Pinagrabe Pa kan Giyera sa Ukraine an Krisis sa Kakanon sa Bilog na Kinaban

Kan Mayo 19, 2022, sinabi sa United Nations Security Council kan labing 75 halangkaw na opisyal na “sarong pangglobong krisis sa kakanon, na naglala huli sa COVID-19 na pandemya saka sa pagbago kan klima, an puwedeng sumagkod sa tiggutom sa bilog na kinaban dahil sa giyera sa Ukraine.” Dai nahaloy pagkatapos kaiyan, sinabi kan The Economist na “dahil sa giyera mas dakul pa an magugutom sa kinaban na ini na pano nin problema.” Ihinula kan Bibliya na an arog kaiyan na mga krisis sa kakanon mangyayari sa panahon ta, pero nagtatao man iyan sa sato nin tabang para makayanan an mga iyan.

Ihinula kan Bibliya na magkakaigwa nin krisis sa kakanon

•  Iprinopesiya ni Jesus: “An nasyon makikilaban sa nasyon asin an kahadian makikilaban sa kahadian, asin magkakaigwa nin . . . kakulangan nin kakanon.”—Mateo 24:7.

•  An libro kan Bibliya na Kapahayagan may ilinaladawan na apat na simbolikong parakabayo. An saro sa mga parakabayong idto nagrerepresentar sa giyera. Sinusundan siya nin saro pa na nagrerepresentar sa tiggutom, sarong panahon na diyan an kakanon irarasyon saka ipapabakal sa halangkawon na presyo. “Nahiling ko sarong kabayong itom. An nangangabayo may kapot na sarong timbangan. Nakadangog ako nin garo tingog . . . na nagsabi, ‘Sarong takad na trigo sana an mababakal kan sarong aldaw na tandan; tolong takad na sebada sana an mababakal kan sarong aldaw na tandan.’”—Kapahayagan 6:5, 6, An Marahay na Bareta Biblia.

An mga propesiyang ini kan Bibliya manungod sa krisis sa kakanon nauutob na ngunyan sa panahon na inaapod kan Bibliya na “huring mga aldaw.” (2 Timoteo 3:1) Para mas makanuod pa manungod sa “huring mga aldaw” asin sa pangangabayo kan apat na parakabayo, hilingon an video na An Kinaban Nagbago Puon kan 1914 asin basahon an artikulo na “An Apat na Parakabayo—Siisay Sinda?”

Kun paano makakatabang an Bibliya

•  An Bibliya igwa nin praktikal na mga sadol na makakatabang sa sato na makayanan an dipisil na mga kamugtakan, kaiba na an paglangkaw kan presyo kan mga kakanon o an kakulangan nin kakanon pa ngani. Hilingon an nagkapirang halimbawa sa artikulo na “Paano Ka Makakapag-adjust Kapag Nabawasan ang Iyong Kita?”

•  An Bibliya nagtatao man sato nin paglaom na magigin marahay an mga kamugtakan. Nanunuga iyan na maabot an panahon na diyan “magkakaigwa nin abundang tipasi sa ibabaw kan daga” asin an gabos magkakaigwa nin bastanteng kakanon. (Salmo 72:16) Para mas makanuod pa manungod sa paglaom na sinasabi kan Bibliya para sa maabot asin kun taano ta makakapagtiwala ka diyan, basahon an artikulo na “Makakaasa Ka sa Isang Magandang Kinabukasan.”