Pinipirit Daw kan mga Saksi ni Jehova an Saindang mga Aki na Magin Saksi Man?

Dai, huling an pagsamba sa Diyos personal na desisyon kan lambang tawo. (Roma 14:12) Itinutukdo kan mga Saksi ni Jehova sa mga aki ninda an mga prinsipyo sa Bibliya, pero pagdakula kan mga ini, sinda na an madesisyon kun baga magigin Saksi ni Jehova sinda.—Roma 12:2; Galacia 6:5.

Arog kan dakul na magurang, gusto kan mga Saksi ni Jehova an pinakamarahay para sa mga aki ninda. Tinutukduan ninda an saindang mga aki kan mga bagay na sa hiling ninda kapaki-pakinabang sa mga ini: mga kasanayan na magagamit ninda, mga pamantayan sa moral, saka relihiyosong mga tinutubod. Nagtutubod an mga Saksi ni Jehova na itinutukdo kan Bibliya an pinakamarahay na paagi nin pamumuhay, kaya pinagmamaigutan ninda na maitadom sa saindang mga aki an kahalagahan kaini paagi sa pagtukdo sa sainda kan Bibliya asin iriba nindang pag-atender sa mga Kristiyanong pagtiripon. (Deuteronomio 6:6, 7) Pagdakula kan aki, puwede na siyang magdesisyon kun baga magigin Saksi siya arog kan mga magurang niya.

• Binabawtismuhan daw kan mga Saksi ni Jehova an mga umboy?

• Isinisikwal daw kan mga Saksi ni Jehova an mga aki ninda kun dai sinda magpabawtismo?

• Taano ta iniiba kan mga Saksi ni Jehova an saindang mga aki pag naghuhulit sinda?

• Nag-aayon daw an mga Saksi ni Jehova sa mga selebrasyon o iba pang okasyon?

• Ano an masasabi kan mga nagdakula sa pamilyang Saksi?

Binabawtismuhan daw kan mga Saksi ni Jehova an mga umboy?

Dai. Mayong sinasabi sa Bibliya na bawtismuhan an umboy. Halimbawa, mababasa diyan na bago mabawtismuhan an mga Kristiyano kan inot na siglo, nadangog nguna ninda an mensahe kan Bibliya, ‘maugmang inako’ iyan, tapos nagsulsol. (Gibo 2:14, 22, 38, 41) Kaya tanganing mabawtismuhan, kaipuhan na nasa tamang edad na an saro para masabutan an itinutukdo kan Bibliya, magtubod diyan, saka magdesisyon na mamuhay kauyon kan mga katukduan kaiyan—mga bagay na dai magigibo nin sarong umboy.

Pag nagdadakula na an aki, puwedeng maisip niya na gusto na niyang magpabawtismo. Pero para mabawtismuhan, dapat na malinaw saiya kun gurano kaseryoso kan desisyon na iyan.

Isinisikwal daw kan mga Saksi ni Jehova an mga aki ninda kun dai sinda magpabawtismo?

Dai. Dawa ngani nakakamundo para sa mga magurang na Saksi kun dai magigin Saksi an aki ninda, namumutan pa man giraray ninda an saindang aki asin dai ninda puputulon an saindang relasyon huli sana ta habo kaini na magin Saksi.

Taano ta iniiba kan mga Saksi ni Jehova an saindang mga aki pag naghuhulit sinda?

Iniiba mi an samong mga aki sa paghuhulit huli sa nagkapirang rason.a

• Sinasabi sa Bibliya na dapat tukduan kan mga magurang an saindang mga aki na mamidbid an Diyos asin sambahon Siya. (Efeso 6:4) Huling kaiba sa pagsamba an paghayag sa publiko kan satong pagtubod, importante nanggad an paghuhulit sa pagtutukdo sa mga aki kan manungod sa Diyos.—Roma 10:9, 10; Hebreo 13:15.

• Sinasabi mismo kan Bibliya sa mga hoben na ‘umawon ninda an ngaran kan Kagurangnan.’ (Salmo 148:12, 13, An Marahay na Bareta Biblia) An sarong importanteng paagi para maumaw an Diyos iyo na ipakipag-ulay siya sa iba.b

• Nakakanuod man an mga aki pag nag-iiba sinda sa mga magurang ninda sa paghuhulit. Halimbawa, nakakanuod sindang makipag-ulay sa iba-ibang klase nin tawo, saka natatabangan sinda kaiyan na magin mapagmalasakit, mabuot, magalang, bakong makasadiri, asin iba pa. Mas nagigin malinaw man sainda an mga basehan sa Bibliya kan saindang pagtubod.

Nag-aayon daw an mga Saksi ni Jehova sa mga selebrasyon o iba pang okasyon?

Dai pigseselebrar kan mga Saksi ni Jehova an relihiyosong mga selebrasyon o iba pang okasyon na dai nakakapaugma sa Diyos.c (2 Corinto 6:14-17; Efeso 5:10) Halimbawa na diyan an pagselebrar nin birthday o Pasko, mga okasyon na bakong hali sa mga Kristiyano.

Dawa arog kaiyan, nauugma kaming makaibanan an samong pamilya asin magtao nin mga regalo sa samong mga aki. Imbes na magdepende sa kalendaryo kun nuarin kami ma-family reunion o matao nin regalo, nag-uuruurugma kami asin nagtataong regalo dawa anong aldaw.