Rinaraot Daw o Pinapakusog kan mga Saksi ni Jehova an Pag-iribanan sa Laog kan Pamilya?

Bilang mga Saksi ni Jehova, hinihinguwa ming pakusugon an pag-iribanan sa laog kan pamilya, bako lang sa sadiri ming pamilya kundi pati man sa iba. Iginagalang mi an Diyos, an Kagpundar kan pamilya. (Genesis 2:21-24; Efeso 3:14, 15) Paagi sa Bibliya, itinutukdo nin Diyos an mga prinsipyo na nakatabang sa dakul na pamilya na magin makusog asin maugma an pag-iribanan ninda.

Kun Paano Pinapakusog kan mga Saksi ni Jehova an Pag-iribanan sa Laog kan Pamilya

Ginigibo mi an samong pinakamakakaya na sunudon an mga giya kan Bibliya. Nakakatabang ini sa samo na magin mas marahay na agom, saka magurang. (Talinhaga 31:10-31; Efeso 5:22–6:4; 1 Timoteo 5:8) Nakakatabang an marahayon na mga giya kan Bibliya na magin maugma an sarong pamilya dawa iba-iba an relihiyon kan mga miyembro kaiyan. (1 Pedro 3:1, 2) Hilingon an mga sinabing ini kan mga bakong Saksi na an agom nagin Saksi ni Jehova:

• “Puro iwal saka puro problema an inot na anom na taon ming pag-ibanan. Pero kan magin Saksi ni Jehova si Ivete, nagin mas mapagpadangat siya saka mapasensiya. Naisalbar kaiyan an pag-ibanan mi.”—Clauir, taga Brazil.

• “Kontra ako kan makipag-adal nin Bibliya sa mga Saksi ni Jehova an agom kong si Chansa, ta huna ko makakaraot iyan sa pag-iribanan ming pamilya, pero sa katunayan, nakatabang pa ngani an Bibliya sa pag-ibanan ming mag-agom.”—Agness, taga Zambia.

Sa pagharong-harong mi, ipinapahiling mi sa mga tawo na an pagsunod sa marahayon na mga giya kan Bibliya makakatabang sa sainda sa

• Pagpili nin maaagom

• Pag-adjust sa inot na taon na pag-ibanan bilang mag-agom

• Kun paano magkakaigwa nin marahay na relasyon sa mga panugangan

• Pagbadyet nin kuwarta

• Kun paano malilikayan an argumento

• Kun paano magpapatawad

• Tamang pagpadakula sa mga aki

An paglipat daw nin relihiyon nagigin dahilan nin iwal nin mag-agom?

Sa totoo lang, nangyayari talaga iyan kun minsan. Halimbawa, uyon sa 1998 na report kan research company na Sofres, saro sa 20 mag-agom an nagkaigwa nin seryosong problema kan magin Saksi an agom ninda.

Sinabi na kaidto ni Jesus na an mga nagsusunod sa saiyang katukduan makakaeksperyensiya kun minsan nin mga problema sa pamilya. (Mateo 10:32-36) Sinabi kan istoryador na si Will Durant na sa pamamahala kan Imperyo nin Roma, “inakusaran an Kristiyanismo na nangraraot nin mga pamilya.”a Arog man kaiyan ngunyan an inaakusar sa nagkapirang Saksi ni Jehova. Pero buot sabihon daw kaini an Saksi an dahilan kan dai pagkakauyon kan mag-agom?

Sa desisyon kan European Court of Human Rights sa akusasyon sa mga Saksi ni Jehova, na rinaraot kaini an mga pamilya, sinabi kaiyan na an parating kawsa nin problema iyo an mga kapamilyang bakong Saksi na “dai inaako saka iginagalang an katalingkasan kan saindang kapamilyang Saksi na ipahayag saka isagibo an saiyang relihiyon.” Sinabi pa kaiyan: “Parating nangyayari an sitwasyon na ini sa sarong pamilya na an mga miyembro iba-iba an relihiyon; kaiba na diyan an mga Saksi ni Jehova.”b Dawa ngani nakakaeksperyensiya nin mga pagkontra, hinihinguwa kan mga Saksi ni Jehova na sunudon an sinasabi kan Bibliya: “Dai magbalos nin maraot sa siisay man na naggibo sa saindo nin maraot. . . . Kun posible, sagkod na magigibo nindo, makipagkatuninungan sa gabos na tawo.”—Roma 12:17, 18.

Kun taano ta naniniwala an mga Saksi ni Jehova na dapat sindang mag-agom sa karelihiyon sana ninda

Sinusunod kan mga Saksi an instruksiyon kan Bibliya na dapat an magigin agom ninda ‘sarong parasunod kan Kagurangnan,’ buot sabihon, kapagtubod o karelihiyon ninda. (1 Corinto 7:39) Base sa Bibliya saka praktikal an pagbuot na ini. Halimbawa, sinabi sa 2010 na artikulo sa Journal of Marriage and Family na “an mga mag-agom na pareho an relihiyon, kaugalian, saka mga paniniwala” sa parati mas maugma an pag-ibanan.c

Pero, dai ineengkaminar kan mga Saksi an mga kapagtubod ninda na makipagsuwayan sa saindang bakong Saksing agom. Sinasabi kan Bibliya: “Kun igwa nin tugang na lalaki na may agom na bakong kapagtubod asin uyon man ini na magpadagos an pag-ibanan ninda, dai niya ini pagbayaan; asin kun igwa nin babayi na may agom na bakong kapagtubod asin uyon man ini na magpadagos an pag-ibanan ninda, dai niya pagbayaan an saiyang agom.” (1 Corinto 7:12, 13) Sinusunod kan mga Saksi ni Jehova an pagbuot na iyan.