Paano Tinatratar kan mga Saksi ni Jehova an mga Dating Kabilang sa Saindang Relihiyon?

Hinihinguwa niyamo na trataron an gabos nin may pagkamuot, kabuutan, asin respeto. Kun an saro sa mga Saksi ni Jehova nagin inaktibo o nagpundo na sa paglilingkod, binibisita mi siya, ipinapamati na namumutan mi siya, asin hinihinguwa ming maibalik an interes niya sa espirituwal na mga bagay.—Lucas 15:4-7.

Sa nagkapirang sitwasyon, an maraot na gibo kan saro puwedeng magin dahilan na halion siya sa kongregasyon. (1 Corinto 5:13) Pero bago pa man mangyari iyan, huling namumutan niyamong marhay an samong mga kapagtubod, hinihinguwa niyamo na tabangan siya para dai na siya kaipuhan na halion. Asin dawa ngani halion siya, padagos mi pa man giraray na ipinapahiling an pagkamuot saka respeto sa saiya, na iyo an sinasabi kan Bibliya na dapat niyamong gibuhon.—Marcos 12:31; 1 Pedro 2:17.

Ano an puwedeng magin dahilan na halion an saro sa kongregasyon?

Malinaw na sinasabi kan Bibliya na kun an sarong Kristiyano nakagibo nin magabat na kasalan asin habong magbago, dapat siyang halion sa kongregasyon.a (1 Corinto 5:11-13) Malinaw man na ipinapahiling kan Bibliya kun ano an mga kasalan na ibinibilang na magabat na marhay na puwedeng magin dahilan na halion an saro. Halimbawa, sinasambit diyan an mga gibo na arog nin pagsambay, pagburat, paggadan, pang-aabuso, asin paghabon.—1 Corinto 6:9, 10; Galacia 5:19-21; 1 Timoteo 1:9, 10.

Pero, dai niyamo tulos hinahali sa kongregasyon an saro na nakagibo nin magabat na kasalan. Hinihinguwa nguna kan mga elderb sa kongregasyon na tabangan siyang magbago. (Roma 2:4) Hinihinguwa nindang abuton an saiyang puso paagi sa pagtratar sa saiya na may kahuyuan asin kabuutan. (Galacia 6:1) Sa paaging ini, puwedeng matabangan an nagkasala na marealisar an salang mga nagibo niya asin mapahiro siya na magsulsol. (2 Timoteo 2:24-26) Pero sa ibong kan pauruutrong pagtabang sa saiya kan mga elder, kun padagos pa man giraray niyang binabalga an mga pamantayan kan Bibliya sa moral asin dai siya magsulsol, kinakaipuhan siyang halion sa kongregasyon. Ipapaisi kan mga elder sa kongregasyon na an tawong iyan bako nang Saksi ni Jehova.

Duwang elder na mabuot na binabasahan nin mga teksto sa Bibliya an sarong hoben na lalaki. Saro sa sainda nakakapot an kamot sa abaga kan hoben na lalaki mantang nakikipag-ulay digdi. — Hinihinguwa kan mga elder na abuton an puso kan nagkasala nin may kahuyuan asin kabuutan

Anong mga pakinabang pag hinali an saro na padagos na naggigibo nin kasalan? Inot, nasusunod kan kongregasyon an mga pamantayan nin Diyos dapit sa kalinigan sa moral asin napoprotektaran iyan sa bakong marahay na impluwensiya kan nagkasala. (1 Corinto 5:6; 15:33; 1 Pedro 1:16) Saro pa, puwedeng mapahiro an nagkasala na ipundo an saiyang salang gibo asin maghinguwa na magbago.—Hebreo 12:11.

Paano tinatratar kan mga Saksi ni Jehova an mga hinali sa kongregasyon?

Sinasabi kan Bibliya na dapat “ipundo [kan mga Kristiyano] an pakikiiba-iba” sa saro na hinali sa kongregasyon, “maski an magkakan kaiba kan tawong iyan.” (1 Corinto 5:11) Kaya dai kami nakikiiba-iba sa saro na hinali. Pero dai man niyamo siya biyong rarayuan. Rinerespeto mi pa man giraray siya. Welcome siyang mag-atender sa mga pagtiripon mi, kun sain puwede siyang tinuhon kan mga Saksi ni Jehova.c Puwede pa ngani siyang maghagad nin espirituwal na tabang sa mga elder.

Sarong mag-agom na Saksi na nasa Kingdom Hall an maugmang kinukumusta an sarong babayi na hinali sa kongregasyon. — An mga hinali sa kongregasyon welcome na mag-atender sa samuyang mga pagtiripon

Paano kun an saro hinali sa kongregasyon pero Saksi ni Jehova pa man an saiyang agom asin mga aki? Mababago an relasyon ninda pag-abot sa relihiyon, pero an relasyon ninda bilang pamilya dai. Dahil magkairibanan sinda sa harong, padagos pa man giraray an relasyon niya sa saiyang agom asin an pagpadangat saka pagtrato niya sa saiyang pamilya.

