Binabago Daw kan mga Saksi ni Jehova an Bibliya Para Magin Kauyon Iyan kan Saindang mga Paniniwala?
Dai. Sa katunayan, pag naaaraman mi na dai kauyon kan Bibliya an mga paniniwala mi, binabago mi an samong mga paniniwala.
Haloy pa bago mi prinodusir an New World Translation of the Holy Scriptures kan 1950, siniyasat mi na an Bibliya. Ginamit mi an ano man na traduksiyon na igwa kaidto asin diyan mi ibinasar an samong mga paniniwala. Uni an pirang halimbawa kan haloy nang pinaniniwalaan kan mga Saksi ni Jehova, asin pag-isipan kun baga kauyon talaga iyan kan itinutukdo kan Bibliya.
Nagtutubod kami na an Diyos bakong Trinidad. An sabi kan Hulyo 1882 isyu kan Zion’s Watch Tower: “Aram kan samong mga parabasa na mantang nagtutubod kami ki Jehova asin ki Jesus, asin sa banal na Espiritu, isinisikwal mi an katukduan na an mga ini tulong Diyos sa sarong persona, o arog kan sinasabi kan iba, sarong Diyos sa tulong persona huling bako lamang iyan maka-Kasuratan.”
An sinasabi kan Bibliya: “Si Jehova satuyang Dios, si Jehova saro sana.” (Deuteronomio 6:4, Magna Banal na Kasuratan [BIC]) “Saro sana an Dios, an Ama, na ginigikanan kan gabos, asin kita para saiya; asin saro sanang Kagurangnan, si Jesu Cristo: an gabos huli saiya asin kita huli saiya.” (1 Corinto 8:6, An Banal na Biblia [Paulines]) Sinabi mismo ni Jesus: “An Ama orog sa sako.”—Juan 14:28, Magna Banal na Kasuratan (BIC).
Nagtutubod kami na mayo nin daing katapusan na pagpasakit sa nagkakalayong impiyerno. An tema na “An Kabayadan kan Kasalan Kagadanan” kan Hunyo 1882 isyu kan Zion’s Watch Tower kinotar sa Roma 6:23 kan King James Version. Sinabi kaiyan: “Malinawon asin simple an mga tataramon na ini. Kaya makangalason na dakulon an nagsasabi na nagtutubod sinda na an Bibliya iyo an Tataramon nin Diyos, pero pigpaparakontra ninda an malinaw na mga tataramon na ini, na sinasabi na nagtutubod sinda—asin na itinutukdo kan Bibliya—na an kabayadan kan kasalan daing katapusan na pagpasakit.”
An sinasabi kan Bibliya: “An kalag na nagkakasala, iyan magagadan.” (Ezekiel 18:4, 20, King James Version) An pangultimong padusa sa mga nagkokontra sa Diyos bakong daing katapusan na pagpasakit, kundi “daing katapusan na pagkalaglag.”—2 Tesalonica 1:9, King James Version.
Nagtutubod kami na an Kahadian nin Diyos bako sanang nasa puso nin tawo, kundi sarong tunay na gobyerno. Manungod sa Kahadian nin Diyos, an Disyembre 1881 isyu kan Zion’s Watch Tower nagsabi: “Siyempre, kaiba sa pag-establisar kan kahadian na ini an paglaglag sa gabos na kahadian sa daga.”
An sinasabi kan Bibliya: “Sa mga aldaw kan mga kahadean na iyan, matugdas an hade kan langit nin kahadean na dai noarin man mawawasak, asin dai ipapasa sa ibang banwaan: rurunoton kaiyan asin uuboson an gabos na naenot na kahadean, alagad iyan magdadanay sagkod pa man.”—Daniel 2:44, An Banal na Biblia (Paulines).
An Bagong Kinaban na Traduksiyon sana daw an ginagamit kan mga Saksi ni Jehova para suportaran an saindang mga paniniwala?
Dai. Naggagamit pa man giraray kami nin dakul na iba pang traduksiyon nin Bibliya sa samong gibuhon na paghuhulit. Sa katunayan, dawa ngani nagtatao kami nin libreng kopya kan Bagong Kinaban na Traduksiyon bilang parte kan samong programa nin libreng pag-adal sa Bibliya, nauugma man kaming tabangan an mga gustong makanuod gamit an ibang traduksiyon.