Sa wala: Bagyong Ian, Florida, USA, Setyembre 2022 (Sean Rayford/Getty Images); sa tahaw: Sarong mag-ina na nag-eebakwar, Donetsk, Ukraine, Hulyo 2022 (Alex Chan Tsz Yuk/SOPA Images/LightRocket via Getty Images); sa tuo: Dakulon na tawo na nagpapa-test para sa COVID, Beijing, China, Abril 2022 (Kevin Frayer/Getty Images)
PADAGOS NA MAGBANTAY!
2022: Taon nin Grabeng Kapurisawan Asin Karibarawan—Ano an Sinasabi kan Bibliya?
Durante kan 2022, pirmi na sanang laog kan bareta an giyera, kasakitan sa pagbuhay, asin mga kalamidad. An Bibliya sana an nagpapaliwanag kan tunay na kahulugan kan mga pangyayaring iyan.
An tunay na kahulugan kan mga pangyayari kan 2022
Huli sa mga pangyayari kan nakaaging taon mas hiling-hiling na nabubuhay na kita sa inaapod kan Bibliya na “huring mga aldaw.” (2 Timoteo 3:1) An peryodo nin panahon na iyan nagpuon kan taon 1914. Mangnuhon kun paanong an dai pa sana nahahaloy na mga pangyayari kauyon kan ihinula kan Bibliya na mangyayari sa panahon niyato:
“Mga giyera.”—Mateo 24:6.
“An 2022 [an] Taon na Naeksperyensiyahan Giraray kan Europa an Nakakatakot na mga Epekto nin Giyera.”a
Hilingon an artikulong “Pinunan na Sakupon kan Russia an Ukraine.”
“Kakulangan nin kakanon.”—Mateo 24:7.
“2022: Taon nin Grabeng Tiggutom na Dai Pa Nangyari Kasuarin Man.”b
Hilingon an artikulong “Pinagrabe Pa kan Giyera sa Ukraine an Krisis sa Kakanon sa Bilog na Kinaban.”
“Epidemya.”—Lucas 21:11.
“An pagbabalik kan polio, mantang luminangkaw na marhay an bilang kan mga nagkakaigwa nin monkeypox asin nagpapadagos sa pandadanyar an COVID-19, malinaw na nagpapahiling kun gurano kagrabe an huma sa katawuhan kan nakakaulakit na mga hilang asin kun gurano sinda kadaing kalaban-laban diyan.”c
Hilingon an artikulong “6 na Milyon an Nagadan Dahil sa COVID.”
“Makatatakot na mga tanawon.”—Lucas 21:11.
“Mga heatwave, grabeng tigmara, wildfire, asin mga pagbaha. An tig-init kan 2022 siguradong rurumdumon sa dakulon na grabeng kalamidad na konektado sa kamugtakan nin panahon na nagdara nin grabeng destroso, guminadan nin ginatos na ribong tawo, asin nagin dahilan na mawaran nin harong an minilyon sa bilog na kinaban.”d
Hilingon an artikulong “Sobrang Init nin Panahon sa Bilog na Kinaban.”
“Mga kariribukan [o, “rebelyon,” nota sa ibaba].”—Lucas 21:9.
“Huli sa nag-uurog na kaanggutan kan mga tawo manungod sa mga problema sa ekonomiya, lalo na sa grabeng implasyon, nagkaigwa nin darakulang protesta laban sa mga gobyerno kan 2022.”e
Hilingon an artikulong “Grabeng Pagmahal kan mga Barakalon sa Bilog na Kinaban.”
Ano an mangyayari sa sunod na taon?
Mayo nin makakapagsabi kun ano an eksaktong mangyayari sa 2023. An aram ta iyo na madali nang gumibo an Kahadian nin Diyos, o an gobyerno sa langit, nin darakulang mga pagbabago sa daga. (Daniel 2:44) Hahalion kan gobyernong iyan an mga dahilan kan pagsakit nin tawo asin sisiguraduhon kaiyan na mangyayari an kabutan nin Diyos sa daga.—Mateo 6:9, 10.
Dinadagka mi kamo na sunudon an sadol ni Jesu-Cristo asin “padagos kamong magbantay” sa kun paano inuutob kan mga pangyayari sa kinaban an mga propesiya sa Bibliya. (Marcos 13:37) Kontakon tabi kami para makanuod pa manungod sa kun paano makakatabang saimo ngunyan an Bibliya asin kun paano iyan makakatao saimo saka sa pamilya mo nin tunay na paglaom para sa mas marahay na puturo.
a AP News, “2022 Taon na Naeksperyensiyahan Giraray kan Europa an Nakakatakot na mga Epekto nin Giyera,” ni Jill Lawless, Disyembre 8, 2022.
b World Food Programme, “Sarong Krisis sa Kakanon sa Bilog na Kinaban.”
c JAMA Health Forum, “Pamumuhay sa Panahon nin mga Pandemya—Magpuon sa COVID-19 Sagkod sa Monkeypox, Polio, Asin Hilang X,” ni Lawrence O. Gostin, JD, Setyembre 22, 2022.
d Earth.Org, “Ano an Pinakadahilan kan Grabeng mga Kalamidad na Konektado sa Kamugtakan nin Panahon Kaidtong Tig-init kan 2022?” ni Martina Igini, Oktubre 24, 2022.
e Carnegie Endowment for International Peace, “Kaanggutan Manungod sa Krisis sa Ekonomiya Nagkawsa nin mga Pagprotesta sa Bilog na Kinaban kan 2022,” ni Thomas Carothers asin Benjamin Feldman, Disyembre 8, 2022.