Totoo Daw an Diyablo?
An simbag kan Bibliya
Iyo, totoo an Diyablo. Siya “an tagapamahala kan kinaban,” sarong espiritung linalang na nagin maraot asin nagrebelde sa Diyos. (Juan 14:30; Efeso 6:11, 12) Ihinahayag kan Bibliya an personalidad kan Diyablo paagi sa mga pangaran asin apod na ini:
Satanas, na nangangahulugan na “Paratumang.”—Job 1:6.
Diyablo, na nangangahulugan na “Parapakaraot.”—Kapahayagan 12:9.
Halas, na sa Bibliya ginagamit para sa “Paradaya.”—2 Corinto 11:3.
Paratentar.—Mateo 4:3.
Putikon.—Juan 8:44.
Bakong simbolo nin karatan
Iniisip kan iba na si Satanas na Diyablo sarong simbolo sana nin karatan na nasa laog ta. Pero mababasa sa Bibliya an sarong pag-uulay nin Diyos saka ni Satanas. Perpekto an Diyos kaya dai puwedeng may kinakaulay siyang maraot sa laog niya. (Deuteronomio 32:4; Job 2:1-6) Tinentaran man ni Satanas si Jesus, na mayo nin kasalan. (Mateo 4:8-10; 1 Juan 3:5) Kaya, ipinapahiling kan Bibliya na totoo talaga an Diyablo, asin bako iyan personipikasyon sana nin karatan.
Dapat daw kitang magngalas na dakul na tawo an dai nagtutubod na totoo an Diyablo? Dai. Huling sinasabi kan Bibliya na naggagamit si Satanas nin pandadaya para magibo an gusto niyang mangyari. (2 Tesalonica 2:9, 10) An saro sa pinakaepektibo niyang pandadaya iyo an mapatubod an dakul na tawo na bako siyang totoo.—2 Corinto 4:4.
Iba pang salang ideya manungod sa Diyablo
Bakong totoo: An Lucifer saro pang pangaran kan Diyablo.
An totoo: An Hebreong tataramon na sa ibang Bibliya trinadusir na “Lucifer” nangangahulugan na “saro na nagkikinang.” (Isaias 14:12) Ipinapahiling kan konteksto na ginamit an terminong ini para sa dinastiya, o linya nin mga hadi, kan Babilonya, na ipapasupog nin Diyos huli sa kapalangkawan kan mga ini. (Isaias 14:4, 13-20) An ekspresyon na “saro na nagkikinang” ginamit para tuyaon an dinastiya kan Babilonya pagkatapos iyan na mapabagsak.
Bakong totoo: Si Satanas nagseserbing “piskal” kan Diyos.
An totoo: An Diyablo kaiwal nin Diyos, bako niyang lingkod. Kinokontra asin sinasahutan ni Satanas na Diyablo an mga tawo na naglilingkod sa Diyos.—1 Pedro 5:8; Kapahayagan 12:10.