog sa propesiyang itinao ni Jesus. Nakasurat iyan sa minasunod na teksto sa tulong libro sa Bibliya:

“An nasyon makikilaban sa nasyon asin an kahadian makikilaban sa kahadian, asin magkakaigwa nin sunod-sunod na kakulangan nin kakanon saka linog sa manlain-lain na lugar.”—Mateo 24:7.

“An nasyon makikilaban sa nasyon asin an kahadian makikilaban sa kahadian; magkakaigwa nin sunod-sunod na linog sa manlain-lain na lugar; magkakaigwa man nin kakulangan nin kakanon.”—Marcos 13:8.

“Magkakaigwa nin makusog na mga linog asin nin sunod-sunod na kakulangan nin kakanon saka epidemya sa manlain-lain na lugar.”—Lucas 21:11.

Ihinula ni Jesus na magkakaigwa nin sunod-sunod na “makusog na mga linog . . . sa manlain-lain na lugar” sa panahon na nangyayari man an mga giyera, kakulangan nin kakanon, saka epidemya. Kun gabos iyan sarabay nang nangyayari, iyo na iyan an panahon sa kasaysayan nin tawo na inaapod na “pagtatapos kan sistema nin mga bagay,” o “huring mga aldaw.” (Mateo 24:3; 2 Timoteo 3:1) Uyon sa kronolohiya kan Bibliya, an “huring mga aldaw” nagpuon kan 1914 asin dai pa iyan natatapos.

Kautuban daw kan propesiya sa Bibliya an mga linog ngunyan?

Iyo. An propesiya ni Jesus, kaiba na an sinabi niya manungod sa mga linog, nahihiling tang nangyayari na sa satong panahon. Puon kan 1914, nagkaigwa na nin labing 1,950 makusog na mga linog, na nagresulta sa pagkagadan nin labing duwang milyon katawo.a Hilingon ta an pirang halimbawa sa siglong ini na kinabubuhayan ta.

2004—Indian Ocean. Sarong 9.1-magnitude na linog an nagkawsa nin tsunami na nakaapektar sa nagkapirang nasyon asin guminadan nin mga 225,000 katawo.

2008—China. Sarong 7.9-magnitude na linog an nangraot sa mga baryo saka banwaan. Kinakarkulong 90,000 katawo an nagadan, mga 375,000 katawo an nairido, saka minilyon an nawaran nin istaran.

2010—Haiti. Sarong 7.0-magnitude na linog na sinundan nin nagkapirang makukusog na saradit na linog (aftershocks) an guminadan nin labing 300,000 katawo asin nagin dahilan na mawaran nin istaran an labing sarong milyon na iba pa.

2011—Japan. Sarong 9.0-magnitude na linog asin an mga tsunami na resulta kaiyan kinakarkulong guminadan nin 18,500 katawo asin ginatos na ribo an napiritan na humali sa sadiri nindang lugar. Naraot man kaiyan an planta nin kuryente kan Fukushima, na nagresulta sa mayor na kontaminasyon nin radyoaktibong mga kemikal. Pakalihis nin sampulong taon, mga 40,000 katawo an dai pa man giraray makabalik sa mga harong ninda na harani sa planta huli sa halangkaw na lebel nin radyasyon.

Ano an kahulugan para sa sato kan propesiya sa Bibliya manungod sa mga linog?

An propesiya sa Bibliya manungod sa mga linog nagpapatanid sa sato sa kun ano an mangyayari sa dai na mahahaloy. Sinabi ni Jesus: “Pag nahiling nindong nangyayari na an mga bagay na ini, makakasiyerto nanggad kamo na harani na an Kahadian nin Diyos.”—Lucas 21:31.

Ipinapaliwanag kan Bibliya na an Kahadian nin Diyos sarong tunay na gobyerno sa langit na si Jesu-Cristo an Hadi. An Kahadian na ini iyo an itinukdo ni Jesus sa saiyang mga parasunod na ipamibi ninda.—Mateo 6:10.

Pag an Kahadian nin Diyos namamahala na digdi sa daga, dai tutugutan nin Diyos an natural na mga kalamidad, kaiba na an mga linog, na makadanyar sa mga tawo. (Isaias 32:18) Saro pa, hahalion niya an pisikal asin emosyonal na danyos na resulta kan mga linog sa satong panahon. (Isaias 65:17; Kapahayagan 21:3, 4) Para sa dugang pang impormasyon, basahon an artikulong “Ano an Gigibuhon kan Kahadian nin Diyos?”