HAPOT KAN MGA HOBEN
Paano Ko Ipapakipag-ulay sa mga Magurang Ko an Manungod sa mga Patakaran Ninda?
“Kan 15 anyos ako, okey sako an mga patakaran kan mga magurang ko, pero ngunyan na 19 na ako, sa hiling ko dapat dai na man ninda ako gayong pagparahigpitan.”—Sylvia.
Arog man daw ki Sylvia an namamatian mo? Kun iyo, makakatabang saimo an artikulong ini na maipakipag-ulay iyan sa mga magurang mo.
Kun ano an dapat mong maaraman
Bago mo ipakipag-ulay sa saimong mga magurang an manungod sa mga patakaran ninda, pag-isipan nguna an minasunod:
Magigin maribok an buhay kun mayong mga patakaran. Isipa an sarong highway na kadakul nin nag-aaging behikulo. Paano kun mayong mga karatula, mga stoplight, o speed limit? Arog kan mga patakaran sa tinampo, an mga patakaran sa harong nakakatabang para mapagdanay na maayos an mga bagay-bagay.
An mga patakaran patunay na nagmamalasakit saimo an mga magurang mo. Kun mayo sindang ginibong ano man na patakaran, tibaad mayo sindang pakiaram saimo. Kun arog kaiyan, masasabi mo daw na marahay sindang mga magurang?
ARAM MO DAW? May mga patakaran man para sa mga magurang! Kun dai ka naniniwala, basahon mo an Genesis 2:24; Deuteronomio 6:6, 7; Efeso 6:4; asin 1 Timoteo 5:8.
Pero paano kun iniisip mo pa man giraray na bakong rasonable an mga patakaran na itinao kan saimong mga magurang?
Kun ano an puwede mong gibuhon
Bago iyan ipakipag-ulay, mag-isip nguna. Kumusta an rekord mo nin pagsunod sa mga patakaran kan mga magurang mo? Kun bako iyan magayon, bako ini an panahon para makiulay sainda na dai ka na gayong higpitan. Imbes, basahon an artikulong, “Paano Ko Makukua an Tiwala kan mga Magurang Ko?”
Kun magayon an rekord mo, ihanda kun ano an mga gusto mong sabihon sa mga magurang mo. Kun pag-iisipan mong marhay o isusurat pa ngani an mga sasabihon mo, makakatabang iyan saimo na maaraman kun baga rasonable an hahagadon mo sainda. Sunod, hagadon sa mga magurang mo na pumili nin oras asin lugar na diyan makakapag-urulay kamo nin relaks asin komportable. Dangan pag nag-uurulay na kamo, tandaan an minasunod:
Magin magalang. An Bibliya nagsasabi: ‘An malanit na tataramon minapasilyab nin kaanggutan.’ (Talinhaga 15:1, An Banal na Biblia) Kaya tandaan: Kun makikidiskusyon ka sa mga magurang mo o sasabihon na bako sindang rasonable, bakong magayon an kaluluwasan kan pag-uulay nindo.
“Pag mas iginagalang ko an sakong mga magurang, mas iginagalang man ninda ako. Mas madali kaming nagkakasundo sa sarong desisyon pag may paggalang kami sa lambang saro.”—Bianca, 19.
Magdangog. Sinasabi sa sato kan Bibliya na “magin alisto sa pagdangog, maluway sa pagtaram.” (Santiago 1:19) Tandaan na nakikipag-ulay ka sa saimong mga magurang; dai ka nagsesermon sa sainda.
“Mantang nagdadakula kita, tibaad isipon ta na mas dakul kitang aram kisa sa mga magurang ta, pero bako nanggad iyan totoo. Mapaparahay kita kun susunudon ta an mga konseho saka sadol ninda.”—Devan, 20.
Magin mapagsabot. Hinguwahon na hilingon an mga bagay-bagay sigun sa pananaw kan mga magurang mo. Sunudon an sadol kan Bibliya na ‘tawan nin atensiyon bako sana an sadiri mong kapakanan, kundi an kapakanan man kan iba’—sa sitwasyon na ini, an kapakanan kan saimong mga magurang.—Filipos 2:4.
Sa hiling mo, arin na paagi an mas magkakaigwa nin marahay na resulta?
“Kaidto, kalaban an paghiling ko sa mga magurang ko imbes na ka-team. Pero ngunyan narealisar ko na hinihinguwa man sana nindang magin marahay na magurang kun paanong hinihinguwa ko man na magin responsableng adulto. Ginibo ninda idto gabos ta padangat ninda ako.”—Joshua, 21.
Mag-alok nin solusyon. Halimbawa ngayang gusto mong magduman sa sarong party pero dai ka tinugutan kan mga magurang mo dahil aabuton nin sarong oras an pagmaneho pasiring diyan. Aramon kun ano an talagang ikinakahadit ninda—su pagmaneho daw, o su party?
Kun su pagmaneho, tutugutan ka daw ninda kun iibanan ka nin saro na mahusay magmaneho?
Kun su party, makakatabang daw kun sasabihon mo sainda kun sairisay an maduruman saka kun siisay an masubaybay sa mga gigibuhon nindo sa party?
Tandaan, magin magalang sa pakikipag-ulay sa mga magurang mo asin mapasensiyang magdangog sa sasabihon ninda. Ipahiling sa saimong tataramon asin gibo na ‘tinatawan mo nin onra an saimong ama saka an saimong ina.’ (Efeso 6:2, 3) Mabago daw an isip ninda? Puwedeng iyo. Puwedeng dai. Ano man an magin desisyon ninda . . .
Irespeto an desisyon kan mga magurang mo. Mahalagang marhay na lakdang ini na sa parati nalilingawan na gibuhon. Kun dai ka tinugutan sa gusto mo tapos nakidiskusyon ka sa mga magurang mo, mas madidipisilan ka lugod sa sunod na pagpaaram mo sa sainda. Pero kun gikan sa buot kang masunod sa desisyon ninda, posibleng marhay na dai na sinda gayong magin mahigpit sa nagkapira sa mga patakaran ninda ngunyan.