Ano an Pagmansay kan mga Saksi ni Jehova sa Diborsiyo?
Sinusunod mi an sinasabi kan Bibliya manungod sa pag-aguman asin diborsiyo. Inestablisar ni Jehova an pag-aguman bilang permanenteng pag-ibanan nin sarong lalaki asin sarong babayi. An solamenteng basado sa Kasuratan na basehan para sa pagdiborsiyo iyo an seksuwal na imoralidad.—Mateo 19:5, 6, 9.
May itinatao daw na tabang an mga Saksi para sa mga nagkakaproblema sa saindang pag-aguman?
Igwa. Ini an nagkapirang paagi:
Mga Publikasyon. Nagtatampok an mga ini nin mga bagay na nakakapakusog sa pag-aguman, dawa idtong mga garo baga dai na mareresolberan pa. Halimbawa, hilingon an mga artikulong “Manatiling Tapat sa Inyong Sumpaan Bilang Mag-asawa,” “Kung Paano Magpapatawad,” saka “Kung Paano Maibabalik ang Tiwala.”
Mga Pagtiripon. Tinutukar mi an praktikal na mga sadol kan Bibliya para sa pag-aguman sa samong mga pagtiripon kan kongregasyon, mga asembleya, asin mga kumbensiyon.
Mga Elder. Tinatabangan kan mga elder sa kongregasyon an mga mag-agom paagi sa paggamit nin mga bersikulo sa Bibliya arog kan Efeso 5:22-25.
Kaipuhan pa daw an permiso kan mga elder sa kongregasyon para sa diborsiyo nin sarong Saksi?
Dai. Dawa ngani nagpapatabang sa mga elder an mag-agom na may problema sa saindang pag-aguman, bako an mga elder an madesisyon para sa mag-agom. (Galacia 6:5) Pero kun an saro magdesisyon na makipagdiborsiyo na mayo nin maka-Kasuratan na basehan, bako siyang talingkas na mag-agom giraray suno sa Kasuratan.—1 Timoteo 3:1, 5, 12.
Ano an pagmansay kan mga Saksi sa pagsuwayan?
Dinadagka kan Bibliya an mga mag-agom na dai magsuwayan dawa bako nang gayong magayon an sitwasyon. (1 Corinto 7:10-16) Dakul na problema an puwedeng maresolberan paagi sa udok na pagpamibi, pag-aplikar sa mga prinsipyo sa Bibliya, asin pagpahiling nin pagkamuot.—1 Corinto 13:4-8; Galacia 5:22.
Alagad, an ibang Kristiyano nagdesisyon na makipagsuwayan sa saindang agom huli sa nagkapirang malalang sitwasyon arog kan minasunod:
Tuyong dai pagsustento.—1 Timoteo 5:8.
Grabeng pangungulog sa pisikal.—Salmo 11:5.
Biyong pagsapeligro kan espirituwalidad, na huli kaiyan nagigin imposible na sambahon si Jehova. Halimbawa, tibaad an sarong Saksi puwersahon kan saiyang agom na balgahon an pira sa mga pagbuot nin Diyos, asin an nasa peligrong agom magdesisyon na an pagsuwayan iyo sana an solusyon para ‘masunod niya an Diyos bilang tagapamahala imbes na an mga tawo.’—Gibo 5:29.