Ano an Bagong Jerusalem?

An simbag kan Bibliya

An ekspresyon na “Bagong Jerusalem” duwang beses na naglataw sa Bibliya. Saro iyan na simbolikong siyudad na nagrerepresentar sa grupo nin mga parasunod ni Jesus na maduman sa langit para mamahala kaiba niya sa Kahadian nin Diyos. (Kapahayagan 3:12; 21:2) Ipinapahiling kan Bibliya na an grupong ini inaapod man na nobya ni Cristo.

Kun paano mamimidbid an Bagong Jerusalem

1. An Bagong Jerusalem nasa langit. Sa kada pagkakataon na binabanggit kan Bibliya an Bagong Jerusalem, sinasabi na nagbababa iyan hali sa langit, saka binabantayan kan mga anghel an mga trangkahan kaiyan. (Kapahayagan 3:12; 21:2, 10, 12) Pinapatunayan man kan dakulaon na sukol kaiyan na dai iyan puwedeng nasa daga. Saro iyan na cube na may palibot na sukol na “12,000 estadyo.”a (Kapahayagan 21:16; King James Version) Kaya an kada gilid kaiyan may sukol na haros 560 kilometros—halangkawon na marhay mala ta malampas iyan sa atmospera kan daga.

2. An Bagong Jerusalem binibilog nin sarong grupo nin mga parasunod ni Jesus, an nobya ni Cristo. An Bagong Jerusalem inaapod na “an nobya, an agom kan Kordero.” (Kapahayagan 21:9, 10) Sa simbolikong paglaladawan na ini, an Kordero nanunungod ki Jesu-Cristo. (Juan 1:29; Kapahayagan 5:12) “An agom kan Kordero,” an nobya ni Cristo, nagrerepresentar sa mga Kristiyano na magigin kasaro ni Jesus sa langit. Iinagid kan Bibliya an relasyon ni Jesus asin kan mga Kristiyanong ini sa relasyon nin sarong mag-agom. (2 Corinto 11:2; Efeso 5:23-25) Saro pa, nakaukit sa mga gapong pundasyon kan Bagong Jerusalem “an 12 pangaran kan 12 apostol kan Kordero.” (Kapahayagan 21:14) Nakakatabang an detalyeng ini para mamidbid an Bagong Jerusalem, huli ta an mga Kristiyano na inapod para mabuhay sa langit “itinindog . . . sa pundasyon na mga apostol asin mga propeta.”—Efeso 2:20.

3. An Bagong Jerusalem parte nin sarong gobyerno. An suanoy na Jerusalem kabisera kan Israel, an lugar kun sain si Hading David, an aki niyang si Solomon, saka an mga gikan ninda namahala “sa trono ni Jehova.” (1 Cronica 29:23) Kaya an Jerusalem, na inaapod man na “an banal na siyudad,” nagrerepresentar sa pamamahala nin Diyos sa linya kan pamilya ni David. (Nehemias 11:1) An Bagong Jerusalem, na inaapod man na “an banal na siyudad,” iyo an mga makakaibanan ni Jesus sa langit para ‘pamahalaan an daga bilang mga hadi.’—Kapahayagan 5:9, 10; 21:2.

4. An Bagong Jerusalem madara nin mga bendisyon sa mga tawo sa daga. Ilinaladawan an Bagong Jerusalem na “nagbababa hali sa langit gikan sa Diyos,” na nagpapahiling na ginagamit iyan nin Diyos para tawan nin atensiyon an mga nasa daga. (Kapahayagan 21:2) Ikinokonektar kan ekspresyon na ini an Bagong Jerusalem sa Kahadian nin Diyos—an ginagamit nin Diyos para magibo an saiyang kabutan “kun paano sa langit, siring man sa daga.” (Mateo 6:10) Kaiba sa katuyuhan nin Diyos para sa mga tawo digdi sa daga an mga bendisyon na ini:

   • Paghali kan kasalan. “Sarong salog nin tubig nin buhay” an nagbubulos hali sa Bagong Jerusalem asin nagtataong tubig sa “mga kahoy nin buhay . . . para sa pagpaumay kan mga nasyon.” (Kapahayagan 22:1, 2) Hahalion kan pisikal saka espirituwal na pagpaumay na ini an kasalan asin magpapagin posible na magkaigwa nin perpektong buhay an mga tawo, arog kan orihinal na katuyuhan nin Diyos.—Roma 8:21.

   • Marahay na relasyon sa pag-ultanan nin Diyos asin kan katawuhan. Isinuway kan kasalan an mga tawo sa Diyos. (Isaias 59:2) Pag hinali na an kasalan, lubos nang mauutob an hulang ini: “An tolda nin Diyos yaon sa katawuhan, asin mag-iirok siya sa kaibanan ninda, asin sinda magigin saiyang banwaan. Asin an Diyos mismo masasakaibanan ninda.”—Kapahayagan 21:3.

   • Katapusan kan pagsakit asin kagadanan. Paagi sa saiyang Kahadian, “papahidon [nin Diyos] an lambang luha sa saindang mga mata, asin an kagadanan mawawara na. Dai na man magkakaigwa nin pagmundo, o nin pagtangis, o nin kulog.”—Kapahayagan 21:4.