An saro na hinali puwedeng makiulay na bisitahon siya kan mga elder, na iyo an matao sa saiya nin mamumuton na sadol hali sa Kasuratan asin madagka sa saiya na magsulsol saka magbalik sa Diyos. (Zacarias 1:3) Kun ipupundo niya an saiyang salang mga gibo asin ipapahiling an sinserong kagustuhan na sunudon an mga pamantayan kan Bibliya sa moral, maugma siyang aakuon giraray bilang parte kan kongregasyon. ‘Papatawadon siya nin may kabuutan asin rarangahon’ kan kongregasyon, arog kan ginibo kan mga Kristiyano sa Corinto sa sarong nagkasala na nagsulsol asin nagbago.—2 Corinto 2:6-8.

Ano an namamatian kan mga dating hinali sa kongregasyon?

Mangnuhon an sinabi kan pira sa mga Saksi ni Jehova na dating hinali sa kongregasyon asin kan huri nagdesisyon na magbalik sa Diyos.

“Kan magdesisyon akong bumalik sa kongregasyon, inisip ko na gusto kan mga elder na maaraman an gabos na ginibo ko sa dakul na taon puon kan hinali ako. Pero, an sinabi ninda sako, ‘Gusto ming magpokus ka sa kun ano an magigibo mo ngunyan.’ Naggian talaga su pagmati ko kan sabihon ninda idto sako.”—Maria, Estados Unidos.

“Maugmahon an mga tugang kan magbalik ako. Namatian kong mahalaga ako. Tinabangan ninda ako na mamati na napatawad na ako ni Jehova saka na dai na magpokus sa nagibo ko kan nakaagi. Yaon pirmi an mga elder para padagos akong pakusugon. Rinaranga saka tinatabangan ninda ako na mahiling na mahalaga saka namumutan pa man giraray ako ni Jehova.”—Malcom, Sierra Leone.

“Maugma ako ta namumutan ni Jehova an mga lingkod niya kaya sinisigurado niya na malinig an saiyang organisasyon. Dawa garo baga bako iyan makatanusan sa paghiling kan ibang tawo, an totoo saro iyan na mamumuton na paagi na dapat gibuhon. Nagpapasalamat ako na an satong Ama sa langit sarong mamumuton saka mapagpatawad na Diyos.”—Sandi, Estados Unidos.

Mga komento hali sa mga eksperto sa ley na bakong mga Saksi ni Jehova

Ano an sinasabi kan mga eksperto sa ley manungod sa ginigibo kan mga Saksi ni Jehova na hinahali ninda sa kongregasyon an dai nagsusulsol na mga nagkasala? Mangnuhon an minasunod na mga komento.

“Rasonable sana na an sarong relihiyon na nagsusunod asin naghihinguwang isabuhay an mga prinsipyo sa Bibliya igwa nin deretso na, sa nagkapirang sitwasyon, halion an sarong nagkasala. Mahalagang marhay man ini huling an sarong tawo na dai nagsusunod o habong magsunod sa mga prinsipyo sa Bibliya dai na kuwalipikado na magin miyembro kan grupong iyan. Kun dai siya hahalion, puwede siyang magin bakong marahay na impluwensiya sa iba na nagsusunod sa mga prinsipyo sa Bibliya.”—The High Court of Justice, England and Wales, Hunyo 7, 2019.
“Ibinibilang kan mga korte sa Europa asin sa iba pang mga lugar na talagang legal asin suno sa ley an desisyon kan mga Saksi ni Jehova dapit sa mga tawong hinali sa saindang relihiyon . . . asin na mayong deretso an mga korte na makiaram sa bagay na ini.”—Professor Paulo Pinto de Albuquerque, dating judge kan European Court of Human Rights.

a Kaidto, inaapod niyamo na tiwalag an dai nagsusulsol na mga nagkasala. Pero ngunyan, ginagamit mi na an tataramon na ginamit kan Bibliya asin inaapod mi na sinda na mga hinali sa kongregasyon.

b An mga elder maimbod asin eksperyensiyadong mga Kristiyanong lalaki na nagtutukdo sa mga lingkod ni Jehova gamit an Bibliya asin nagtatabang saka nagpapakusog sa sainda. Mayo sindang suweldo sa paglilingkod ninda.—1 Pedro 5:1-3.

c Sa grabeng mga sitwasyon, tibaad bayaan kan saro an kongregasyon asin aktibong magpurbar na rauton iyan o tibaad aktibong magpromotir nin salang gibo. Pag nangyari ini, sinusunod niyamo an pagbuot kan Bibliya na dai “pagkumustahon” an siring na tawo.—2 Juan 9-11.