Ano an Sinasabi kan Bibliya Manungod sa Krisis sa Tubig sa Bilog na Kinaban?
Kaipuhan ta gabos nin malinig na tubig para mabuhay. Pero “huli sa padagos na paglangkaw kan pangangaipo sa tubig sa bilog na kinaban,” an patanid ni UN Secretary-General Antonio Guterres, “napapaatubang kita sa seryosong krisis sa tubig.” Bilyon-bilyon na tawo sa bilog na kinaban an nasasakitan nang makakua nin malinig na maiinom na tubig.
Strdel/AFP via Getty Images
Mangyayari pa daw na dai na magkukulang nin suplay nin tubig para sa gabos? O padagos tang kaipuhan na tagalan an krisis sa tubig? Ano an sinasabi kan Bibliya?
Kun ano an ipinapangako kan Bibliya manungod sa suplay nin tubig
Sinasabi kan Bibliya na maabot an panahon na dai na magkukulang nin tubig. Sa katunayan, nangangako iyan na magkakaigwa nin bastanteng malinig asin preskong tubig.
“An mga tubig maburulwak sa kaawagan, asin an mga sapa sa disyertong kapatagan. An dagang alang sa init magigin danaw-danaw na pano nin tambo, asin an pahang daga magigin mga burabod nin tubig.”—Isaias 35:6, 7.
Taano ta makakapagtiwala kita sa panugang iyan kan Bibliya? Pag-isipan kun ano an sinasabi kan Bibliya manungod sa sarong detalye kan pagkadisenyo kan satong planeta.
Kun ano an sinasabi kan Bibliya manungod sa daga asin sa siklo nin tubig kaiyan
“[An daga] dai [nin Diyos] linalang na mayong katuyuhan, kundi hinaman iyan tanganing istaran.”—Isaias 45:18.
Huling ginibo nin Diyos an daga para magsustenir sa buhay, dinisenyo iyan na igwa nin natural na sistema na makaprodusir nin bastanteng malinig na tubig.
“Binabaton [nin Diyos] an mga tagdo nin tubig; natitipon an mga alupuop asin nagigin uranon; dangan ibinabagsak iyan kan mga panganuron; iinuuran iyan sa katawuhan.”—Job 36:27, 28.
Sa simpleng paliwanag, an mga bersikulong ini naglaladawan sa pagkadisenyo nin Diyos sa natural na siklo nin tubig asin dagos-dagos na suplay nin tubig sa daga. An tubig nagsasangaw hali sa daga asin dagat, dangan magigin panganuron tapos minabagsak iyan bilang uran, na nagtatao nin dagos-dagos na suplay nin malinig asin preskong tubig sa mga tawo asin mga hayop.—Eclesiastes 1:7; Amos 5:8.
“Mapauran ako sa saindo sa tamang panahon, asin itatao kan daga an bunga kaiyan, asin mamumunga man an mga kahoy.”—Levitico 26:4.
Nanuga an Diyos na bebendisyunan niya an mga Israelita kaidto, na sarong nasyon nin mga parauma, nin mabungang ani paagi sa pagtao sainda nin regular na suplay nin tubig. Aram niya na an abundang produksiyon nin kakanon nakadepende sa pag-uran nin tama sa panahon.
Dai mahahaloy, an ginibo nin Diyos sa Israel kaidto papangyarihon niya man sa enterong daga. (Isaias 30:23) Pero mantang dai pa iyan nangyayari, padagos na naggagrabe an krisis sa tubig sa dakul na lugar sa kinaban, asin an bihirang pag-uran saro sanang parte kan problema. Ano pa an sinasabi kan Bibliya manungod sa magigin solusyon sa problema sa tubig ngunyan?
Kun paano matatapos an krisis sa tubig
Sinasabi kan Bibliya na sosolusyunan nin Diyos, paagi kan saiyang Kahadian, an mga problema na nakakaapekto sa satong planeta, kaiba na an krisis sa tubig ngunyan. (Mateo 6:9, 10) An Kahadian nin Diyos sarong langitnon na gobyerno na papamahalaan an daga. (Daniel 2:44; Kapahayagan 11:15) Dugang pa, gigibuhon kan Kahadian nin Diyos an dai kayang magibo kan mga gobyerno nin tawo—an halion an gabos na dahilan kan satong mga problema sa tubig.
