Ano an “mga Liyabe kan Kahadian”?
An simbag kan Bibliya
“An mga liyabe kan Kahadian” nagrerepresentar sa awtoridad na buksan an dalan para sa mga tawo na “[makalaog] sa Kahadian nin Diyos.” (Mateo 16:19; Gibo 14:22)a Itinao ni Jesus ki Pedro an “mga liyabe kan Kahadian kan kalangitan.” Nangangahulugan ini na itinao ki Pedro an awtoridad na ihayag an kaaraman manungod sa kun paano magkakaigwa nin pribilehiyo na makalaog sa Kahadian sa langit an mga tawong maimbod paagi sa pag-ako kan banal na espiritu nin Diyos.
Para kiisay ginamit an mga liyabe?
Ginamit ni Pedro an awtoridad hali sa Diyos tanganing buksan an dalan para makalaog sa Kahadian an tulong grupo:
Mga Judio saka nakumbertir na Judio. Dai nahaloy pagkagadan ni Jesus, pinahiro ni Pedro an sarong grupo nin mga Judiong Kristiyano na akuon si Jesus bilang an pinili nin Diyos na mamahala sa Kahadian. Ipinahiling ni Pedro sa sainda kun ano an dapat nindang gibuhon para maligtas. Paagi kaiyan, binuksan niya an dalan para makalaog sinda sa Kahadian, asin rinibo an “nag-ako kan saiyang tataramon.”—Gibo 2:38-41.
Mga Samaritano. Pagkatapos, isinugo si Pedro na magduman sa mga Samaritano.b Ginamit niya an ikaduwang liyabe kan Kahadian kan “namibi [siya saka si apostol Juan] para sa sainda tanganing mag-ako sinda nin banal na espiritu.” (Gibo 8:14-17) Nagbukas ini kan dalan para sa mga Samaritano na makalaog sa Kahadian.
Mga Hentil. Tulo may kabangang taon pagkagadan ni Jesus, ihinayag nin Diyos ki Pedro na an mga Hentil (mga bakong Judio) magkakaigwa man nin oportunidad na makalaog sa Kahadian. Kaya ginamit ni Pedro an ikatulong liyabe paagi sa paghuhulit sa mga Hentil. Paagi kaiyan, nabuksan an pinto para sa sainda na mag-ako kan banal na espiritu, magin mga Kristiyano, asin magkaigwa kan paglaom na magin kabilang sa Kahadian.—Gibo 10:30-35, 44, 45.
Ano an buot sabihon kan ‘paglaog sa Kahadian’?
An mga ‘makakalaog sa Kahadian’ magigin mga kapwa tagapamahala ni Jesus sa langit. Ihinula kan Bibliya na ‘matukaw sinda sa mga trono’ asin “papamahalaan ninda an daga bilang mga hadi.”—Lucas 22:29, 30; Kapahayagan 5:9, 10.
Mga salang ideya manungod sa mga liyabe kan Kahadian
Salang ideya: Si Pedro an nagpipili kun siisay an makakalaog sa langit.
An totoo: Sinasabi kan Bibliya na si Cristo Jesus, bako si Pedro, “an mahukom sa mga buhay asin mga gadan.” (2 Timoteo 4:1, 8; Juan 5:22) Sa katunayan, sinabi mismo ni Pedro na si Jesus “an saro na itinalaga nin Diyos na magin hukom kan mga buhay asin mga gadan.”—Gibo 10:34, 42.
Salang ideya: Hinalat kan langit si Pedro na magdesisyon kun nuarin niya gagamiton an mga liyabe kan Kahadian.
An totoo: Kan nagtataram si Jesus manungod sa mga liyabe kan Kahadian, sinabi niya ki Pedro: “An ano man na bugkosan mo sa daga, magigin bugkos sa langit, asin ano man na hubadan mo sa daga, magigin hubad sa langit.” (Mateo 16:19, An Banal na Biblia [Paulines]) An pakasabot diyan kan nagkapira iyo na si Pedro an magibo nin mga desisyon na susunudon kan langit, pero ipinapahiling kan orihinal na mga Griegong pandiwa na an ano man na napagdesisyunan ni Pedro, napagdesisyunan na iyan sa langit.c
Ipinapahiling kan iba pang mga salaysay sa Bibliya na nagsusunod si Pedro sa paggiya na hali sa langit pag ginagamit niya an mga liyabe kan Kahadian. Halimbawa, nagsunod siya sa mga instruksiyon nin Diyos kan gamiton niya an ikatulong liyabe.—Gibo 10:19, 20.
a Kun beses, ginagamit kan Bibliya an terminong “liyabe” bilang simbolo nin awtoridad asin responsabilidad.—Isaias 22:20-22; Kapahayagan 3:7, 8.
b An mga Samaritano kabilang sa sarong relihiyon na lain sa Judaismo, pero an nagkapira sa mga katukduan saka kaugalian ninda hali sa Katugunan ni Moises.
c Hilingon an study note sa Mateo 16:19 sa Bagong Sanlibutang Salin ng Banal na Kasulatan (Edisyon sa Pag-aaral).