“Ginigibo Ko an Makakaya Ko”

Si Irma na taga Germany, ma-90 anyos na. Pagkatapos nin duwang grabeng aksidente asin nagkapirang operasyon, dai na niya kayang makapagharong-harong arog kan dati. Ngunyan, ipinapakipag-ulay ni Irma an manungod sa saiyang pagtubod paagi sa surat sa mga kapamilya niya asin mga kabisto. Nauugmang marhay an mga pinapadarahan niya nin mga surat nin pampakusog asin pagranga, kaya sa parati, nag-aapod sinda saiya kun nuarin siya masurat giraray. Dakul man an nag-aabot saiyang surat nin pasasalamat na nagre-request na magsurat siya giraray. Sinabi ni Irma, “Nauugma ako huli kaiyan asin nakakatabang iyan sako na magdanay na aktibo sa espirituwal.”

Nagpapadara man si Irma nin mga surat sa mga nasa nursing home. Iinistorya niya: “May sarong may edad nang babayi an nag-apod sako asin sinabi niya na naranga siyang marhay kan sakong surat kan magadan an agom niya. Iinipit niya an surat sa saiyang Bibliya asin parating binabasa iyan sa banggi. May saro man na babayi na nagadanan pa sana nin agom an nagsabi na mas nakatabang pa saiya an sakong surat kisa sa sermon kan padi. Kadakul siyang hapot asin nagsabi kun puwede siyang magbisita sako.”

An sarong bakong Saksing kabisto ni Irma na nagbalyo sa harayong lugar nag-request ki Irma na suratan siya. Sinabi ni Irma: “Sinaray kan babayi an gabos kong surat. Kan magadan siya, nag-apod sako an aki niyang babayi. Sinabi kaini na binasa niya an gabos na surat ko ki Mama niya asin sinabi na kun puwedeng padarahan ko man siya nin mga surat na basado sa Bibliya.”

Nauugmang marhay si Irma sa saiyang ministeryo. “Nakikimahirak ako ki Jehova na lugod padagos akong tawan nin kusog tanganing makapaglingkod saiya,” an sabi niya. “Dawa dai na ako makapagharong-harong, ginigibo ko an makakaya ko.”