Photo by Zhai Yujia/China News Service/VCG via Getty Images
PADAGOS NA MAGBANTAY!
Mapandestrosong mga Pagbaha—Ano an Sinasabi kan Bibliya?
Sa bilog na kinaban, apektadong marhay an dakul na tawo sa nangyayaring mapandestrosong mga pagbaha. Mangnuhon an mga report na ini:
“Sa nakaaging pirang aldaw, naeksperyensiyahan kan kabisera kan China an pinakamakusog na pag-uran na dai pa nangyari kaining nag-aging 140 taon o labi pa ngani huli sa pagbagsak kan 29.3 pulgada na uran mga Sabado sagkod Miyerkules.”—AP News, Agosto 2, 2023.
“Nagdara nin makusog na pag-uran asin grabeng huyop nin duros an Bagyong Khanun (Falcon) sa timog na parte kan Japan sa panduwang aldaw kaiyan, aldaw nin Huwebes, na guminadan nin duwang tawo o labi pa. . . . Inaasahan na madara iyan nin pag-uran na sagkod 0.6 metros sa kabukidan kan central Taiwan.”—Deutsche Welle, Agosto 3, 2023.
“An biglang bagsak nin makusugon na uran sa Atlantic coast kan Canada na dai pa nangyari sa laog nin 50 taon nagresulta sa pagbaha [sa Nova Scotia] kan weekend.”—BBC News, Hulyo 24, 2023.
Ano an sinasabi kan Bibliya manungod sa mga pangyayaring ini?
Sarong tanda kan “huring mga aldaw”
Sinasabi kan Bibliya na nabubuhay kita sa panahon na inaapod na “huring mga aldaw.” (2 Timoteo 3:1) Sinabi sa propesiya ni Jesus na sa panahon na kinabubuhayan ta ngunyan, makakahiling kita nin “makatatakot na mga tanawon.” (Lucas 21:11) An climate change iyo an sarong mayor na rason kaya nangyayari an makatatakot na mga abnormalidad sa kamugtakan nin panahon. Mas parati iyan na nangyayari, dai inaasahan, asin mas makukusog.
Basehan nin paglaom
Sinasabi kan Bibliya na an dakul na makatatakot na mga bagay na nangyayari ngunyan sa kinaban nagtatao talaga nin paglaom. Taano? Sabi ni Jesus: “Pag nahiling nindong nangyayari na an mga bagay na ini, makakasiyerto nanggad kamo na harani na an Kahadian nin Diyos.”—Lucas 21:31; Mateo 24:3.
An nahihiling tang mga nangyayari ngunyan nagpaparisa na dai na mahahaloy, lubos nang makokontrol kan Kahadian nin Diyos an natural na mga elemento sa kapalibutan, kaiba na an siklo nin tubig.—Job 36:27, 28; Salmo 107:29.
Para sa dagdag na impormasyon manungod sa kun paano sosolusyunan kan Kahadian nin Diyos an mga problema sa kapalibutan kan daga, hilingon an artikulong “Siisay an Makakapagligtas kan Daga?”