Siisay na Lider an Pipilion Mo?—Ano an Sinasabi kan Bibliya?

Importanteng desisyon talaga para sa mga tawo kun sairisay na mga lider an pipilion ninda.

Ano an sinasabi kan Bibliya?

An mga tawong lider igwa nin mga limitasyon

Sinasabi kan Bibliya na igwa nin mga limitasyon an gabos na tawong lider.

• “Dai kamo magtiwala sa mga pamayo ni sa aki nin tawo, na dai makakapagligtas. Minaluwas an hinangos niya, minabalik siya sa daga; sa mismong aldaw na iyan an saiyang pag-iisip napapara.”—Salmo 146:3, 4, nota sa ibaba.

Dawa an pinakamay kakayahan na mga lider nagagadan pag-abot nin panahon. Saro pa, dai ninda maigagarantiya na maipagpapadagos kan mga masurunod sainda an marahay nindang mga nagibo.—Eclesiastes 2:18, 19.

An totoo, sinasabi kan Bibliya na dai talaga kaya kan mga tawo na pamahalaan an saindang sadiri.

• “Bako para sa tawong naglalakaw dawa an giyahan an sadiring lakad niya.”—Jeremias 10:23.

Igwa daw nin siisay man na makakatao sa ngunyan nin marahay na pamamahala?

Sarong lider na inuuyunan nin Diyos

Sinasabi kan Bibliya na nagtalaga an Diyos nin sarong pinakamay kakayahan asin mapagtitiwalaan na lider: si Jesu-Cristo. (Salmo 2:6) Si Jesus iyo an Hadi kan Kahadian nin Diyos, na sarong gobyerno na namamahala sa langit.—Mateo 6:10.

Pipilion mo daw an pamamahala ni Jesus? Ipinapahiling kan Bibliya an kahalagahan kan desisyon na iyan:

• “Tawan nindo nin onra an aki [si Jesu-Cristo], ta kun dai, maaanggot an Diyos asin mapapara kamo sa dalan, huling minalaad tulos an kaanggutan Niya. Maugma an gabos na nagpapaili sa Saiya.”—Salmo 2:12.

Ngunyan na an panahon na gumibo ka nin desisyon. Ipinapahiling kan mga propesiya sa Bibliya na nagpuon nang mamahala si Jesus kan taon 1914 asin dai na mahahaloy sasalidahan kan Kahadian nin Diyos an gabos na gobyerno nin tawo.—Daniel 2:44.

Para makanuod pa kun paano mo masusuportaran an pamamahala ni Jesus, basahon an artikulong “Suportaran Ngunyan an Kahadian nin Diyos!”