Problema: Huli sa climate change, nagkakaigwa nin seryosong abnormalidad sa siklo nin tubig. Nagresulta iyan nin grabeng tigmara asin pagbaha, huli sa daing pundong makusog na pag-uran o paglangkaw kan lebel nin tubig sa dagat.
Solusyon: Papakarhayon kan Kahadian nin Diyos an gabos na danyos na ginibo sa satong planeta. Nanunuga an Diyos: “Uya! Ginigibo kong bago an gabos na bagay.” (Kapahayagan 21:5) An marang daga magkakaigwa nin bastanteng tubig, asin mabubuhay an gabos na buhay na linalang dawa sa mga lugar na dai maistaran ngunyan. (Isaias 41:17-20) Kokontrulon kan Kahadian nin Diyos, sa pamamahala ni Jesu-Cristo, an natural na mga puwersa sa kapalibutan.
Kan si Jesus yaon sa daga, pinapundo niya an sarong makusog na bagyo. Ipinahiling kaiyan an kapangyarihan nin Diyos na itinao sa saiya. (Marcos 4:39, 41) Sa pamamahala ni Cristo bilang Hadi kan Kahadian nin Diyos, dai na magkakaigwa nin natural na mga kalamidad. An mga tawo mabubuhay nin matuninong asin tiwasay, na dai na matatakot sa ano man na klase nin mga kalamidad.
Problema: Huli sa makasadiring mga tawo saka korporasyon, nagigin maati an mga salog, danaw, asin tubig sa irarom kan daga, kaya nagkukulang na nin malinig na tubig.
Solusyon: Papakarhayon nin Diyos an satong planeta asin lilinigon niya an mga salog, danaw, dagat, asin daga. Magigin paraiso an bilog na daga. Paagi sa tula, sinabi kan Bibliya: “An kaawagan asin an alang na daga maggagaya-gayang marhay, asin an disyertong kapatagan magigin maugma asin mamumurak arog kan azafran.”—Isaias 35:1.
Ano an mangyayari sa mga tawong mayong pakiaram sa kapalibutan o sa saindang kapwa? Nanunuga an Diyos na “lalaglagon idtong mga nagraraot kan daga.”—Kapahayagan 11:18; Talinhaga 2:21, 22.
Problema: Inaabuso kan mga tawo an paggamit nin tubig, kaya mas dakul an nasasayang kisa sa naisusuplay na tubig kan daga.
Solusyon: Paagi sa Kahadian, ‘mangyayari an kabutan nin Diyos sa daga,’ bako an kabutan kan makasadiring mga tawo. (Mateo 6:9, 10) Itatao kan Kahadian nin Diyos sa mga sakop kaini an pinakamarahay na pagtutukdo. “An daga mapapano nanggad kan kaaraman manungod ki Jehova,” an sabi sa Isaias 11:9.a Huli sa dai mapapantayan na kaaraman asin hararom na pagkamuot sa Diyos saka sa gabos niyang mga linalang, magigibo kan mga tawo na lubos na pangatamanan an satong magayon na planeta asin an natural na mga yaman kaiyan.
Para sa dagdag na impormasyon manungod sa kun ano an gigibuhon kan Kahadian nin Diyos, hilingon an artikulong “Ano an Gigibuhon kan Kahadian nin Diyos?”
Basahon sa Bibliya an libro nin Isaias kapitulo 35 para mahiling mo mismo kun paano magigin paraiso an daga.
Hilingon an video na Taano ta Linalang nin Diyos an Daga? tanganing maaraman pa an manungod sa katuyuhan nin Diyos para sa daga asin sa mga tawo.
a Jehova an personal na pangaran nin Diyos. (Salmo 83:18) Hilingon an artikulong “Siisay si Jehova?”