An Pulot kan Sisi

Haloy nang narisa kan mga zoologist an kakayahan kan mga sisi na dumukot na marhay sa mga gapo, sa mga piyer, saka sa kasko kan mga barko. Sinasabing an pulot kan sisi nakakalabing marhay kisa sa sintetikong mga produkto. Dai pa sana nahahaloy, nadiskubre na kun paano man nanggad nakakadukot an mga sisi sa mga bagay na basa.

Pag-isipan: Sigun sa ginibong mga pagsiyasat, an naglalangoy-langoy na larva pang sisi pinag-aadalan nguna an manlain-lain na lugar na puwede niyang dukutan bago pumili kan saiyang pupuwestuhan. Pag makahanap na nin puwesto, minalataw na nagpapaluwas iyan nin duwang kemikal. An inot iyo an primer na malanang lipid na nakakahali nin tubig sa piniling dudukutan. Inaandam man kan primer na ini an lugar para sa sunod na ilalaag na kemikal, na kompuwesto nin mga protinang inaapod na phosphoprotein.

Paagi sa duwang kemikal na iyan, nabibilog an makusog na pulot na dai kayang rauton maski nin mga bakterya. An pagigin makusog asin matagal kan pulot na ini importante huling magdadanay an sisi sa puwesto kaiyan sa bilog kaining buhay.

Mas komplikado nanggad an proseso nin paggibo kan pulot kan sisi kisa sa hinuhuna kaidto. An sarong miyembro kan team na nakadiskubre kan proseso nagsabi: “Saro iyan na madunong asin natural na solusyon sa problema dawa pa may tubig an dudukutan.” An mga nadiskubre puwedeng makatabang sa mga researcher na makagibo nin mga pandukot na puwedeng gamiton sa irarom nin tubig, pati man nin sintetikong mga pulot na gibo sa organikong mga substansiya na magagamit sa electronics asin sa mga medical implant.

Ano sa hiling mo? Resulta daw nin ebolusyon an pulot kan sisi? O may nagdisenyo kaiyan?