May mga Susundon Daw an mga Saksi ni Jehova Pag-abot sa Pakikipag-date?

Nagtutubod an mga Saksi ni Jehova na an mga prinsipyo saka pagbuot sa Bibliya makakatabang sa sato na makagibo nin mga desisyon na parehong nakakapaugma sa Diyos asin kapaki-pakinabang. (Isaias 48:17, 18) Bako man kami an naggibo kan mga prinsipyo saka mga pagbuot na ini, pero namumuhay kami kauyon kan mga iyan. Pag-isipan kun paano konektado sa pakikipag-datea an nagkapira sa mga iyan.

• An pag-aguman sarong permanenteng pag-ibanan. (Mateo 19:6) Dahil minamansay kan mga Saksi ni Jehova an pakikipag-date bilang sarong lakdang pasiring sa pag-aguman, sineseryoso mi iyan.

• An pakikipag-date para sana sa mga nasa tamang edad na para mag-agom. Sinda su mga “lampas na . . . sa pagbukad nin pagkahoben,” o nakalampas na sa panahon na makusugon an pagmawot ninda sa sekso.—1 Corinto 7:36.

• An nakikipag-date dapat na puwede nang mag-agom. May mga tawong legal na nagdiborsiyo pero para sa Diyos dai sinda puwedeng mag-agom giraray, dahil uyon sa pamantayan niya, seksuwal na imoralidad sana an balidong basehan para sa pagdiborsiyo.—Mateo 19:9.

• Pinagbutan an mga Kristiyano na gusto nang mag-agom na kapagtubod sana an pilion na magin agom. (1 Corinto 7:39) Para sa mga Saksi ni Jehova, an pagbuot na ini nanunungod bako sa sarong tawo na irinerespeto sana an samong mga paniniwala, kundi sa saro na arog man kaiyan an paniniwala saka namumuhay kauyon kaiyan bilang sarong bawtisadong Saksi. (2 Corinto 6:14) Dawa kaidto, pinagbutan nin Diyos an saiyang mga parasamba na an dapat nindang agumon idto sanang nagsasamba man sa Saiya. (Genesis 24:3; Malakias 2:11) Base sa mga pag-aadal nin mga researcher sa presenteng panahon, praktikal man an pagbuot na ini.b

• Dapat na sunudon kan mga aki an mga magurang ninda. (Talinhaga 1:8; Colosas 3:20) Para sa mga aki na nasa poder pa kan magurang ninda, kaiba sa pagbuot na ini an pagsunod sa mga desisyon kan saindang mga magurang manungod sa pakikipag-date. Puwedeng kaiba digdi an edad kun nuarin puwede nang makipag-date an mga aki ninda saka an mga aktibidad na puwedeng gibuhon kan mga ini.

• Kauyon kan sinasabi kan Bibliya, an lambang Saksi an madesisyon kun baga makikipag-date siya asin kun kiisay siya makikipag-date. Kauyon ini kan prinsipyo na: “An kada saro magdadara kan sadiri niyang pasan nin responsabilidad.” (Galacia 6:5, nota sa ibaba) Pero dawa arog kaiyan, kun manungod sa pakikipag-date, dakul an madunong na naghagad nin sadol sa maygurang na mga Saksi na talagang nagmamalasakit sa sainda.​—Talinhaga 1:5.

• Dakul sa mga gibo-gibo na sa parati ikinokonektar sa pakikipag-date an maibibilang na magabat na kasalan. Halimbawa, ipinagbuot sa sato kan Bibliya na likayan an seksuwal na imoralidad. Bako sanang pakikidurog an kaiba diyan kundi pati man an iba pang maating mga gibo nin duwang tawong bakong kasal, arog kan paghapiyap sa ikinabuhay nin iba, oral sex, o anal sex. (1 Corinto 6:​9-​11) Dawa an mga gibong dai man maibibilang na seksuwal na imoralidad pero nakakapukaw sa seksuwal na pagmawot nin duwang tawong bakong kasal, maibibilang na “maating gibo” na dai nakakapaugma sa Diyos. (Galacia 5:​19-​21, nota sa ibaba) Kinokondenar man kan Bibliya an mga pag-urulay na may kaibang mga “bastos na pananaram.”—Colosas 3:8.

• An puso, o an panglaog na pagkatawo, madaya. (Jeremias 17:9) Dahil diyan, puwedeng makagibo an saro nin mga bagay na aram niyang sala. Para dai madaya kan saindang puso, linilikayan kan mga magkailusyon na mag-ibanan na sinda sanang duwa sa mga sitwasyon na puwedeng makatentar sa sainda. Puwede man sindang magdesisyon na mag-date kaiba nin sarong grupo nin marahay na mga kairiba o nin sarong mapagkakatiwalaan na tsaperon. (Talinhaga 28:26) Isinasaisip kan mga Kristiyano na naghahanap nin magigin agom an peligro sa paggamit nin mga online dating site, lalo na an peligro nin pakikipagrelasyon sa saro na dai man talaga ninda bistadong marhay.—Salmo 26:4.